ອະນຸບານລ້ອງກໍເດື່ອແຂວງອຸດົມໄຊ ຈັດກິດຈະກຳສະຫຼອງວັນເດັກນ້ອຍສາກົນຄົບຮອບ 36 ປີ, ຢູ່ທີ່ເດີ່ນຂອງໂຮງຮຽນຕົນເອງ.
ໃນຕອນເຊົ້າຂອງວັນທີ 29 ພຶດສະພາ 2015 ນີ້, ເພື່່ອນໍາພາເດັກນ້ອຍມ່ວນຊື່ນດ້ວຍການຈັດກິດຈະກໍາ, ຫຼີ້ນເກມ, ຟ້ອນ, ຮ້ອງເພງ ແລະ ຖາມ-ຕອບຄວາມຮູ້ຮອບຕົວ, ນອກຈາກນີ້ ຍັງໄດ້ມອບໃບຢັ້ງຢືນຈົບຊັ້ນອະນຸບານ 3 ໃຫ້ໃຫ້ເດັກນັກຮຽນອະນຸບານ 3 ທີ່ສຳເລັດການສຶກສາໃນຂັ້ນຂອງຕົນ, ມອບຂອງຂວັນລາງວັນປະເພດທີ 1, 2 ແລະ 3 ໃຫ້ເດັກນ້ອຍອະນຸບານທີ່ຍາດໄດ້ປະເພດດີເດັ່ນແຕ່ອະນຸບານ 1 ຈົນຮອດ ອະນຸບານ 3 ຕື່ມອີກ.
ການຈັດງານໃນຄັ້ງນີ້ກໍເພືື່ອແນ່ໃສ່ສຶກສາອົບຮົມເດັກໃຫ້ເປັນຄົນຮູ້ຜູ້ດີ, ທັງເປີດໂອກາດໃຫ້ເດັກໄດ້ມີໂອກາດພົບປະແລກປ່ຽນກິດຈະກໍາຮ່ວມກັນໝົດທຸກຄົນດ້ວຍຄວາມເບີກບານມ່ວນຊື່ນ, ທັງໃຫ້ຜູ້ປົກຄອງເດັກຮັບຮູ້ ແລະ ເຂົ້າໃຈເຖິງສິດທິພື້ນຖານຂອງເດັກນ້ອຍ , ການສະເຫຼີມສະຫຼອງວັນເດັກເຫັນວ່າມີຄວາມຄຶກຄື້ນເປັນພິເສດເດັກຫຼາຍຄົນໄດ້ມີສ່ວນຮ່ວມໃນການສະຫຼອງວັນເດັກຂອງຕົນ.
ເຂົ້າຮ່ວມໃນພິທີດັ່ງກ່າວມີທ່ານ ນາງ ສີມອນ ພະເທບມຸງຄຸນ, ຜູ້ອໍານວຍການໂຮງຮຽນອະນຸບານລ້ອງກໍເດື່ອ, ທ່ານ ນາງ ຫວັດມະນີ ສ້ອຍວຽງວົງ ຮອງຫົວໜ້າຂະແໜງປະຖົມ-ອະນຸບານ ພະແນກສຶກສາທິການ ແລະ ກິລາ, ພ້ອມນີ້ ຍັງມີຜູ້ຕ່າງໜ້າຈາກຫ້ອງການສຶກສາທິການ ແລະ ກິລາເມືອງໄຊ, ສະມາຄົມພໍ່ແມ່ນັກຮຽນ, ຄູອາຈານ, ພໍ່ແມ່ຜູ້ປົກຄອງ ແລະ ນ້ອງນ້ອຍນັກຮຽນເຂົ້າຮ່ວມ.