ພິທີມອບ-ຮັບໜ້າທີ່ລະຫວ່າງຜູ້ຮັກສາການຫົວໜ້າຫ້ອງວ່າການ ປົກຄອງນະຄອນຫຼວງວຽງຈັນ ແລະ ຫົວໜ້າຫ້ອງວ່າການປົກຄອງນະຄອນຫຼວງວຽງຈັນ ໄດ້ຈັດຂຶ້ນໃນທ້າຍອາທິດຜ່ານມາ ຢູ່ຫ້ອງວ່າການປົກຄອງນະຄອນຫຼວງວຽງຈັນ ໂດຍການເຂົ້າຮ່ວມ ແລະ ເປັນສັກຂີພິຍານຂອງທ່ານ ສົມວັນດີ ນາຖາວົງ ຮອງເຈົ້າຄອງນະຄອນຫຼວງ ພ້ອມດ້ວຍບັນດາຫົວໜ້າພະແນກການອ້ອມຂ້າງນະຄອນຫຼວງ.
ສຳລັບການມອບ-ຮັບໜ້າທີ່ໃໝ່ຄັ້ງນີ້ ແມ່ນເພື່ອປະຕິບັດຕາມຄຳສັ່ງວ່າດ້ວຍການໂຍກຍ້າຍ ພະນັກງານຮັບໜ້າທີ່ໃໝ່ຂອງນາຍົກລັດຖະມົນຕີ ຂໍ້ຕົກລົງວ່າດ້ວຍການໂຍກຍ້າຍພະນັກງານ-ລັດຖະກອນ ໄປປະກອບສ່ວນວຽກງານໃໝ່ຢູ່ຫ້ອງວ່າການປົກຄອງ ນະຄອນຫຼວງວຽງຈັນຂອງລັດຖະມົນຕີ ຫົວໜ້າຫ້ອງວ່າການລັດຖະບານ ແລະ ຂໍ້ຕົກລົງຂອງເຈົ້າຄອງນະຄອນຫຼວງວຽງຈັນ ວ່າດ້ວຍການຮັບເອົາ ແລະ ແຕ່ງຕັ້ງພະນັກງານ ໂດຍເຫັນດີຕົກລົງຍົກຍ້າຍທ່ານ ພູວົງ ວົງຄຳຊາວ ຫົວໜ້າກົມເລຂາຫ້ອງວ່າການລັດຖະບານ ມາປະກອບສ່ວນວຽກງານໃໝ່ ຢູ່ຫ້ອງວ່າການປົກຄອງນະຄອນຫຼວງວຽງຈັນ ສ່ວນທ່ານ ທອງທິບ ສີວິໄຊ ຮັກສາການຫົວໜ້າຫ້ອງວ່າການປົກຄອງນະຄອນຫຼວງວຽງຈັນ ໄປເປັນຮອງຫົວໜ້າດ່ານສາກົນຂົວມິດຕະພາບ ລາວ-ໄທ 1 ການຍົກຍ້າຍໜ້າທີ່ຄັ້ງນີ້ ເພື່ອປະຕິບັດຕາມຄວາມຮຽກຮ້ອງຕ້ອງການຂອງວຽກງານໃນປັດຈຸບັນ ໃຫ້ມີຄວາມໜັກແໜ້ນ ແລະ ຄົບຊຸດກວ່າເກົ່າ.
ແຫລ່ງຂ່າວ: ວຽງຈັນໃໝ່