ເຈົ້າໜ້າທີ່ສັດຕະວະແພດ ຂະແໜງລ້ຽງສັດ ແລະ ການປະມົງນະຄອນຫຼວງວຽງຈັນ ສົມທົບກັບໜ່ວຍງານລ້ຽງສັດ ແລະ ການປະມົງ ຫ້ອງການກະສິກຳ ແລະ ປ່າໄມ້ ເມືອງນາຊາຍທອງ ແລະ ອຳນາດການປົກຄອງບ້ານນາງ່າ ລົງຕິດຕາມ ແລະ ກວດກາສະຖານທີ່ຜະລິດ ປຸງແຕ່ງຜະລິດຕະພັນປາມຶກແຊ່ ຢູ່ບ້ານນາງ່າ ວັນທີ 5 ພຶດສະພາ 2015 ເຊິ່ງຜ່ານການກວດກາໄດ້ພົບເຫັນຜະລິດຕະພັນປາມຶກ 458 ກິໂລ ໃນນັ້ນມີປາມຶກທີ່ແຊ່ທີ່ປົນເປື້ອນສານຟໍມາຣິນ (Formalin) 318 ກິໂລ ປາມຶກແຊ່ນ້ຳທຳມະດາ 50 ກິໂລ ແລະ ປາມຶກແຫ້ງ 90 ກິໂລ ເຊິ່ງເປັນຂອງແມ່ຄ້າຢູ່ບ້ານດັ່ງກ່າວ.
ອີງຕາມການບອກເລົ່າຂອງເຈົ້າຂອງສິນຄ້າໃຫ້ຮູ້ວ່າ: ປາມຶກຈຳນວນດັ່ງກາວແມ່ນມາຈາກປະເທດຫວຽດນາມ ເຊິ່ງແມ່ນຄົນຫວຽດນາມ ມາສົ່ງໃຫ້ກັບຕົນ ຫຼັງຈາກນັ້ນ ຕົນເອງຈຶ່ງນຳມາປຸງແຕ່ງເປັນປາມຶກແຊ່ ໂດຍການໃຊ້ Formalin ປະສົມກັບນ້ຳແຊ່ປາມຶກເພື່ອໃຫ້ເກັບຮັກສາໄວ້ໄດ້ດົນແລ້ວ ຈຶ່ງນຳໄປສົ່ງໃຫ້ລູກຄ້າຕາມຕະຫຼາດຕ່າງໆໃນນະຄອນຫຼວງວຽງຈັນ.
ຜ່ານການກວດກາຕົວຈິງເຫັນວ່າ ຜະລິດຕະພັນດັ່ງກ່າວແມ່ນພົບສານເຄມີປົນເປື້ອນ ແລະ ບໍ່ສາມາດບໍລິໂພກໄດ້ ເພາະຈະເປັນອັນຕະລາຍຕໍ່ສຸຂະພາບຂອງຜູ້ບໍລິໂພກ ດັ່ງນັ້ນ ເຈົ້າໜ້າທີ່ກ່ຽວຂ້ອງຈຶ່ງໄດ້ນຳຜະລິດຕະພັນດັ່ງກ່າວມາທຳລາຍຖິ້ມ ດ້ວຍການຝັງ ໃນວັນດຽວກັນນັ້ນ.
ແຫລ່ງຂ່າວ: ວຽງຈັນໃໝ່