ລັດຖະບານເກົາຫລີໃຕ້ສະເທືອນ ນາຍົກລັດຖະມົນຕີ ລີ ວານ ກູ ຕັດສິນໃຈລາອອກ ຂະນະຕົກເປັນຂ່າວຮັບເງິນສິນບົນ 30 ລ້ານວອນ.

ສຳນັກຂ່າວຕ່າງປະເທດ ລາຍງານໃນວັນທີ 21 ເມສາຜ່ານມານີ້ວ່າ ເຈົ້າໜ້າທີ່ປະຈຳສຳນັກງານນາຍົກເກົາຫລີໃຕ້ ໄດ້ອອກມາລະບຸ ກ່ຽວກັບ ນາຍົກລັດຖະມົນຕີ ລີ ວານ ກູ ໄດ້ຕັດສິນໃຈຍື່ນໜັງສືລາອອກຈາກຕຳແໜ່ງ ຕໍ່ກັບປະທານາທິບໍດີ ປາກ ກຶນ ເຮ ແລ້ວ ໃນມື້ວັນທີ 20 ເມສາທີ່ຜ່ານມາ ທ່າມກາງກະແສຫາງສຽງ ທີ່ຕົກເປັນຂ່າວເລື່ອງການສໍ້ລາດບັງຫລວງ ດ້ວຍການຮັບເງິນສິນບົນ ຈາກ ທ້າວ ຊຸງ ວານ ຈອງ ນັກທຸລະກິດຊື່ດັງຂອງເກົາຫລີໃຕ້ ທີ່ຫາກໍຜູກຄໍຕາຍໃນຕົ້ນເດືອນເມສາຜ່ານມາ ແລະ ກ່ອນຕາຍ ທ້າວ ຊຸງ ວານ ຈອງ ຍັງໄດ້ຂຽນບົດບັນທຶກໄວ້ວ່າ ເຂົາໄດ້ມອບເງິນສິນບົນ ໃຫ້ແກ່ນາຍົກລັດຖະມົນຕີ ລີ ວານ ກູ ເປັນເງິນ 30 ລ້ານວອນ (ສະກຸນເງິນເກົາຫລີ) ຫລື ປະມານ 219 ລ້ານກີບ ໃນປີ 2013 ລະຫວ່າງທີ່ ທ່ານ ລີ ວານ ກູ ກຳລັງລົງສະໝັກເລືອກຕັ້ງ ສະມາຊິກສະພາຜູ້ແທນປະຊາຊົນ, ແນວໃດກໍຕາມ ທ່ານນາຍົກລັດຖະມົນຕີ ລີ ວານ ກູ ໄດ້ປະຕິເສດວ່າ ເຂົາບໍ່ໄດ້ຮັບເງິນດັ່ງກ່າວແຕ່ພຽງຢ່າງໃດ.

ດ້ານປະທານາທິບໍດີ ປາກ ກຶນ ເຮ ແມ່ນຍັງບໍ່ທັນມີລາຍງານວ່າ ທ່ານຍອມຮັບໜັງສືລາອອກຂອງນາຍົກລັດຖະມົນຕີ ລີ ວານ ກູ ຫລື ບໍ່ ແຕ່ຢ່າງໃດກໍຕາມ ປະທານາທິບໍດີ ປາກ ກຶນ ເຮ ໄດ້ກ່າວຫລັງຈາກນາຍົກລັດຖະມົນຕີຍື່ນໜັງສືລາອອກວ່າ ທາງການເກົາຫລີໃຕ້ ຈະດຳເນີນການສອບສວນຂໍ້ກ່າວຫານາຍົກ ລີ ກ່ຽວກັບການຮັບເງິນສິນບົນໃນຄັ້ງນີ້ ໂດຍແມ່ນຄະນະໄອຍະການ ຈະເປັນຜູ້ໃຫ້ຄວາມກະຈ່າງແຈ້ງໃນຂະບວນການສວບສວນ.

ທັງນີ້ ນາຍົກລັດຖະມົນຕີ ລີ ວານ ກູ ຂອງເກົາຫລີໃຕ້ ຫາກໍເຂົ້າມາຮັບຕຳແໜ່ງນາຍົກລັດຖະມົນຕີຂອງປະເທດ ໄດ້ພຽງ 2 ເດືອນເທົ່ານັ້ນ ເຊິ່ງເປັນນາຍົກລັດຖະມົນຕີຄົນທີ 2 ແລ້ວ ໃນລັດຖະບານຂອງປະທານາທິບໍດີ ປາກ ກຶນ ເຮ ທີ່ຕ້ອງລາອອກຈາກຕຳແໜ່ງ ຖັດຈາກ ທ່ານ ຈອງ ຮົງ ວອນ ນາຍົກລັດຖະມົນຕີຄົນທຳອິດ ທີ່ໄດ້ລາອອກເພື່ອສະແດງຄວາມຮັບຜິດຊອບ ຈາກເຫດໂສກນາຕະກຳເຮືອຂ້າມຟາກເຊວອນຫລົ້ມ ອັນເປັນເຫດເຮັດໃຫ້ມີຜູ້ເສຍຊີວິດ 304​ ຄົນ ໃນວັນທີ 16 ເມສາ 2014.