ຕັບເປັນອະໄວຍະວະສຳຄັນໃນການປ່ຽນແປງສານອາຫານ,ສານເຄມີ,ຢາແລະສານຕ່າງໆທີ່ເຂົ້າສູ່ຮ່າງກາຍແລະຍັງມີຫນ້າທີ່ສຳຄັນໃນການຜະລິດນ້ຳບີເພື່ອໃຊ້ໃນການຍ່ອຍໄຂມັນດັ່ງນັ້ນຜູ້ປ່ວຍທີ່ເປັນມະເຮັງຕັບຈຶ່ງຕ້ອງເບິ່ງແຍງຕົນເອງເປັນພິເສດໂດຍສະເພາະເລື່ອງອາຫານ
ສານອາຫານຊະນິດທີ່1ຄືໄຂມັນ
ຜູ້ປ່ວຍຄວນລະວັງການບໍລິໂພກໄຂມັນເປັນພິເສດເພາະເມື່ອມະເຮັງເກີດຂຶ້ນທີ່ຕັບເຮັດໃຫ້ການສ້າງນ້ຳບີອາດຈະມີໜ້ອຍລົງຖ້າກິນໄຂມັນໃນປະລິມານສູງເຂົ້າໄປໄຂມັນຈະຍ່ອຍຍາກຫລືບໍ່ສາມາດຍ່ອຍໄດ້ເຮັດໃຫ້ເກີດພາວະຖ່າຍເປັນໄຂມັນ(steatorrhea)ແໜ້ນທ້ອງ,ທ້ອງອືດ,ຈາກການທີ່ມີໄຂມັນຄ້າງຈຸລິນຊີໃນລຳໄສ້ຈະປ່ຽນໄຂມັນເປັນກາສເຮັດໃຫ້ເກີດກາສໃນທາງເດີນອາຫານຈຶ່ງເປັນສາເຫດຂອງອາການທ້ອງອືດ,ແໜ້ນທ້ອງໃນບາງກໍລະນີແພດແລະນັກກຳນົດອາຫານມັກຈະກຳນົດໄຂມັນສາຍປານກາງຫລື MCT (medium chain triglyceride)ໃຫ້ຜູ້ປ່ວຍທົດແທນໄຂມັນປົກກະຕິເພາະໄຂມັນຊະນິດນີ້ ຮ່າງກາຍສາມາດນຳໄປໃຊ້ໄດ້ເລີຍໂດຍບໍ່ຕ້ອງຜ່ານການປ່ຽນແປງທີ່ຕັບກ່ອນໂດຍແພດຫລືນັກກຳນົດອາຫານຈະເປັນຜູ້ສັ່ງໃຫ້ກິນໃນຮູບແບບອາຫານທາງການແພດ
ສານອາຫານຊະນິດທີ່2ຄືໂປຕີນ
ໃນຜູ້ປ່ວຍມະເຮັງຕັບຖ້າມີອາການບວມນ້ຳທີ່ມີສາເຫດມາຈາກການມີໂປຕີນອັນບູມິນ (albumin)ຕ່ຳຄວນໄດ້ຮັບການເສີມອາຫານປະເພດໂປຕີນໂດຍສະພາະໄຂ່ລວກທີ່ເອົາສະເພາະສ່ວນໄຂ່ຂາວມາໃຊ້ເພາະໃນໄຂ່ຂາວຈະມີໂປຕີນ,ອັນບູມິນ,ຢູ່ສູງຄຸນສົມບັດຂອງໂປຕີນນີ້ຄືຊ່ວຍອຸ້ມນ້ຳດັ່ງນັ້ນຈຶ່ງສາມາດເຮັດໃຫ້ອາການບວມນ້ຳທີ່ເກີດຂື້ນມີອາການດີຂຶ້ນໄດ້ຈຶ່ງອາດກິນໄຂ່ຂາວລວກມື້ລະ2ໜ່ວຍເພື່ອເພີ່ມອັນບູມິນແກ່ຮ່າງກາຍຖ້າໃນບາງກໍລະນີຜູ້ປ່ວຍມີພາວະHepatic encephalopathyຮ່ວມດ້ວຍຄືມີອາການທາງລະບົບປະສາດທີ່ເປັນສາເຫດມາຈາກຕັບໄດ້ແກ່ມຶນງົງການຄວບຄຸມຕົນເອງຜິດປົກກະຕິອາດເຖິງຂັ້ນເກືອບໄດ້ການກິນໂປຕີນຈະໄດ້ຮັບໃນປະລິມານຫລາຍບໍ່ໄດ້ຄວນຕ້ອງໄດ້ຮັບການເບິ່ງແຍງແລະຄວບຄຸມເປັນພິເສດໂດຍສະເພາະໂປຕີນທີ່ປະກອບໄປດ້ວຍກົດອະມິໂນ ຊະນິດວົງແຫວນໄດ້ແກ່ phenylalanine ຊຶ່ງພົບຫລາຍໃນຊີ້ນສັດເປັນຕົ້ນດັ່ງນັ້ນຊີ້ນສັດຫລືອາຫານທີ່ເປັນແຫລ່ງຂອງໂປຕີນອື່ນທີ່ໄດ້ຮັບຕ້ອງໃຫ້ຄວາມລະມັດລະວັງເປັນພິເສດຢູ່ພາຍໃຕ້ການຄວບຄຸມເບິ່ງແຍງຂອງນັກກຳນົດອາຫານຢ່າງໃກ້ຊິດເພາະຖ້າໄດ້ຮັບສານອາຫານໂປຕີນບໍ່ຖືກຕ້ອງອາດເປັນອັນຕະລາຍເຖິງຊີວິດໄດ້ແຕ່ຢ່າງໃດກໍຕາມບໍ່ແມ່ນວ່າຜູ້ເປັນມະເຮັງຕັບຈະມີອາການດັ່ງກ່າວທຸກຄົນຜູ້ປ່ວຍຈຶ່ງຄວນປຶກສາແພດເພື່ອໄດ້ຮັບຄຳວິນິໄສທີ່ຖືກຕ້ອງເພື່ອການເບິ່ງແຍງຕົນເອງທີ່ຖືກຕ້ອງ
ສານອາຫານຊະນິດທີ່3ຄື ຄາໂບໄຮເດດ
ສານອາຫານຊະນິດນີ້ສາມາດກິນໄດ້ຕາມປົກກະຕິຫລືອາດຈະເພີ່ມໄດ້ນຳໃນຜູ້ປ່ວຍທີ່ບໍ່ເປັນພະຍາດເບົາຫວານຫລືມີພາວະດື້ຕໍ່ອິນສຸລິນແຊກຊ້ອນແຕ່ຄວນເປັນຄາລໂບໄຮເດດທີ່ຍ່ອຍງ່າຍບໍ່ຄວນບໍລິໂພກທັນຍະພືດໃນປະລິມານທີ່ຫລາຍເກີນໄປເພາະອາດສົ່ງຜົນໃຫ້ລະບົບທາງເດີນອາຫານເຮັດວຽກຫລາຍຂຶ້ນແລະເກີດອາການແໜ້ນທ້ອງຫລາຍຂຶ້ນໄດ້
ການກິນອາຫານໂດຍທົ່ວໄປຂອງຜູ້ປ່ວຍມະເຮັງຕັບພົບວ່າບາງເທື່ອອາດມີການຍ່ອຍອາຫານຍາກເຮັດໃຫ້ບໍ່ສາມາດກິນອາຫານໃນປະລິມານເທົ່າກັບຄົນປົກກະຕິທົ່ວໄປໄດ້ ເນື່ອງຈາກອາດເກີດພາວະແນ້ນທ້ອງ,ທ້ອງອືດໄດ້ງ່າຍດັ່ງນັ້ນໃນການກຳນົດອາຫານໃຫ້ຜູ້ປ່ວຍຖ້າພົບອາການດັ່ງກ່າວຄວນກະຈາຍອາຫານຈາກປົກກະຕິ3ຄາບເປັນ5-6ຄາບ ເຊັ່ນຈາກແຕ່ກ່ອນກິນອາຫານ3ຄາບເຊົ້າ,ສວາຍ,ແລງ ກໍເພີ່ມເປັນເຊົ້າ,ວ່າງເຊົ້າ,ສວາຍ ວ່າງສວາຍ,ແລງ,ກ່ອນນອນໂດຍໃນສ່ວນຂອງຄາລໂບໄຮເດດປະເພດເຂົ້າຖ້າໄດ້ຮັບໃນປະລິມານທີ່ຫລາຍບໍ່ໄດ້ອາດຈະໃຫ້ຜູ້ປ່ວຍໄດ້ຮັບໃນຮູບແບບຂອງນ້ຳຫວານເພີ່ມເພື່ອທີ່ຈະປ້ອງກັນການເກີດພາວະທຸບໂພສະນາການເຮັດໃຫ້ນ້ຳໜັກໂຕຫລຸດລົງຢ່າງວ່ອງໄວ ຮ່າງກາຍດຶງໂປຕີນມາໃຊ້ເຮັດໃຫ້ກ້າມຊີ້ນອ່ອນແຮງຊຶ່ງຖ້າເກີດພາວະດັ່ງກ່າວຈະເຮັດໃຫ້ຜູ້ປ່ວຍເກີດພາວະສ່ຽງຕໍ່ການຕິດເຊື້ອໄດ້ງ່າຍເຮັດໃຫ້ມີໂອກາດເກີດພະຍາດແຊກຊ້ອນໄດ້ສູງ
ຜູ້ປ່ວຍມະເຮັງຕັບຄວນໄດ້ຮັບການເບິ່ງແຍງຢ່າງໃກ້ຊິດແລະໃຫ້ພໍພຽງກັບຄວາມຕ້ອງການຂອງຮ່າງກາຍປາສະຈາກສິ່ງປົນເປື້ອນເພາະຖ້າໄດ້ຮັບສິ່ງປົນເປື້ອນຈະເຮັດໃຫ້ຕັບຕ້ອງເຮັດວຽກໃນການກຳຈັດສານພິດຫລາຍຂຶ້ນທີ່ສຳຄັນຜູ້ປ່ວຍມະເຮັງຕັບຈະມີການປ່ຽນແປງຂອງສະພາວະຮ່າງກາຍເກີດຂຶ້ນໄດ້ເລື້ອຍດັ່ງນັ້ນຄວນໄດ້ຮັບການເບິ່ງແຍງຈາກແພດຢ່າງໃກ້ຊິດແລະໄດ້ຮັບຄຳແນະນຳທາງໂພສະນາການຈາກນັກກຳນົດອາຫານເພື່ອການເບິ່ງແຍງຕົນເອງທີ່ຖືກຕ້ອງ