ທ່ານ ຈອນ ແຄຣີ ລັດຖະມົນຕີການຕ່າງປະເທດສະຫະລັດອາເມຣິກາ ໄດ້ຖະແຫລງໃນນາມສະຫະລັດອາເມຣິກາ ອວຍພອນປີໃໝ່ລາວ ເຊິ່ງມີເນື້ອໃນດັ່ງນີ້:
” ເນື່ອງໃນໂອກາດບຸນປີໃໝ່ລາວ ພສ 2558 ໃນນາມປະທານາທິບໍດີ ບາຣັກ ໂອບາມາ ແລະ ປະຊາຊົນອາເມຣິກາ ຂ້າພະເຈົ້າຂໍຖືເປັນກຽດອວຍພອນໄຊອັນປະເສີດ ມາຍັງປະຊາຊົນຊາວລາວທຸກທົ່ວໜ້າ ຈົ່ງມີແຕ່ຄວາມສຸກກາຍສະບາຍໃຈ ແລະ ຄວາມຈະເລີນສີວິໄລ ເຊິ່ງວັນເລີ່ມຕົ້ນປີໃໝ່ແມ່ນວັນສະເຫຼີມສະຫຼອງ ຄວາມສຳເລັດທຸກສິ່ງທຸກຢ່າງທີ່ພວກເຮົາໄດ້ດຳເນີນຮ່ວມກັນມາ ແລະ ມີຄວາມມຸ້ງຫວັງທີ່ຈະເຮັດທຸກຢ່າງຮ່ວມກັນໃນອະນາຄົດ ຂ້າພະເຈົ້າຖືວ່າສະຫະລັດອາເມຣິກາ ໄດ້ມີໂອກາດດຳເນີນວຽກງານຮ່ວມກັບລັດຖະບານລາວ ໃນການເປັນປະທານຈັດກອງປະຊຸມເພື່ອແມ່ນ້ຳຂອງ ຢູ່ທີ່ເມືອງປາກເຊ ແຂວງຈຳປາສັກ ໃນເດືອນກຸມພາທີ່ຜ່ານມານີ້ ແລະ ປີໜ້ານີ້ກໍ່ເປັນປີສຳຄັນເຊັ່ນດຽວກັນ ສຳລັບປະເທດລາວ ແລະ ຂ້າພະເຈົ້າກໍ່ຫວັງວ່າ ສິ່ງດັ່ງກ່າວຈະນຳເອົາຄວາມສຸກມາສູ່ຊາວລາວຢູ່ທົ່ວທຸກມຸມໂລກ.
ສະຫະລັດອາເມຣິກາ ຕີລາຄາສູງຕໍ່ມິດຕະພາບອັນສຳຄັນກັບປະເທດລາວ ຂໍໃຫ້ປີໃໝ່ລາວນີ້ ນຳພວກເຮົາໄປສູ່ມິດຕະພາບທີ່ມີຄວາມໃກ້ຊິດກັນຫຼາຍຂຶ້ນກວ່າເກົ່າ. ”
ແຫລ່ງຂ່າວ: ວຽງຈັນໃໝ່