ໃນໂອກາດທີ່ທ່ານ ຄຳພັນ ສິດທິດຳພາ ປະທານສານປະຊາຊົນສູງສຸດ ໄດ້ເຂົ້າຮ່ວມກອງປະຊຸມລັດຖະບານເປີດກວ້າງກາງ ສົກປີ 2014-2015 ທີ່ຈັດຂຶ້ນລະຫວ່າງວັນທີ 22-24 ເມສາ 2015 ທີ່ຫ້ອງວ່າການລັດຖະບານ ໄດ້ໃຫ້ສຳພາດວ່າ: ກ່ຽວກັບການຈັດຕັ້ງປະຕິບັດ ເນື້ອໃນຈິດໃຈມະຕິກອງປະຊຸມໃຫຍ່ ຄັ້ງທີ 9 ຂອງພັກປະຊາຊົນປະຕິວັດລາວ ໂດຍສະເພາະ 4 ບຸກທະລຸ ທີ່ພັກໄດ້ວາງອອກ ແມ່ນຍາດໄດ້ຜົນສຳເລັດຫຼາຍດ້ານ ຕໍ່ກັບວຽກງານການແກ້ໄຂຄະດີຕ່າງໆທີ່ເກີດຂຶ້ນໃນໄລຍະຜ່ານມາ.
ພາຍຫຼັງສຳເລັດກອງປະຊຸມໃຫຍ່ ຄັ້ງທີ 9 ຂອງຄະນະພັກ ຄະນະນຳຂອງສານປະຊາຊົນສູງສຸດ ໄດ້ຈັດຕັ້ງປະຕິບັດເຜີຍແຜ່ເຊື່ອມຊຶມຢ່າງເລິກເຊິ່ງ ຫັນເປັນເນື້ອໃນບົດລາຍງານການເມືອງ ຕໍ່ກອງປະຊຸມໃຫຍ່ຄັ້ງທີ 2 ຂອງອົງຄະນະພັກ ຈາກນັ້ນ ພວກເຮົາໄດ້ຫັນອອກມາເປັນ 6 ແຜນງານ ແລະ 18 ໂຄງການໃນການຈັດຕັ້ງປະຕິບັດ ໃນນັ້ນ ໄດ້ມີແຜນງານບຸກທະລຸທາງດ້ານກົນໄກ ລະບຽບການຂອງສານ ໂດຍສະເພາະການບໍລິຫານຄະດີ ພ້ອມນັ້ນ ກໍ່ຍັງໄດ້ມີການປັບປຸງກ່ຽວກັບພາລະບົດບາດ ສິດ-ໜ້າທີ່ການແບ່ງງານ ແລະ ການສັບຊ້ອນຕ່າງໆ ມາຮອດປັດຈຸບັນ ທົ່ວປະເທດມີຄະດີທັງໝົດ 8.712 ເລື່ອງ ໃນຈຳນວນຄະດີທັງໝົດໄດ້ແກ້ໄຂແລ້ວ 7.106 ເລື່ອງ ເທົ່າກັບ 81,56% ທຽບໃສ່ປີ 2013 ເຫັນວ່າຫຼຸດລົງ 738 ເລື່ອງ ການພິຈາລະນາແກ້ໄຂຄະດີສານເຂດ ທັງ 40 ເຂດໃນທົ່ວປະເທດ ເຊິ່ງລວມມີຄະດີທັງໝົດ 3.439 ເລື່ອງ ໃນນັ້ນ ແກ້ໄຂແລ້ວ 2.715 ເລື່ອງ ເທົ່າກັບ 78,94% ຍັງຄ້າງ 724 ເລື່ອງ ເທົ່າກັບ 21,05% ຜ່ານການຕັດສິນແລ້ວ 2.715 ເລື່ອງ ສະແດງໃຫ້ເຫັນວ່າການເກັບກຳຂໍ້ມູນຫຼັກຖານ ການຄົ້ນຄວ້າຕັດສິນ ແລະ ພິພາກສາຄະດີຂອງແຕ່ລະຂັ້ນ ໂດຍສະເພາະຂັ້ນຕົ້ນແມ່ນມີຄວາມຄົບຖ້ວນ ຮອບດ້ານ ຈຶ່ງເຮັດໃຫ້ການພິຈາລະນາຕັດສິນ ແລະ ພິພາກສາຄະດີ ມີຄວາມຖືກຕ້ອງເປັນທຳ ແລະ ມີຄວາມປອດໃສ ຖືກກັບກົດໝາຍ ແລະ ຄວາມເປັນຈິງ ນອກນີ້ກ່ຽວກັບການປັບປຸງການຈັດຕັ້ງບຸກຄະລາກອນ ແລະ ການກໍ່ສ້າງພະນັກງານສານປະຊາຊົນ ຍັງໄດ້ເອົາໃຈໃສ່ປັບປຸງບູລະນະ ກົງຈັກການຈັດຕັ້ງສານ ຂັ້ນຕ່າງໆໃນທົ່ວປະເທດ ໂດຍການກຳນົດພາລະບົດບາດ ສິດໜ້າທີ່ ແລະ ແບບແຜນວິທີການເຮັດວຽກຂອງສານປະຊາຊົນແຕ່ລະຂັ້ນ ໃຫ້ສອດຄ່ອງກັບກົດໝາຍວ່າດ້ວຍປະຊາຊົນ ໂດຍໄດ້ມີການສ້າງຕັ້ງຄະນະສານແຮງງານ ສຶກສາຄວາມເປັນໄປໄດ້ໃນການສ້າງຕັ້ງສານປົກຄອງຕ່າງໆຂຶ້ນຕື່ມອີກ.
ແຫລ່ງຂ່າວ: ວຽງຈັນໃໝ່