ກຸ່ມລັດອິດສະລາມ ບຸກກວາດຍິງໂຈມຕີໜ້າສະຖານທູດເກົາຫລີໃຕ້ ໃນເມືອງຫລວງປະເທດລິເບຍ ເຮັດໃຫ້ຕຳຫລວດປ້ອງກັນເສຍຊີວິດ 2 ຄົນ.
ສຳນັກຂ່າວຕ່າງປະເທດ ລາຍງານໃນວັນທີ 12 ເມສາຜ່ານມານີ້ວ່າ ເກີດເຫດກຸ່ມມືປືນໃຊ້ປືນກົນ ກວາດຍິງກ່ວາ 40 ນັດ ໂຈມຕີປ້ອມຮັກສາຄວາມປອດໄພ ຂອງສະຖານທູດເກົາຫລີໃຕ້ ໃນນະຄອນຫລວງຕິໂປລີ ເມືອງຫລວງຂອງປະເທດລິເບຍ ເມື່ອຕອນເຊົ້າຂອງມື້ວັນອາທິດ (12 ເມສາ) ທີ່ຜ່ານມາ ສົ່ງຜົນເຮັດໃຫ້ເຈົ້າໜ້າທີ່ຕຳຫລວດເສຍຊີວິດ 2 ຄົນ ແລະ ບາດເຈັບອີກ 1 ຄົນ.
ກະຊວງການຕ່າງປະເທດເກົາຫລີໃຕ້ ໄດ້ລະບຸໃນຖະແຫລງການຂອງຕົນວ່າ ກຸ່ມມືປືນໄດ້ກວາດຍິງຈາກລົດຍົນຄັນໜຶ່ງ ແຕ່ບໍ່ມີເຈົ້າໜ້າທີ່ຊາວເກົາຫລີໃຕ້ໄດ້ຮັບບາດເຈັບໃນເຫດການດັ່ງກ່າວ ໂດຍປັດຈຸບັນຕຳຫລວດໃນທ້ອງຖິ່ນ ແມ່ນໄດ້ເພີ່ມການຄຸ້ມກັນອ້ອມຮອບບໍລິເວນສະຖານທູດແລ້ວ ໂດຍຫລັງເກີດເຫດປະມານ 2 ຊົ່ວໂມງ ກຸ່ມຕິດອາວຸດກຸ່ມໜຶ່ງ ເຊິ່ງອ້າງຕົນວ່າເປັນແນວຮ່ວມຂອງກຸ່ມລັດອິດສະລາມ ຫລື IS ໃນນະຄອນຫລວງຕິໂປລີ ໄດ້ເຜີຍແຜ່ຂໍ້ຄວາມຜ່ານທາງເວັບໄຊທະວິດເຕີ້ວ່າ ເປັນຜູ້ຢູ່ເບື້ອງຫລັງຂອງການກໍ່ເຫດໂຈມຕີຄັ້ງນີ້.