ມີຜົນວິໄຈພົບວ່າ ຄົນເຮົາໂດຍສ່ວນໃຫຍ່ ຈະມີຄວາມສຸກທີ່ສຸດໃນໄວຊາວປີຕົ້ນໆ ແລະຈະຫຼຸດລົງເລື້ອຍໆ ຈົນຕ່ຳສຸດໄລຍະໄວກາງຄົນ ແລະຈະກັບມາມີຄວາມສຸກຂຶ້ນອີກເທື່ອໜຶ່ງ ໃນບັ້ນປາຍຊີວິດ ທ່ານຜູ້ອ່ານກຳລັງຢູ່ໃນໄລຍະໃດຂອງຊີວິດ ແລະທ່ານເຮັດຈັ່ງໃດ ເມື່ອຊີວິດຢູ່ໃນໄລຍະວິກິດ?
ຍາກຫຼາຍທີ່ຈະຍິ້ມໄດ້ແລະໃຊ້ຊີວິດຢ່າງປົກກະຕິ ຖ້າຫາກປະເຊີນກັບຄວາມທໍ້ຖອຍໝົດຫວັງ ບໍ່ວ່າຈະເປັນການພົບວິກິດດ້ານການເງິນ ຕົກງານກະທັນຫັນ ຖືກທຳຮ້າຍທັງຮ່າງກາຍແລະອາລົມ ຄວາມສຳພັນທີ່ໄປບໍ່ລອດ ການສູນເສຍຄົນຮັກຫຼືເພື່ອນຢ່າງກະທັນຫັນ ອີກທັງຄວາມເຈັບປ່ວຍຊ້ຳເຮື້ອຂອງຜູ້ໃຫຍ່ໃນເຮືອນ ນີ້ຄືສິ່ງທີ່ທ່ານກຳລັງປະເຊີນຢູ່ແມ່ນຫຼືບໍ່?
ຊ້ຳບໍໜຳ ໃນຍາມທີ່ຊີວິດເປັນຂາລົງ ເບິ່ງຄືວ່າອິຫຍັງກໍເຂົ້າມາຊ້ຳເຕີມ ບັນຫາໜຶ່ງກໍ່ໂຕຂຶ້ນຍັງບໍ່ທັນຈົບ ບັນຫາໃໝ່ກໍເຂົ້າມາທັບຖົມ ແລະສົ່ງຜົນກະທົບເຖິງເລື່ອງຕ່ໍໆໄປ ໃນເວລາແບບນີ້ທ່ານຈະພົບວ່າ ໃນໃນມີແຕ່ຄວາມຢ້ານແລະຄວາມເຈັບປວດ ເພາະຄວາມຫວັງພັງທະລາຍ ຮູ້ສຶກສູນເສຍຄວາມໝັ້ນໃຈ ຮູ້ສຶກບໍ່ມີຄ່າແລະບໍ່ດີພໍ ຮູ້ສຶກໝົດຫວັງແລະບໍ່ມີກຳລັງໃຈ ຈະກ້າວເດິນຕໍ່ໄປ.
ສິ່ງທີ່ເກີດຂຶ້ນ ອາດຈະເຮັດໃຫ້ທ່ານຈົມຢູ່ກັບຄວາມ ຮູ້ສຶກທີ່ໂຫດຮ້າຍແລະເສົ້າໂສກດົນນານ ຈົນກາຍເປັນຄວາມຊຶມເສົ້າ ຂາດກຳລັງໃຈທີ່ຈະໃຊ້ຊີວິດ ທ່ານບໍ່ຮູ້ວ່າຈະລຸກຂຶ້ນມາອີກໄດ້ຈັ່ງໃດ ບໍ່ວ່າໃຜຈະມາເວົ້າໃຫ້ກຳລັງໃຈປານໃດ ກໍບໍ່ອາດຈະຊ່ວຍທ່ານໃຫ້ດີຂຶ້ນມາເລີຍ…
ຕາມກົດຂອງຈັກກະວານ “ທຸກສິ່ງບໍ່ທ່ຽງແລະຈະປ່ຽນແປງໄປສະເໝີ” ດັ່ງນັ້ນ ໂຊກຮ້າຍກໍຈະບໍ່ຢູ່ກັບທ່ານຕະຫຼອດໄປ ໃນເມື່ອຊີວິດມີຂາລົງກໍຍ່ອມມີຂາຂຶ້ນ ບໍ່ວ່າທ່ານຈະເຊື່ອຫຼືບໍ່ ຂ່າວດີກໍຈະມາຫາທ່ານ ແລ້ວທ່ານຈະລຸກຂຶ້ນມາໄດ້ຢ່າງຢ່າງແນ່ນອນ ແຕ່ຖ້າຫາກທ່ານມີວິທີທີ່ຈະເຮັດໃຫ້ໂຕເອງ ດີຂຶ້ນໄດ້ໃນເວລາອັນສັ້ນໆ ຈະບໍ່ດີກວ່າບໍ? ຕໍ່ໄປນີ້ເປັນ 5 ວິທີທີ່ຈະຊ່ວຍທ່ານໄດ້:
1. ຍອມຮັບແລະປະເຊີນໜ້າກັບຄວາມເປັນຈິງ
ມີຄວາມທຸກຢູ່ 2 ຢ່າງ ຄື ທຸກທີ່ເຮັດໃຫ້ທ່ານເຈັບປວດ ແລະທຸກທີ່ເຮັດໃຫ້ທ່ານປ່ຽນແປງ ທ່ານຈະເຈັບປວດກໍຕໍ່ເມື່ອທ່ານຕໍ່ຕ້ານມັນ ຖ້າຫາກທ່ານຍອມຮັບແລະພ້ອມທີ່ຈະ ເດິນໄປກັບມັນ ນັ້ນຈະນຳມາເຊິ່ງການຮຽນຮູ້ ແລະປ່ຽນແປງ ສິ່ງທຳອິດທີ່ທ່ານຈະເຮັດຄື ຍອມຮັບມັນເກີດຂຶ້ນແລ້ວ ເຖິງແມ່ນວ່າທ່ານບໍ່ມັກມັນເລີຍ ການດິ້ນຮົນຕໍ່ສູ້ກັບມັນ ຫວັງວ່າມັນຈະບໍ່ເກີດຂຶ້ນ ກໍຍິ່ງຈະເສຍພະລັງງານແລະເວລາໄປລ້າໆ ການຍອມຮັບຈະເຮັດໃຫ້ທ່ານກັບມາພົບ ກັບຄວາມສະຫງົບໃນໃຈ ແລະພ້ອມທີ່ຈະເດິນໜ້າຕໍ່ໃນທິດທາງໃໝ່ໆ.
ການປ່ອຍວາງຈະງ່າຍຍິ່ງຂຶ້ນ ຖ້າທ່ານຍອມ “ໃຫ້ອະໄພ” ບໍ່ວ່າຈະເປັນກັບໂຕທ່ານເອງ ກັບໃຜບາງຄົນ ຫຼືກັບສະຖານະການທີ່ເກີດຂຶ້ນ ການໃຫ້ອະໄພ ຈະປົດປ່ອຍໂຕທ່ານອອກຈາກຄວາມຄຽດ ຄວາມກົດດັນ ຄວາມກັງວົນ ຄວາມຢຶດຕິດກັບອະດີດ ແລະອະນາຄົດທັງຫຼາຍ ມັນຈະຊ່ວຍໃຫ້ໃຈຂອງທ່ານຮູ້ສຶກເບົາສະບາຍຂຶ້ນ ເປັນອິດສະຫຼະຈາກສິ່ງທີ່ທ່ານຢຶດຖື ແລະຄາດຫວັງວ່າຈະຕ້ອງເປັນ…
2. ໂອບກອດໂຕເອງໃນຖານະມະນຸດຄົນໜຶ່ງ
ຖ້າຫາກທ່ານໝົດຄວາມໝັ້ນໃຈ ໝົດຄວາມເຊື່ອແລະສັດທາໃນຕົນເອງ ສະແດງວ່າທ່ານກຳລັງຢາກຈະເປັນ ໃຜອີກຜູ້ໜຶ່ງທີ່ບໍ່ແມ່ນທ່ານ ລອງຖາມໂຕເອງວ່າ ກຳລັງຄາດຫວັງຄວາມສົມບູນແບບ ໃນຊີວິດຢູ່ຫຼືບໍ່ ລອງເບິ່ງອະດີດທີ່ຜ່ານມາແມ໋ ທ່ານມີຄວາມສຳເລັດໃນຊີວິດເກີດຂຶ້ນ ຕັ້ງຫຼວງຫຼາຍພາຍມາກ ສິ່ງທີ່ທ່ານຕ້ອງການໃນຕອນນີ້ຄື ການໂອບກອດແລະຍອມຮັບໂຕເອງ ໃນຖານະມະນຸດທຳມະດາຄົນໜຶ່ງ.
ເຊົາປຽບທຽບກັບຊີວິດຄົນອື່ນ ຊອກໃຫ້ເຫັນຄວາມສວຍງາມໃນໂຕເອງ ເຖິງແມ່ນວ່າຈະບໍ່ເຫຼືອສິ່ງພາຍນອກໃດໆເລີຍ ກໍຕາມ ທ່ານກໍຍັງເປັນມະນຸດທີ່ສວຍງາມ ໃນແບບທີ່ທ່ານເປັນ ແລະມັນດີທີ່ສຸດແລ້ວ ທ່ານຄືຄົນທຳມະດາທີ່ສາມາດຜິດພາດໄດ້ ມີຄວາມກັງວົນເປັນບາງເທື່ອ ຢ້ານແດ່ເປັນທຳມະຊາດ ທ່ານບໍ່ຈຳເປັນຕ້ອງສົມບູບແບບ ແລະທ່ານກໍສາມາດຍອມຮັບແລະຮັກໂຕເອງໄດ້.
3. ເຕືອນໂຕເອງວ່າ ທຸກສິ່ງເປັນຂອງຊົ່ວຄາວ
ການກ້າວຂ້າມທີ່ສຳຄັນໃນຊີວິດ ເກີດຂຶ້ນເມື່ອທ່ານຄິດໄດ້ວ່າສິ່ງຊົ່ວຮ້າຍ ຕ່າງໆໃນຊີວິດ ທັງທີ່ເປັນຂໍ້ຈຳກັດ ຄວາມລົ້ມແຫຼວ ຄວາມຜິດພາດ ຄວາມສູນເສຍ ໂຊກຮ້າຍແລະຄວາມເສື່ອມຖອຍ ເປັນພຽງຂອງຊົ່ວຄາວເທົ່ານັ້ນ ແລະຫຼາຍຄັ້ງມັນຜ່ານໄປແລ້ວ ແຕ່ທ່ານຍັງເຮັດໃຫ້ມັນຄົງຢູ່ ດ້ວຍຄວາມຄິດຂອງທ່ານນັ້ນເອງ.
ຄວາມທຸກແລະຄວາມບໍ່ແນ່ນອນ ກໍເປັນຂອງຊົ່ວຄາວ ມັນບໍ່ມີທາງຈະຍາວນານໄປຕະຫຼອດການ ເວລາຈະຊ່ວຍຢຽວຢາທ່ານໄດ້ ເຖິງແມ່ນວ່າຈະຕ້ອງໃຊ້ເວລາເປັນເດືອນເປັນປີ ແຕ່ແລ້ວມັນກໍຈະຜ່ານໄປ ຊີວິດຈະໝຸນຕໍ່ໄປບໍ່ເຊົາ ດັ່ງນັ້ນ ຢ່າໃຫ້ຄວາມທຸກມາປ່ຽນໂຕທ່ານ ທີ່ແທ້ຈິງໄປ ຄົນທີ່ເຂັ້ມແຂງຄືຄົນທີ່ຮ້ອງໄຫ້ ໄດ້ຢ່າງເປີດເຜີຍ ແລ້ວກໍພ້ອມກ້າວຕໍ່ໄປເມື່ອຢາດນ້ຳຕາ ເຫືອດແຫ້ງລົງ.
4. ຊອກຫາສິ່ງທີ່ຂອບໃຈໄດ້ ໃນເວລານີ້
ການຂອບໃຈ ຄືການຢຽວຢາໂຕເອງທີ່ລຽບງ່າຍ ແລະມັນຊ່ວຍໄດ້ຢ່າງບໍ່ໜ້າເຊື່ອ ໃນພາວະທີ່ກຳລັງຈົມຢູ່ກັບ ໂຕເອງແລະຄວາມທຸກ ລອງຫາເຫດຜົນທີ່ຈະຂອບໃຈ ກັບຫຍັງໄດ້ອ້ອມໆໂຕ ເຖິງແມ່ນວ່າມັນຈະເປັນສິ່ງເລັກນ້ອຍ ແລະທຳມະດາປານໃດ ຂອບໃຈທີ່ຍັງມີລົມຫາຍໃຈ ຂອບໃຈຄວາມຮັກຈາກຄົນອ້ອມຂ້າງ ຂອບໃຈສິ່ງທີ່ທ່ານໄດ້ຮຽນຮູ້ຈາກເລື່ອງນີ້.
ຖ້າຫາກທ່ານເຊົາເບິ່ງສິ່ງທີ່ຂາດຫາຍ ແລະຫັນມາຂອບໃຈກັບສິ່ງທີ່ເຫຼືອຢູ່ ດ້ວຍຄວາມຮູ້ບຸນຄຸນ ຈະພົບວ່າຫຼາຍໆຄັ້ງ ໄດ້ເບິ່ງຂ້າມບາງຢ່າງໄປ ມັນດີຂະໜາດໃດທີ່ທ່ານໄດ້ຄົ້ນພົບ ສິ່ງທີ່ມີຄ່າເຫຼົ່ານັ້ນ ກັບຊີວິດທີ່ເຫຼືອຢູ່…
5. ຍື່ນມືອອກໄປ ຊ່ວຍໃຜຈັກຄົນ
ຄວາມທໍ້ຖອຍໃຈໃນຊີວິດ ສ່ວນຫຼາຍເກີດຂຶ້ນເພາະທ່ານຮູ້ສຶກສົມເພດໂຕເອງ ເຖິງແມ່ນມັນບໍ່ແມ່ນສິ່ງທີ່ຄວນເຮັດ ແຕ່ທ່ານກໍເຮັດຢູ່ສະໝໍ່ຳສະເໝີ ໂດຍບໍ່ຮູ້ໂຕ ຖ້າທ່ານສາມາດຈັບຄວາມຄິດໄດ້ວ່າ ເລິ່ມດູຖູກແລະຕໍ່ວ່າໂຕເອງ ໃຫ້ຢຸດສົນໃຈທີ່ໂຕເອງແລ້ວເບິ່ງໄປ ທີ່ຜູ້ຄົນອ້ອມຂ້າງໂຕເອງ ລອງຫາທາງທີ່ຈະຊ່ວຍເຫຼືອໃຜຈັກຄົນ ເຖິງແມ່ນຈະເປັນພຽງເລື່ອງເລັກໆນ້ອຍໆ ເຊື່ອບໍວ່າ ທ່ານຈະຮູ້ສຶກດີຂຶ້ນທັນທີ.
ເມື່ອໃດທີ່ທ່ານຢາກໄດ້ຮັບການໃສ່ໃຈ ໃຫ້ທ່ານໃສ່ໃຈຜູ້ອື່ນ ເບິ່ງແຍງເຂົາໃຫ້ຄືກັບທີ່ທ່ານຕ້ອງການ ດ້ວຍຈິດທີ່ເມດຕາ ແລະຫົວໃຈອ່ອນໂຍນ ຖ້າຫາກທ່ານເຮັດຈັ່ງຊີ້ ບໍ່ມີຫຍັງທີ່ຈະເຮັດໃຫ້ທ່ານ ຮູ້ສຶກບໍ່ດີກັບໂຕເອງໄດ້ອີກ ມັນຈະເຮັດໃຫ້ທ່ານລະນຶກເຖິງຄຸນຄ່າ ແຫ່ງການມີຊີວິດ ແລະເຮັດໃຫ້ທ່ານຕື່ນຂຶ້ນມາຈາກຝັນຮ້າຍ ທີ່ຂັງທ່ານໄວ້ໃນຈິດໃຈ ອັນໂດດດ່ຽວຂອງໂຕເອງ.
………………………………
ຖ້າຫາກທ່ານເປັນຄົນໜຶ່ງທີ່ກຳລັງ ທໍ້ໃຈໝົດຫວັງໃນຊີວິດ ຂໍໃຫ້ຮູ້ວ່າ ທ່ານບໍ່ໄດ້ປະເຊີນກັບມັນພຽງ ລຳພັງຜູ້ດຽວ, ຄົນອ້ອມໂຕທີ່ເຂົາຮັກທ່ານ ຕ່າງຮູ້ສຶກແລະໄດ້ຮັບຜົນກະທົບ ກັບຄວາມເສົ້າຈາກທ່ານຢູ່ເຊັ່ນກັນ ຍິ່ງທ່ານທຳຮ້າຍໂຕເອງ ກໍຈະຍິ່ງເຮັດໃຫ້ພວກເຂົາເຈັບປວດໄປນຳ.
ຖ້ານັ້ນ ບໍ່ແມ່ນສິ່ງທີ່ທ່ານຕ້ອງການ ລອງໃຊ້ຫຼັກການ 5 ຂໍ້ນີ້ ນຳພາໂຕເອງ ໃຫ້ຟື້ນຄືນຂຶ້ນມາຈາກຝັນຮ້າຍ ນັ້ນເທົ່າກັບວ່າ ທ່ານກຳລັງຊ່ວຍໃຫ້ຊີວິດທ່ານ ແລະພວກເຂົາດີຂຶ້ນໃນເວລາດຽວກັນ.
ບົດຄວາມໂດຍ “ເຮືອຮົບ” ຜູ້ຂຽນໜັງສື “Happiness Recipe: 10 ສູດປະສົມຄວາມສຸກ”
ທ່ານໃດແຊເລື່ອງນີ້ຕໍ່ໃຫ້ຜູ້ອື່ນ ທ່ານຈະເປັນຄົນໃຫ້ທຳມະແກ່ເຂົາ ແລະໄດ້ບຸນຫຼາຍ