ນັບແຕ່ວັນທີ 11-26 ພຶດສະພາ 2015 ທີ່ສຳນັກງານ ສູນກາງພັກ-ຫລັກ 6, ນະຄອນຫລວງວຽງຈັນ, ຄະນະບໍ ລິຫານງານສູນກາງພັກ ໄດ້ດຳເນີນກອງປະຊຸມຄົບຄະນະຄັ້ງທີ 10 ສະໄໝທີ IX ພາຍໃຕ້ການເປັນປະທານ ຂອງ ສະຫາຍ ຈູມມາລີ ໄຊຍະສອນ ເລຂາທິການໃຫຍ່ ຄະນະບໍລິຫານງານສູນກາງພັກ.
ກອງ ປະຊຸມຄັ້ງນີ້ ໄດ້ດຳເນີນໄປໃນທ່າມກາງບັນຍາກາດ ທີ່ທົ່ວພັກ, ທົ່ວກອງທັບ ແລະ ທົ່ວປວງຊົນລາວທັງຊາດ ມີຄວາມເອກອ້າງພາກພູມໃຈຕໍ່ຜົນງານ ແລະໄຊຊະນະ ແຫ່ງການນຳພາ ຂອງພັກເຮົາ ໃນຕະຫລອດໄລຍະ 60 ປີຜ່ານມາ ໂດຍສະເພາະ ແມ່ນຕໍ່ໝາກຜົນການຈັດຕັ້ງປະຕິບັດ ມະຕິກອງປະຊຸມໃຫຍ່ຄັ້ງທີ 9 ຂອງພັກ ແລະ ແຜນພັດທະນາ ເສດຖະກິດ-ສັງຄົມ 5 ປີ ຄັ້ງທີ VII ໄລຍະມ້ວນທ້າຍ, ຕິດພັນກັບຂະບວນການແຂ່ງຂັນ “ຮັກຊາດ ແລະ ພັດທະນາ”, ການຫ້າງຫາກະກຽມ ແລະ ດຳເນີນກອງປະຊຸມໃຫຍ່ອົງຄະນະພັກແຂວງ, ນະຄອນຫລວງວຽງຈັນ, ກະຊວງ, ອົງການ ກໍ່ຄື ສ້າງຂະບວນຄຳນັບຮັບຕ້ອນ ການກະກຽມກອງປະຊຸມໃຫຍ່ ຄັ້ງທີ X ຂອງພັກ ແລະ ວັນຊາດທີ 2 ທັນວາ ເຮົາຄົບຮອບ 40 ປີ ຢ່າງເປັນຂະບວນການຟົດຟື້ນ ແລະ ກ້ວາງຂວາງ.
ກອງ ປະຊຸມ ໄດ້ລົງເລິກຄົ້ນຄວ້າ, ປຶກສາຫາລື, ໃຫ້ທັດສະນະ ແລະ ທິດຊີ້ນຳຕໍ່ບັນຫາສຳຄັນຈຳນວນໜ່ຶ່ງ ຄື: ການຈັດຕັ້ງປະຕິບັດວຽກງານ ໃນຂົງເຂດການເມືອງໃນປີ 2014-2015. ແຜນພັດທະນາ ເສດຖະກິດ-ສັງຄົມ, ແຜນງົບປະມານ ແລະ ແຜນເງິນຕາ 6 ເດືອນຕົ້ນປີ ແລະ ວຽກງານຈຸດສຸມ 6 ເດືອນທ້າຍສົກປີ 2014-2015 ແລະ ທິດທາງວຽກງານ ຮອບດ້ານໃນສົກປີ 2015-2016; ບັນຫາການປັບປຸງລັດຖະທຳມະນູນ; ການກະກຽມເນື້ອໃນຮ່າງລາຍງານການເມືອງ, ຮ່າງແຜນພັດທະນາ ເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VIII, ຮ່າງກົດລະບຽບຂອງພັກ ສະໄໝທີ X. ນອກນັ້ນ, ຄະນະບໍລິຫານງານສູນກາງພັກ ຍັງໄດ້ດຳເນີນການສຳຫລວດ, ກວດກາການປະຕິບັດໜ້າທີ່, ຄວາມຮັບຜິດຊອບການເມືອງ ຂອງບັນດາສະຫາຍ ກຳມະການສູນກາງພັກ ໃນໄລຍະ 1 ປີ ຜ່ານມາ.
ກອງປະຊຸມ ໄດ້ເປັນເອກະພາບ ແລະ ຕີລາຄາວ່າ, ໃນໄລຍະໜຶ່ງປີຜ່ານມານີ້ ເຖິງສະພາບການສາກົນ ແລະ ພາກພື້ນ ຍັງສືບຕໍ່ຜັນແປຢ່າງໄວວາ ແລະ ສັບສົນ, ບາງຂົງເຂດມີຄວາມຮຸນແຮງຂື້ນ ອັນໄດ້ສົ່ງຜົນກະທົບບໍ່ໜ້ອຍຕໍ່ປະເທດເຮົາ, ສະພາບພາຍໃນປະເທດເຮົາກໍ່ຍັງມີຄວາມຫຍຸ້ງຍາກ ໃນບາງດ້ານ ໂດຍສະເພາະແມ່ນດ້ານເສດຖະກິດ-ການເງິນ, ລາຍຮັບ-ລາຍຈ່າຍ ງົບປະມານ, ບັນຫາໝີ້ສິນ ກໍ່ຄື ປະກົດການຫຍໍ້ທໍ້ໃນສັງຄົມ ຍັງມີຫລາຍດ້ານ ທີ່ຍັງເປັນສິ່ງທ້າທາຍ ຕໍ່ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ກໍ່ຕາມ, ແຕ່ດ້ວຍການເສີມຂະຫຍາຍ ຄວາມສາມັກຄີປອງດອງເປັນປຶກແຜ່ນ, ຈິດໃຈບຸກບືນ, ການເຊີດຊູຄວາມເປັນເຈົ້າຂອງ ທົ່ວປວງຊົນລາວບັນດາເຜົ່າ ພາຍໃຕ້ການນຳພາຂອງພັກນັ້ນ. ປະເທດຂອງພວກເຮົາ ຍັງສືບຕໍ່ຮັກສາໄດ້ສະຖຽນລະພາບ ທາງດ້ານການເມືອງ ຢ່າງໝັກແໝ້ນ, ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ ໂດຍພື້ນຖານ ເສດຖະກິດມະຫາພາກ ຂະຫຍາຍໃນລະດັບ 7,5 % ; ການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ໄດ້ມີຄວາມຄືບໜ້າ ແລະ ມີຜົນສຳເລັດ, ຊິວິດການເປັນຢູ່ທາງດ້ານວັດຖຸ ແລະ ຈິດໃຈຂອງປະຊາຊົນ ໄດ້ຮັບການປົວແປງ ແລະ ພັດທະນາຫລາຍຂຶ້ນ, ປັດຈຸບັນອັດຕາສ່ວນຄອບຄົວທຸກຍາກ ໄດ້ຫລຸດລົງຕາມຄາດໝາຍ, ການປະຕິບັດເປົ້າໝາຍ ສະຫັດສະວັດ ດ້ານການພັດທະນາ ມີຜົນສຳເລັດໃນຫລາຍດ້ານ, ການຈັດຕັ້ງປະຕິບັດວຽກງານ ໃນລະບົບການເມືອງໄດ້ດຳເນີນໄປຢ່າງຕັ້ງໜ້າ ຊຶ່ງໄດ້ຍູ້ແຮງການສ້າງບັນຍາກາດທີ່ດີ ແລະ ຂະບວນການດ້ານຕ່າງໆ ໃຫ້ແກ່ການສະເຫລີມສະຫລອງ 2 ວັນປະຫວັດສາດ ກໍ່ຄື ການກະກຽມກອງປະຊຸມໃຫຍ່ຂອງບັນດາອົງຄະນະພັກກະຊວງ-ອົງການ ຂອງບັນດາແຂວງ-ນະຄອນຫລວງ ແລະ ການກະກຽມກອງປະຊຸມໃຫຍ່ຄັ້ງທີ X ຂອງພັກໃຫ້ມີຄວາມຟົດຟື້ນ ແລະ ມີຄວາມໝາຍເລິກເຊິ່ງ.
ສຳລັບ ທິດທາງວຽກງານ ໃນ 6 ເດືອນຕໍ່ໜ້າ ກໍ່ຄື ສົກປີ 2015-2016, ເຊິ່ງເປັນໄລຍະເວລາທີ່ມີຄວາມໝາຍສຳຄັນ ເພາະເປັນປີມ້ວນທ້າຍ ການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ IX ຂອງພັກ ແລະ ເຊື່ອມຕໍ່ການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ X ຂອງພັກ, ກອງປະຊຸມຮຽກຮ້ອງຄະນະພັກ, ອົງການປົກຄອງແຕ່ລະຂັ້ນ ຕ້ອງເພີ່ມທະວີຄວາມຮັບຜິດຊອບການເມຶອງຂຶ້ນຕື່ມ ເພ່ື່ອເປັນກຳລັງແຮງຕັດສິນ ແລະ ຮັບປະກັນຜົນສຳເລັດ ຂອງການຈັດຕັ້ງປະຕິບັດແນວທາງການເມືອງ ທີ່ພັກວາງອອກ; ຮັບປະກັນໃຫ້ປະເທດເຮົາສືບຕໍ່ມີສະຖຽນລະພາບທາງດ້ານການເມືອງຢ່າງ ໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ, ສ້າງບັນຍາກາດທີ່ດີ ໃຫ້ແກ່ການລົງທືນ ແລະ ພັດທະນາເສດຖະກິດ-ສັງຄົມ. ເຮັດໃຫ້ເສດຖະກິດມະຫາພາກ ມີຄວາມໝັ້ນທ່ຽງ, ເສດຖະກິດສືບຕໍ່ຂະຫຍາຍຕົວ, ລະບົບການເມືອງໄດ້ຮັບການປັບປຸງໃຫ້ປອດໃສ, ເຂັ້ມແຂງ ແລະ ໜັກແໜ້ນ , ເຮັດໃຫ້ຂົງເຂດວຽກງານຕ່າງໆ ລ້ວນແຕ່ໄດ້ມີການຫັນປ່ຽນຢ່າງຕັ້ງໜ້າ ໃນນີ້ ໃຫ້ສຸມໃສ່ຊີ້ນຳວຽກງານຈຳນວນໜຶ່ງດັ່ງນີ້:
– ເພີ່ມທະວີຄວາມເປັນເຈົ້າການ ໃນການພົວພັນຮ່ວມມືກັບບັນດາປະເທດເພື່ອນມິດ ໃຫ້ເຂົ້າສູ່ລວງເລິກກວ່າເກົ່າ, ຕັ້ງໜ້າຜັນຂະຫຍາຍບັນດາສັນຍາ ກໍ່ຄືໂຄງການຮ່ວມມືຕ່າງໆ ທີ່ໄດ້ຕົກລົງກັນໃຫ້ເປັນຈິງ; ເພີ່ມທະວີເປັນເຈົ້າການກວ່າເກົ່າ ໃນການສືບຕໍ່ກະກຽມຄວາມພ້ອມ ເຂົ້າເປັນປະຊາຄົມເສດຖະກິດອາຊຽນ ແລະ ຄົ້ນຄວ້າກະກຽມການເຂົ້າຮ່ວມຈັດຕັ້ງປະຕິບັດ ການຮ່ວມມືຍຸດທະສາດເສັ້ນທາງສາຍໄໝ, ກະກຽມກອງປະຊຸມ ສຸດຍອດອາຊຽນໃນປີ 2016 ແລະ ກອງປະຊຸມປີ່ນອ້ອມຕ່າງໆ ໃຫ້ມີຜົນສຳເລັດ.
– ເອົາໃຈໃສ່ຕິດຕາມສະພາບການຜັນແປຂອງເສດຖະກິດໂລກ ແລະ ພາກພື້ນ, ພ້ອມກັນນັ້ນ ກໍ່ກະກຽມຄວາມພ້ອມ ເພື່ອຮັບມືກັບສິ່ງທ້າທາຍ ທີ່ຈະມີຜົນກະທົບ ຕໍ່ເສດຖະກິດປະເທດເຮົາ; ປັບປຸງແຜນງານຜະລິດທັນຍາຫານ, ເອົາໃຈໃສ່ຕໍ່ການລົງທືນ ສ້າງສູນສົ່ງເສີມກະສິກຳ ໂດຍອີງໃສ່ບົດຮຽນ ແລະ ບັນດາໜໍ່ແໜງປັດໄຈໃໝ່ທີ່ເກີດຂຶ້ນ ຢູ່ແຕ່ລະພາກ ແລະ ບັນດາແຂວງ, ຊຸກຍູ້ສົ່ງເສີມໃຫ້ບັນດາເສດຖະກິດຂອງລັດ ແລະ ພາກສ່ວນເສດຖະກິດອື່ນໆ ເຂົ້າຮ່ວມໃນການລົງທຶນພັດທະນາ ເຂດຊົນນະບົດຫ່າງໄກສອກຫລີກ ດ້ວຍຮູບການອັນເໝາະສົມ; ຄົ້ນຄວ້ານະໂຍບາຍສິນເຊື່ອ ເພື່ອສົ່ງເສີມການຜະລິດສິນຄ້າໃຫ້ເໝາະສົມ; ເພີ່ມຄວາມເຂັ້ມງວດ ແລະ ຄວາມເດັດຂາດໃນການສະກັດກັ້ນ ການຮົ່ວໄຫລ ດ້ານລາຍຮັບ-ລາຍຈ່າຍງົບປະມານ; ຈຳກັດການສ້າງໜີ້ສິນເກີນຂີດຄວາມສາມາດແບກຫາບຂອງງົບປະມານລັດ ຕິດພັນກັບການຊຳລະສະສາງໜີ້ເກົ່າ ໃຫ້ຕົກໄປເປັນກ້າວໆ. ພ້ອມກັນນັ້ນ ກໍສຸມໃສ່ການປະຕິບັດນະໂຍບາຍປະຢັດ ແລະ ສະສົມແຫ່ງຊາດ ໃຫ້ເຂົ້າສູ່ຕົວຈິງ ແລະ ເກີດເປັນຮູບປະທຳ.
– ສືບຕໍ່ຫັນລົງກໍ່ສ້າງຮາກຖານການເມືອງ ເພື່ອບັນລຸ 4 ເນື້ອໃນ 4 ຄາດໝາຍ, ປັບປຸງລະບົບການເມືອງຢູ່ຮາກຖານໃຫ້ໜັກແໜ້ນ, ເປັນຫລັກແຫລ່ງນຳພາເຕົ້າໂຮມກຳລັງແຮງສັງລວມ ຂອງປະຊາຊົນ ໃນການປົກປັກຮັກສາ ແລະ ພັດທະນາບ້ານຊ່ອງ ໃຫ້ເປັນຂະບວນກ້ວາງຂວາງກວ່າເກົ່າ, ສູ້ຊົນເພື່ອບັນລຸເປົ້າໝາຍສະຫັດສະວັດ ດ້ານການພັດທະນາ ໃຫ້ມີຜົນສຳເລັດ, ສຸມໃສ່ເຮັດຢ່າງຕັ້ງໜ້າ ການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ໂດຍສະເພາະ ແມ່ນເຂດພູດອຍຊົນເຜົ່າ, ພື້ນຖານຂອງການປະຕິວັດ, ເພີ່ມທະວີການຊີ້ນຳ-ນຳພາ ຕໍ່ການແກ້ໄຂສະພາບຫຍໍ້ທໍ້ໃນສັງຄົມ ດ້ວຍມາດຕະການ ທີ່ເປັນລະບົບຄົບຊຸດ, ຕໍ່ເນື່ອງ ແລະ ໃຫ້ມີການຫັນປ່ຽນຢ່າງຈະແຈ້ງ.
– ສືບຕໍ່ຄົ້ນຄວ້າປັບປຸງລັດຖະທຳມະນູນ, ສ້າ ງເງື່ອນໄຂດ້ານຕ່າງໆ ເພື່ອຮັບປະກັນໃຫ້ແກ່ການສ້າງຕັ້ງ ແລະ ການເຄື່ອນໄຫວວຽກງານ ຂອງສະພາປະຊາຊົນຂັ້ນທ້ອງຖີ່ນ, ສືບຕໍ່ຄົ້ນຄວ້າປັບປຸງວຽກງານຂົງເຂດສານ, ອົງການໄອຍະການປະຊາຊົນ ແລະ ອົງການປົກປ້ອງກົດໝາຍ ໃຫ້ມີຄວາມໜັກແໜ້ນ, ເຂັ້ມແຂງໃນທຸກດ້ານ, ຮັບປະກັນຄວາມຍຸຕິທຳໃນສັງຄົມ.
– ເສີມຂະຫຍາຍມູນເຊື້ອສາມັກຄີ, ຄວາມເປັນປືກແຜ່ນແໜ້ນໜາພາຍໃນຊາດ ຢູ່ອ້ອມຂ້າງພັກ ຂອງປະຊາຊົນບັນດາເຜົ່າ, ບັນດາຊັ້ນຄົນ, ເພຸດໄວຕ່າງໆ ປະກອບສ່ວນເຂົ້າຮ່ວມຂະບວນການ ແຂ່ງຂັນຮັກຊາດ ແລະ ພັດທະນາ, ການພັດທະນາຊົນນະບົດ, ແກ້ໄຂຄວາມທຸກຍາກ, ຊຸກຍູ້ຂະບວນການຜະລິດເປັນສິນຄ້າ ໃຫ້ກາຍເປັນຂະບວນການ ຢ່າງກ້ວາງຂວາງ ແລະ ແຂງແຮງຕໍ່ເນື່ອງ.
– ເຊີດຊູບົດບາດ ແລະ ຄວາມເປັນແບບຢ່າງນຳໜ້າ ຂອງສະມາຊິກພັກ-ພະນັກງານ, ຍົກສູງຄວາມຮັບຜິດຊອບການເມືອງ ແລະ ຄຸນສົມບັດສິນທຳປະຕິວັດ, ແກ້ໄຂປະກົດການຫຍໍ້ທໍ້ ໃນກົງຈັກການຈັດຕັ້ງ ໃຫ້ມີການຫັນປ່ຽນຢ່າງຈະແຈ້ງ, ຕິດພັນກັບການກະກຽມ ແລະ ດຳເນີນກອງປະຊຸມໃຫຍ່ ອົງຄະນະພັກ ບັນດາແຂວງ, ນະຄອນຫລວງວຽງຈັນ ແລະ ກະຊວງ, ອົງການ.
ກ່ຽວກັບຮ່າງລາຍງານການເມືອງ ຕໍ່ກອງປະຊຸມໃຫຍ່ຄັ້ງທີ X ຂອງພັກ ກອງປະຊຸມໄດ້ໃຫ້ທິດຊີ້ນຳ ສືບຕໍ່ຄົ້ນຄວ້າບັນຫາ ທີ່ຍັງບໍ່ທັນຈະແຈ້ງ, ໂດຍສະເພາະການສະຫລຸບຕີລາຄາ ການຈັດຕັ້ງປະຕິບັດ ມະຕິກອງປະຊຸມໃຫຍ່ຄັ້ງທີ IX ຂອງພັກ ຄວນຕິດພັນກັບການສະຫລຸບ 30 ປີ ແຫ່ງການປະຕິບັດແນວທາງປ່ຽນແປງໃໝ່ ໂດຍໃຫ້ເອົາໃຈໃສ່ສືບຕໍ່ຄົ້ນຄວ້າ, ຖອດຖອນບົດຮຽນ ໃຫ້ຈະແຈ້ງຊັດເຈນຕື່ມອີກ, ຕິດພັນກັບການກຳນົດໄລຍະທາງ ຂອງການປັບປຸງ, ກໍ່ສ້າງລະບອບປະຊາທິປະໄຕປະຊາຊົນ ຕາມທິດສັງຄົມນິຍົມ, ໃຫ້ສືບຕໍ່ຄົ້ນຄວ້າລົງເລິກ ບັນດາທັດສະນະ ແລະ ຫຼັກການພື້ນຖານ ໃນການສືບຕໍ່ຍືດໝັ້ນແນວທາງປ່ຽນແປງໃໝ່ຮອບດ້ານ ທີ່ມີຫລັກການຂອງພັກ ໂດຍສະເພາະ ແມ່ນການພັດທະນາເສດຖະກິດຕະຫລາດ ຕາມທິດສັງຄົມນິຍົມ, ການສ້າງລັດປະຊາທິປະໄຕ ປະຊາຊົນ ທີ່ປົກຄອງດ້ວຍກົດໝາຍ ແລະ ການເຊື່ອມໂຍງກັບພາກພື້ນ ແລະ ສາກົນໃນເງື່ອນໄຂໃໝ່.
ກ່ຽວກັບຮ່າງແຜນພັດທະນາ ເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII, ກອງປະຊຸມໄດ້ຊີ້ນຳໃຫ້ຄະນະຮັບຜິດຊອບ ລົງເລິກຄົ້ນຄວ້າເບິ່ງຄືນດ້ານຂໍ້ມູນໃຫ້ຊັດເຈນ ອັນສຳຄັນແມ່ນໃຫ້ກົມກຽວ ໄປຕາມທິດພັດທະນາແບບຍືນຍົງ, ການພັດທະນາເສດຖະກິດ ຕະຫລາດຕາມທິດສັງຄົມນິຍົມ ແລະ ພັດທະນາພື້ນຖານໂຄງລ່າງຕ່າງໆ ທີ່ເອື້ອອຳນວຍໃຫ້ແກ່ການເຊື່ອມໂຍງ ກັບພາກພື້ນ ແລະ ສາກົນ, ກຳນົດ ແຈ້ງຕື່ມທິດທາງກ່ຽວກັບ ການພັດທະນາ ເສດຖະກິດພູມປັນຍາ, ການພັດທະນາຕະຫລາດສີນຄ້າ, ຕະຫລາດທຶນ, ຕະຫລາດແຮງງານ, ຕະຫລາດອະສັງຫາລິມມະຊັບ (ທີ່ດິນ), ຕະຫລາດວິທະຍາສາດເຕັກໂນໂລຢີ. ພ້ອມກັນນັ້ນ ໃຫ້ເບິ່ງຄືນບັນດາຍຸດທະສາດທີ່ໃດ້ກຳນົດໄວ້ໃນແຕ່ລະດ້ານໃຫ້ຄົບ ຖ້ວນ ແລະ ແທດເໝາະ ໂດຍສະເພາະແມ່ນຍຸດທະສາດໃນບັນຫາທີ່ສຳຄັນ ເຊິ່ງພົວພັນເຖິງຄວາມໝັ້ນຄົງທາງດ້ານສັງຄົມ ແລະ ເສດຖະກິດ ເຊັ່ນ: ຍຸດທະສາດການພັດທະນາ ຊັບພະຍາກອນມະນຸດ, ການພັດທະນາພື້ນຖານໂຄງລ່າງ, ຍຸດທະສາດສ້າງຄວາມໝັ້ນຄົງທາງດ້ານສະບຽງອາຫານ, ດ້ານພະລັງງານ ແລະ ການປົກປັກຮັກສາ ຊັບພະຍາກອນທຳມະຊາດ, ເຊີ່ງທັງໝົດນັ້ນ ແມ່ນເພື່ອສ້າງຄວາມເຂັ້ມແຂງ ຂອງທຸລະກິດພາຍໃນປະເທດ ໃຫ້ສາມາດແກ້ງແຍ້ງແຂ່ງຂັນຂອງພື້ນຖານເສດຖະກິດ ປະເທດເຮົາໃນຕໍ່ໝ້າ.
ກ່ຽວກັບການຄົ້ນ ຄວ້ າປັບປຸງລັດຖະທຳມະນູນ ກອງປະຊຸມໃຫ້ທັດສະນະວ່າ ການຄົ້ນຄວ້າປັບປຸງລັດຖະທຳມະນູນ ໄດ້ມີບາດກ້າວຄືບໜ້າ, ຫລາຍບັນຫາມີຄວາມຈະແຈ້ງ ໃຫ້ສືບຕໍ່ຄົ້ນຄວ້າປັບປຸງໃຫ້ມີຄວາມຮອບຄອບ, ຮອບດ້ານ ແລະ ຮັບປະກັນໃຫ້ໄປຕາມທິດ ສ້າງລັດທິປົກຄອງດ້ວຍກົດໝາຍ, ກອງປະຊຸມມອບໃຫ້ຄະນະກຳມະການ ລະດັບຊາດ ເພື່ອປັບປຸງລັດຖະທຳມະນູນ ປີ 2003 ສືບຕໍ່ຄົ້ນຄວ້າປັບປຸງ ເພື່ອກະກຽມນຳສະເໜີຕໍ່ກອງປະຊຸມ ສະພາແຫ່ງຊາດພິຈາລະນາ.
ກ່ຽວກັບການປັບປຸງກົດລະບຽບຂອງພັກ, ກອງປະຊຸມໄດ້ມອບໃຫ້ ອະນຸກຳມະການກົດລະບຽບ ແລະ ບຸກຄະລາກອນ ຮິບຮ້ອນສືບຕໍ່ຄົ້ນຄ້ວາ, ປັບປຸງຮ່າງກົດລະບຽບຂອງພັກ ສະໄໝທີ X ຕາມຄວາມເຫັນ ຂອງກອງປະຊຸມສູນກາງ, ແລ້ວລາຍງານໃຫ້ກົມການເມືອງ ແລະ ຄະນະເລຂາທິການສູນກາງພັກພິຈາລະນາ.
ຄະນະ ບໍລິຫານງານສູນກາງພັກ ຮຽກຮ້ອງມາຍັງພະນັກງານ, ສະມາຊິກພັກ, ທະຫານຕຳຫລວດປະຊາຊົນທຸກເຜົ່າ, ທຸກຊັ້ນຄົນ ຈົ່ງຍົກສູງຄວາມຮັບຜິດຊອບ ແລະ ເພີ່ມທະວີຄວາມສາມັກຄີ ເປັນຈິດໜຶ່ງໃຈດຽວ ກັນ, ເສີມຂະຫຍາຍນ້ຳໃຈຮັກຊາດ, ຮັກລະບອບໃໝ່, ຄວາມດຸໝັ່ນຂະຫຍັນພຽນ, ສຸມສະຕິປັນຍາ ແລະ ຫົວຄິດປະດິດສ້າງ ເຂົ້າໃສ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ສ້າງຂະບວນການໃຫ້ແຂງແຮງຕໍ່ເນື່ອງ ເພື່ອຄຳນັບຮັບຕ້ອນ ວັນຊາດທີ 2 ທັນວາ ຄົບຮອບ 40 ປີ ແລະ ກອງປະຊຸມໃຫຍ່ ຄັ້ງທີ X ຂອງພັກ ດ້ວຍບັນຍາກາດແຫ່ງຄວາມປິຕິຊົມຊື່ນ ແລະ ຄວາມເຊື່ອໝັ້ນຕໍ່ເສັ້ນທາງກ້າວຂື້ນ ຂອງປະເທດຊາດ.
ແຫລ່ງຂ່າວ: ສຳນັກຂ່າວສານປະເທດລາວ