ໃນຕອນເຊົ້າຂອງວັນທີ 15 ມີຖຸນາ ນີ້, ຢູ່ທີ່ສະໂມສອນພະແນກສຶກສາທິການ ແລະ ກິລາແຂວງອຸດົມໄຊ (ສກຂ), ໄດ້ມີກອງປະຊຸມປຶກສາຫາລືກ່ຽວກັບວຽກງານການຄຸ້ມຄອງ ແລະ ການບໍລິຫານສູນ ICT ລະຫວ່າງກະຊວງສຶກສາທິການ ແລະ ກິລາ ແລະ ສູນ ICT (ສກຂ) ອຸດົມໄຊ.
ເຂົ້າຮ່ວມມີທ່ານ ຮສ.ດຣ ສົມກຽດ ພະສີ ຜູ້ອໍານວຍການສູນ ICT ກະຊວງສຶກສາທິການ ແລະ ກິລາ, ທ່ານ ໂອວາດ ຈັນທະວົງ ຄະນະປະຈໍາພັກແຂວງ ຫົວໜ້າ (ສກຂ), ທ່ານ ຈັນເພັງ ປັນຍາສັກ ອໍານວຍການສູນ ICT (ສກຂ), ໂຮງຮຽນ ມສ ແຂວງ, ມສ ເມືອງໄຊ, ສາມັນກິນນອນຊົນເຜົ່າ ແລະ ມີວິຊາການທີ່ກ່ຽວຂ້ອງທັງສອງຝ່າຍເຂົ້າຮ່ວມນໍາ.
ທ່ານ ຈັນເພັງ ປັນຍາສັກ ອໍານວຍການສູນ ICT (ສກຂ) ໄດ້ຜ່ານບົດສະຫຼຸບການຈັດຕັ້ງປະຕິບັດກ່ຽວກັບການຄຸ້ມຄອງ ແລະ ບໍລິຫານສູນໄລຍະຜ່ານມາ ແລະ ວາງທິດທາງແຜນການສົກປີ 2015-2016, ຈາກນັ້ນ, ຜູ້ເຂົ້າຮ່ວມໄດ້ເປິກສາຫາລືແລກປ່ຽນບົດຮຽນຮ່ວມກັນເພື່ອປັບປຸງການຄຸ້ມຄອງ ແລະ ການບໍລິຫານວຽກງານ ICT ເປັນຕົ້ນແມ່ນ ການຈັດຕັ້ງການຮຽນ-ການສອນທາງໄກຜ່ານລະບົບເຄື່ອຂ່າຍ, ບັນຈຸຊັບຊ້ອນ-ປັບປຸງລະບົບການຈັດຕັ້ງ, ຕິດຕາມກວດກາ, ຈັດສັນງົບປະມານ, ການນໍາໃຊ້ຫ້ອງທົດລອງ, ຄຸນະພາບຂອງຜູ້ສອນ, ການຄຸ້ມຄອງບໍລິຫານ ແລະ ສະໜອງງົບປະມານໃສ່ສູນ, ທັງນີ້ກໍເພືອແນ່ໃສ່ສ້າງຄວາມເຂັ້ມແຂງໃຫ້ກັບວຽກງານນີ້ມີຄຸນະພາບດີຂື້ນເຊີ່ງວ່າກອງປະຊຸມໄດ້ດໍາເນີນໄປໃຊ້ເວລາ 1 ວັນເຕັມຈິ່ງສໍາເລັດ.
