ຈຳ​ນວນ​ຜູ້​ຍ້າຍ​ຖິ່ນ​ຖານ​ຈາກ​ປະ​ເທດ​ສະ​ມາ​ຊິກອີ​ຢູ ເຂົ້າ​ມາ​ອັງ​ກິດ​ເພີ່ມ​ສູງ​ຂຶ້ນ​ເປັນ 318,000 ຄົນ ໃນ​ປີ 2014 ເຊິ່ງ​ນັບ​ເປັນ​ການ​ຍ້າຍ​ຖິ່ນ​ເຂົ້າ​ມາ​ໃນ​ປະ​ເທດ ສູງ​ທີ່​ສຸດ​ໃນ​ຮອບ 9 ປີ​ຂອງ​ອັງ​ກິດ ນັບ​ຕັ້ງ​ແຕ່​ປີ 2005 ເປັນ​ຕົ້ນ​ມາ.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານຂໍ້​ມູນ​ດັ່ງ​ກ່າວ ​ໃນ​ວັນ​ທີ 21 ພຶດ​ສະ​ພາ​ຜ່ານ​ມາ ເຊິ່ງ​ຖື​ເປັນ​ຂໍ້​ຄົງ​ຄ້າງ​ອັນ​ໜຶ່ງ ທີ່​ລັດ​ຖະ​ບານ​ພາຍ​ໃຕ້​ການ​ນຳ​ຂອງ ນາ​ຍົກ​ລັດ​ຖະ​ມົນ​ຕີ ເດ​ວິດ ຄາ​ເມ​ຣອນ ​ບໍ່​ສາ​ມາດ​ເຮັດ​ສຳ​ເລັດ​ໄດ້ ຈາກທີ່​ເຄີຍ​ໃຫ້​ຄຳ​ໝັ້ນ​ສັນ​ຍາ​ໄວ້​ວ່າ ຈະ​ຫລຸດ​ຜ່ອນ​ຕົວ​ເລກ​ດັ່ງ​ກ່າວ​ລົງ ໃຫ້​ເຫລືອ​ໜ້ອຍ​ກ່​ວາ 100,000 ຄົນ​ຕໍ່​ປີ ອັນ​ໄດ້​ເປັນ​ການ​ສ້າງ​ຄວາມ​ກັງ​ວົນ​ຕໍ່​ປະ​ຊາ​ຊົນ​ຊາວ​ອັງ​ກິດ ກ່ຽວ​ກັບ​ຜົນ​ກະ​ທົບ​ຂອງ​ການ​ອົບ​ພະ​ຍົບ​ຂອງ​ຄົນ​ຈາກ​ປະ​ເທດ ໃນ​ສະ​ມາ​ຊິກ​ສະ​ຫະ​ພາບ​ເອີ​ຣົບ ຫລື ອີ​ຢູ ເຂົ້າ​ມາ​ປະ​ເທດ​ອັງ​ກິດ​ຫລາຍ​ຂຶ້ນ ແລະ ລັດ​ຖະ​ບານ​ເອງ​ກໍ​ບໍ່​ສາ​ມາດ​ຄວບ​ຄຸມ​ໄດ້.

ທ່ານ ເດ​ວິດ ຄາ​ເມ​ຣອນ ໄດ້​ອອກ​ມາ​ໃຫ້​ສັນ​ຍາ​ຕໍ່​ຊາວ​ອັງ​ກິດ​ ຫລັງ​ຈາກ​ຂໍ້​ມູນ​ຕົວ​ເລກ​ດັ່ງ​ກ່າວ​ຖືກ​ລາຍ​ງານ​ອອກ​ມາ​ວ່າ ຕົນ​ເອງ​ຈະ​ຊຸກ​ຍູ້​ໃຫ້​ມີ​ການ​ປະ​ຕິ​ຮູບ​ພາຍ​ໃນ​ສະ​ຫະ​ພາບ​ເອີ​ຣົບ ເພື່ອ​ປັບ​ປ່ຽນ​ວິ​ທີ​ການ​ທີ່​ຊາວ​ອີ​ຢູຈະ​ເຂົ້າ​ເຖິງ​ ລະ​ບົບ​ສະ​ຫວັດ​ດີ​ການ​ຂອງ​ອັງ​ກິດໃຫ້​ສຳ​ເລັດເສຍ​ກ່ອນ ກ່ອນ​ທີ່​ຈະ​ໃຫ້​ຊາວ​ອັງ​ກິດ​ເປັນ​ຜູ້​ລົງ​ປະ​ຊາ​ມະ​ຕິ​ຕັດ​ສິນ​ໃຈ​ອີກ​ເທື່ອ​ໜຶ່ງ ວ່າ​ຈະ​ຢູ່ ຫລື ອອກ​ຈາກ​ການ​ເປັນ​ສະ​ມາ​ຊິກ​ສະ​ຫ​ະ​ພາບ​ເອີ​ຣົບ ພາຍ​ໃນ​ປີ 2017.

ທັງ​ນີ້ ເນື່ອງ​ຈາກ​ເສດ​ຖະ​ກິດ​ຂອງ​ອັງ​ກິດ ແມ່ນ​ຢູ່​ໃນ​ທ່າອ​່ຽງ​ດີ​ກ່​ວາ​ບັນ​ດາ​ປະ​ເທດ​ສະ​ມາ​ຊິກ​ສະ​ຫະ​ພາບ​ເອີ​ຣົບ​ໂດຍ​ສ່ວນ​ໃຫຍ່ ເຮັດ​ໃຫ້​ປະ​ເທດ​ດັ່ງ​ກ່າວ​ນີ້ ໄດ້​ກາຍ​ເປັນ​ເປົ້າ​ໝາຍ​ຂອງ​ການ​ອົບ​ພະ​ຍົບ ເພື່ອ​ເຂົ້າ​ມາ​ຊອກ​ຫາ​ວຽກ​ເຮັດ​ງານ​ທຳ ຂອງ​ພົນ​ລະ​ເມືອງ​ອີ​ຢູ​ເອງ.