ຂປລ. ພິທີມອບ–ຮັບໜ້າທີ່ ເລຂາພັກແຂວງ, ເຈົ້າແຂວງໆຫລວງ ນ້ຳທາ ລະຫວ່າງ ທ່ານ ດຣ. ພິມມະສອນ ເລືອງຄຳມາ ກຳມະການສູນກາງພັກ, ເລຂາພັກແຂວງ ເຈົ້າແຂວງໆຫລວງນ້ຳທາ ຜູ້ເກົ່າ ແລະ ທ່ານ ເພັດຖາວອນ ພິລາວັນ ເລຂາພັກແຂວງ ເຈົ້າແຂວງໆຫລວງນ້ຳທາຜູ້ໃໝ່ ໄດ້ຈັດຂຶ້ນໃນວັນທີ 21 ມິຖຸນາ 2014 ຢູ່ຫ້ອງວ່າ ການປົກຄອງ ແຂວງຫລວງນ້ຳທາໂດຍເປັນກຽດເຂົ້າຮ່ວມຂອງ ທ່ານ ສົມສະຫວາດ ເລັ່ງສະຫວັດ ກຳມະການກົມການເມືອງ ສູນກາງພັກ, ຮອງນາຍົກລັດຖະມົນຕີ, ຜູ້ຊີ້ນຳວຽກງານ ເສດຖະກິດ ການຜະລິດ ແລະ ຈໍລະຈອນ; ມີບັນດາກໍາມະການ ປະຈໍາພັກແຂວງ, ກໍາມະການພັກແຂວງ, ເລຂາພັກເມືອງເຈົ້າເມືອງ, ຫົວໜ້າ, ຮອງຫົວໜ້າ ພະແນກການອ້ອມຂ້າງແຂວງ, ພະນັກງານອາວຸໂສບຳນານເຂົ້າຮ່ວມ.
ໂອກາດດັ່ງກ່າວນີ້, ທ່ານ ສົມສະຫວາດ ເລັ່ງສະຫວັດ ໄດ້ໃຫ້ກຽດໂອ້ລົມ ພ້ອມທັງໃຫ້ທິດຊີ້ນຳ ໃນການປະຕິບັດວຽກງານ ໃນແຕ່ລະດ້ານ ເພື່ອການພັດທະນາ ແຂວງຫລວງນ້ຳທາ ກ້າວໄປຢ່າງບໍ່ຢຸດຢັ້ງ.
ພ້ອມນີ້, ທ່ານ ດຣ. ພິມມະສອນ ເລືອງຄຳມາໄດ້ລາຍງານກ່ຽວກັບ ສະພາບວຽກງານຮອບດ້ານ ໃນໄລຍະ 10 ປີທີ່ຜ່ານມາ ເຊິ່ງໄດ້ຄຽງບ່າຄຽງໄຫລ່ ກັບຄະນະນຳ ຂອງເເຂວງ, ເມືອງແລະອຳນາດການປົກຄອງທຸກຂັ້ນເຮັດໃຫ້ຄວາມສາມັກຄີ ພາຍໃນການນຳ, ຄວາມສາມັກຄີພາຍໃນພັກ, ພະນັກງານ ແລະ ປະຊາຊົນທົ່ວແຂວງ ໄດ້ຮັບການຍົກສູງ ຂຶ້ນເປັນກ້າວໆ ປະກອບສ່ວນ ເຂົ້າໃນການປົກປັກຮັກສາ ແລະ ພັດທະນາ ແຂວງຫລວງນ້ຳທາ ກ້າວຂຶ້ນຢ່າງໜັກແໜ້ນ, ເຮັດໃຫ້ເສດຖະກິດຂອງ ແຂວງສືບຕໍ່ຂະຫຍາຍຕົວ ຢ່າງຕໍ່ເນື່ອງ ສະເລ່ຍໃນລະດັບ 7,8% ຕໍ່ປີ, ປີ 2015 ລວມຍອດຜະລິດຕະພັນ ພາຍໃນບັນລຸ 2.156 ຕື້ກີບສະເລ່ຍຕໍ່ຫົວຄົນບັນລຸ 1.540 ໂດລາຕໍ່ຄົນຕໍ່ປີ.
ແຫລ່ງຂ່າວ: ສຳນັກຂ່າວສານປະເທດລາວ