ກອງປະຊຸມລັດຖະບານເປີດກວ້າງກາງສົກປີ 2014-2015 ໄດ້ຈັດຂຶ້ນລະຫວ່າງວັນທີ 22-24 ເມສາ 2015 ທີ່ຫ້ອງວ່າການລັດຖະບານ ໂດຍເປັນປະທານຂອງທ່ານ ທອງສິງ ທຳມະວົງ ນາຍົກລັດຖະມົນຕີ ມີບັນດາສະມາຊິກລັດຖະບານ ເຈົ້າຄອງນະຄອນຫຼວງວຽງຈັນ ບັນດາເຈົ້າແຂວງ ຮອງເຈົ້າແຂວງ ຜູ້ຕາງໜ້າອົງການຈັດຕັ້ງພັກ-ລັດ ສະພາແຫ່ງຊາດ ສານ ແລະ ໄອຍະການປະຊາຊົນສູງສຸດ ສູນກາງແນວລາວສ້າງຊາດ ແລະ ອົງການຈັດຕັ້ງມະຫາຊົນເຂົ້າຮ່ວມ.
ທ່ານ ທອງສິງ ທຳມະວົງ ໄດ້ກ່າວວ່າ: ເກືອບ 1 ປີທີ່ຜ່ານມາ ປະເທດເຮົາຍັງສືບຕໍ່ມີສະຖຽນລະພາບທາງດ້ານການເມືອງ ສັງຄົມມີຄວາມສະຫງົບປອດໄພ ມີຄວາມເປັນລະບຽບຮຽບຮ້ອຍໂດຍພື້ນຖານ ເສດຖະກິດສືບຕໍ່ຂະຫຍາຍຕົວ ຂົງເຂດວັດທະນະທຳ-ສັງຄົມ ໄດ້ມີການພັດທະນາດີຂຶ້ນ ການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ການບັນລຸເປົ້າໝາຍສະຫັດສະວັດດ້ານການພັດທະນາ ແລະ ວຽກງານສາມສ້າງ ກໍ່ໄດ້ສືບຕໍ່ດຳເນີນໄປດ້ວຍບັນຍາກາດທີ່ດີ ເຮັດໃຫ້ຄວາມແຕກໂຕນກັນລະຫວ່າງຕົວເມືອງ ແລະ ຊົນນະບົດຄ່ອຍໆຫຍັບມໍ່ເຂົ້າຫາກັນ ທີ່ສຳຄັນແມ່ນຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງແກ້ໄຂນັບມື້ນັບດີຂຶ້ນເປັນກ້າວໆ ຖານະບົດບາດຂອງ ສປປ ລາວ ໃນເວທີພາກພື້ນ ແລະ ສາກົນກໍ່ສູງເດັ່ນຂຶ້ນເລື້ອຍໆ.
ແຕ່ຄຽງຄູ່ກັນນັ້ນ ພວກເຮົາກໍ່ຍັງມີຂໍ້ຫຍຸ້ງຍາກ ແລະ ສິ່ງທ້າທາຍ ເຊິ່ງລັດຖະບານເຮົາຈະຕ້ອງໄດ້ສືບຕໍ່ເອົາໃຈໃສ່ແກ້ໄຂ ເປັນຕົ້ນແມ່ນ ບັນຫາປາກົດການຫຍໍ້ທໍ້ທາງສັງຄົມ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ບາງດ້ານກໍ່ບໍ່ໄດ້ຕາມຄາດໝາຍ ມີສະພາບບໍ່ຄ່ອງໂຕ ການສະໜອງເງິນຕາ ແລະ ການເກັບລາຍຮັບບໍ່ໄດ້ຕາມຄາດໝາຍ ແຕ່ເຖິງຢ່າງໃດກໍ່ຕາມ ພັກ ແລະ ລັດຖະບານ ກໍ່ໄດ້ເອົາໃຈໃສ່ຊີ້ນຳ-ນຳພາຢ່າງຕໍ່ເນື່ອງ ເຮັດໃຫ້ທຸກຂະແໜງການທັງສູນກາງ ແລະ ທ້ອງຖິ່ນ ຕັ້ງໜ້າແກ້ໄຂບັນຫາເຫຼົ່ານີ້ໃຫ້ປາກົດຜົນເປັນຈິງ.
ກອງປະຊຸມຄັ້ງນີ້ ຈະໄດ້ພ້ອມກັນປຶກສາຫາລືຫຼາຍບັນຫາ ເປັນຕົ້ນແມ່ນ ສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຜນງົບປະມານແຫ່ງລັດ ແລະ ແຜນເງິນຕາໄລຍະ 6 ເດືອນຜ່ານມາ ການກຳນົດທິດທາງປະຈຳສົກປີ 2015-2016 ຮ່າງວິໄສທັດຮອດປີ 2030 ຮ່າງຍຸດທະສາດໄລຍະ 10 ປີ ແລະ ຮ່າງແຜນພັດທະນາເສດຖະກິດ-ສັງຄົມ 5 ປີເທື່ອທີ 8 ແລະ ບັນຫາທີ່ເຄັ່ງຮ້ອນພົ້ນເດັ່ນຈຳນວນໜຶ່ງ ເພື່ອຈະໄດ້ວາງມາດຕະການແກ້ໄຂໃນຕໍ່ໜ້າ ນອກນັ້ນ ກໍ່ແມ່ນຮ່າງລັດຖະທຳມະນູນສະບັບປັບປຸງ ເຊິ່ງຈະໄດ້ນຳໄປຜ່ານໃນກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ ໃນເດືອນມິຖຸນາ 2015 ທີ່ຈະມາເຖິງນີ້.
ແຫລ່ງຂ່າວ: ວຽງຈັນໃໝ່