ວັນທີ 21 ເມສາ 2015 ທີ່ທຳນຽບປະທານປະເທດ ທ່ານ ຈູມມາລີ ໄຊຍະສອນ ປະທານປະເທດ ໄດ້ຕ້ອນຮັບການເຂົ້າຢ້ຽມຄຳນັບຂອງທ່ານ ພົນເອກ ສູ ສີລ້ຽງ ຮອງປະທານຄະນະກຳມະການທະຫານສູນກາງ ແຫ່ງ ສປ ຈີນ ພ້ອມດ້ວຍຄະນະ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 20-23 ເມສາ ນີ້.
ໂອກາດດັ່ງກ່າວ ທ່ານປະທານປະເທດ ໄດ້ສະແດງການຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກກັບກະຊວງປ້ອງກັນປະເທດ ແຫ່ງ ສປປ ລາວ ຂອງທ່ານຮອງປະທານ ຄະນະກຳມະການທະຫານສູນກາງ ແຫ່ງ ສປ ຈີນ ພ້ອມດ້ວຍຄະນະໃນຄັ້ງນີ້ ເຊິ່ງເປັນການປະກອບສ່ວນອັນສຳຄັນ ເຂົ້າໃນການຮັດແໜ້ນການພົວພັນຮ່ວມມື ລາວ-ຈີນ ທີ່ມີມູນເຊື້ອສະໜິດຕິດພັນກັນນັ້ນ ໄດ້ມີການຂະຫຍາຍຕົວຢ່າງວ່ອງໄວ ເລິກເຊິ່ງ ແລະ ມີປະສິດທິຜົນສູງ ແລະ ການຮ່ວມມືຊ່ວຍເຫຼືອເຊິ່ງກັນ ແລະ ກັນ ລະຫວ່າງສອງກອງທັບ ລາວ-ຈີນ ແມ່ນບົນຈິດໃຈເປັນບ້ານໃກ້ເຮືອນຄຽງທີ່ດີ ເປັນເພື່ອນທີ່ດີ ເປັນຄູ່ຮ່ວມມືທີ່ດີ ແລະ ເປັນສະຫາຍທີ່ດີທີ່ຊື່ສັດຕໍ່ກັນ ແລະ ພັກ-ລັດຖະບານ ກອງທັບປະຊາຊົນອ້າຍນ້ອງ ຍາມໃດກໍ່ໃຫ້ການສະໜັບສະໜູນ ສປປ ລາວ ໃນພາລະກິດປົກປັກຮັກສາ ແລະ ສ້າງສາປະເທດຊາດ ເຊິ່ງໃນໄລຍະຜ່ານມາ ການພົວພັນຮ່ວມມືລະຫວ່າງສອງກອງທັບ ລາວ-ຈີນ ໄດ້ພັດທະນາຢ່າງຕັ້ງໜ້າຂຶ້ນສູ່ລະດັບສູງ ພົວພັນຖານຄູ່ຮ່ວມມືຍຸດທະສາດຮອບດ້ານ ໝັ້ນຄົງຍາວນານເລິກເຊິ່ງ ແລະ ມີຜົນສຳເລັດ ນອກຈາກນັ້ນ ສອງກອງທັບ ລາວ-ຈີນ ໄດ້ມີການຮ່ວມມືລາດຕະເວນຕາມລຳແມ່ນ້ຳຂອງ ສາມາດເຮັດໃຫ້ສະພາບຕາມລຳແມ່ນ້ຳຂອງມີຄວາມສະຫງົບ ການຄ້າຂາຍເຖື່ອນ ແລະ ຢາເສບຕິດກໍ່ຫຼຸດໜ້ອຍຖ້ອຍລົງ ພ້ອມນັ້ນ ກໍ່ໄດ້ກ່າວຂອບໃຈເປັນຢ່າງຍິ່ງທີ່ກະຊວງປ້ອງກັນປະເທດຈີນ ໃຫ້ການຊ່ວຍເຫຼືອລ້າ ແລະ ໃຫ້ທຶນກູ້ຢືມດອກເບ້ຍຕ່ຳ ແລະ ດ້ານອື່ນໆແກ່ ສປປ ລາວ ຕະຫຼອດມາ.
ຕອນທ້າຍ ທ່ານ ສູ ສີລ້ຽງ ໄດ້ສະແດງຄວາມຂອບໃຈຕໍ່ທ່ານປະທານປະເທດ ທີ່ໄດ້ໃຫ້ການຕ້ອນຮັບອັນອົບອຸ່ນ ພ້ອມທັງແຈ້ງໃຫ້ຊາບເຖິງຈຸດປະສົງຂອງການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ແລະ ໃຫ້ຄຳໝັ້ນສັນຍາວ່າ ຈະສືບຕໍ່ເພີ່ມພູນຄູນສ້າງໄມຕີຈິດມິດຕະພາບ ຖານເພື່ອນສະຫາຍຍຸດທະສາດໝັ້ນຄົງຍາວນານ ໂດຍສະເພາະ ສອງກອງທັບລາວ-ຈີນ ໃຫ້ຈະເລີນງອກງາມຂຶ້ນເລື້ອຍໆ ເພື່ອຜົນປະໂຫຍດອັນຍາວນານຂອງສອງພັກ ສອງລັດ ສອງກອງທັບ ແລະ ປະຊາຊົນສອງຊາດ ລາວ-ຈີນ ໂດຍຈະສືບຕໍ່ຜັນຂະຫຍາຍບັນດາຂໍ້ຕົກລົງຂອງສອງພັກ-ລັດ ກໍ່ຄືສອງກອງທັບໃຫ້ມີປະສິດທິພາບສູງສຸດ.
ແຫລ່ງຂ່າວ: ວຽງຈັນໃໝ່