ແຂວງຄຳມ່ວນແດນສີໂຄດຕະບອງ ທີ່ມີທ່າແຮງເປັນແຂວງທາງຜ່ານຂອງບັນດາແຂວງ ແລະ ພາກພື້ນພວມເລ່ງສ້າງເງື່ອນໄຂດຶງດູດການມາຢ້ຽມຢາມຂອງແຂກໃຫ້ໄດ້ ແວ່ພັກແຮມໃຊ້ຈ່າຍນັບມື້ຫຼາຍຂຶ້ນດ້ວຍການພັດທະນາພື້ນຖານໂຄງ ລ່າງສະຖານທີ່ທ່ອງທ່ຽວຮອງຮັບ ນັກເດີນທາງໄດ້ແວ່ຢາມ ໂດຍຮອດຂະນະນີ້ໄດ້ສຳຫຼວດ ແລະ ຂຶ້ນບັນຊີແລ້ວ ທັງໝົດເກືອບ 200 ແຫ່ງ.
ຕາມຂໍ້ມູນເປີດເຜີຍໃນກອງປະຊຸມໂຄງການພັດທະນາໂຄງລ່າງພື້ນຖານ ສ້າງຕັ້ງເຄື່ອຂ່າຍສົ່ງເສີມ ແລະ ຄຸ້ມຄອງຈຸດ ໝາຍປາຍທາງການທ່ອງທ່ຽວຂອງແຂວງຄຳມ່ວນຮູ້ວ່າ: ທຸກວັນນີ້ ການທ່ອງທ່ຽວຖືເປັນຂະແໜງບຸລິມະສິດໜຶ່ງທີ່ພາກລັດພວມເນັ້ນໃສ່ ສົ່ງເສີມໃຫ້ມີການພັດທະນາໃນທຸກໆດ້ານນັບແຕ່ພື້ນຖານໂຄງລ່າງ, ການໂຄສະນາ, ຕະຫຼອດຮອດການບໍລິການເພາະສາມາດກະຈາຍລາຍໄດ້ໃນວົງກວ້າງສຳຄັນ ຄືປະຊາຊົນ ໃນຂະນະທີ່ຄຳມ່ວນແມ່ນແຂວງ ທາງຜ່ານໄປຍັງບັນດາແຂວງທາງພາກໃຕ້ ແລະ ຂຶ້ນສູ່ພາກເໜືອອີກທັງຍັງມີເສັ້ນທາງອອກສູ່ ສສ ຫວຽດນາມ ແລະ ປະເທດໄທນຳ.
ຈາກຈຸດດັ່ງກ່າວຂະນະນີ້ ທາງແຂວງຈິ່ງພະຍາຍາມຂຸດຄົ້ນທ່າແຮງທີ່ມີພາຍໃນປະເທດອອກມາ ຊົມໃຊ້ໃຫ້ເກີດຜົນປະໂຫຍດສູງສຸດ ໂດຍມາຮອດປະຈຸບັນທົ່ວແຂວງມີແຫຼ່ງທ່ອງທ່ຽວທີ່ໄດ້ສຳຫຼວດ ແລະ ຂຶ້ນບັນຊີແລ້ວທັງໝົດ 198 ແຫ່ງ, ຈຳນວນໜຶ່ງແມ່ນໄດ້ເປີດບໍລິການນັກທ່ອງທ່ຽວແລ້ວ ແລະ ອີກສ່ວນໜຶ່ງພວມຢູ່ໃນໄລຍະພັດທະນາເພື່ອຮອງຮັບນັກທ່ອງທ່ຽວທັງ ພາຍໃນ ແລະ ຕ່າງປະເທດທີ່ນັບມື້ມີຈຳນວນເພີ່ມຂຶ້ນ.
ທ່ານ ແສງທອງ ພະຄຸນທອງ ໄດ້ກ່າວ ໂຄງລ່າງພື້ນຖານສ້າງຕັ້ງເຄື່ອຂ່າຍສົ່ງເສີມ ແລະ ຄຸ້ມຄອງຈຸດໝາຍປາຍ
ທາງການທ່ອງທ່ຽວໄດ້ຄັດເລືອກ ແລະ ຈັດສັນທຶນຮອນ ໂດຍສະເພາະແມ່ນແຫຼ່ງທຶນຈາກທະນາຄານພັດທະນາອາຊີໃຫ້ແກ່ແຂວງຄຳ ມ່ວນ, ເພື່ອພັດທະນາແຫຼ່ງທ່ອງທ່ຽວໃຫ້ມີຄວາມຫຼາກຫຼາຍທາງດ້ານທຳມະຊາດ, ປະຫວັດສາດ ແລະ ວັດທະນະທຳທີ່ອຳນວຍໃຫ້ແກ່ການທ່ອງທ່ຽວໃນນີ້ມີປ່າສະຫງວນແຫ່ງ ຊາດ 3 ແຫ່ງ ທີ່ເປັນແຫຼ່ງກຳເນີດສາຍນ້ຳລຳທານ ແລະ ແຫຼ່ງທ່ອງທ່ຽວປະເພດຕ່າງໆຄື: ປ່າສະຫງວນແຫ່ງຊາດພູຫີນປູນ ເປັນແຫຼ່ງກຳເນີດຂອງສາຍນ້ຳເທີນທີ່ໄຫຼລອດພູຫີນປູນ ພາໃຫ້ເກີດມີຖ້ຳກອງລໍ-ນາຕານທີ່ມີຄວາມຍາວ 7.500 ແມັດ, ປ່າສະຫງວນແຫ່ງຊາດນາກາຍ-ນ້ຳເທີນເປັນແຫຼງກຳເນີດສາຍນ້ຳເທີນ, ນ້ຳອອນ, ນ້ຳມອນ, ນ້ຳນ້ອຍ, ນ້ຳໂຊດ ລວມເຂົ້າກັນເມື່ອຖືກຕັນກໍເປັນອ່າງນ້ຳເທີນ 2 ເປັນແຫຼ່ງຜະລິດພະລັງງານໄຟຟ້ານ້ຳຕົກທີ່ມີຂະໜາດໃຫຍ່ທີ່ສຸດຢູ່ ໃນປະເທດລາວ ບັນດາຍອດນ້ຳເຫຼົ່ານີ້ລ້ວນແຕ່ມີຊີວະນາໆພັນເຊັ່ນ: ນ້ຳຕົກຕາດ, ແກ້ງຫີນທີ່ອຳນວຍໃຫ້ແກ່ການສ້າງຜະລິດຕະພັນທ່ອງທ່ຽວທີ່ ເປັນຄວາມຕ້ອງການຂອງຕະຫຼາດ ແລະ ປ່າສະຫງວນແຫ່ງຊາດຫີນໜາມໜໍ່ກໍເປັນແຫຼ່ງກຳເນີດຂອງສາຍນ້ຳເຊ ບັ້ງໄຟທີ່ໄຫຼລອດຊອດຜ່ານອອກ ເອີ້ນວ່າ: ຖ້ຳນ້ຳລອດຍອດເຊບັ້ງໄຟທີ່ມີ ລວງຍາວປະມານ 12.000 ແມັດ.
ທ່ານກ່າວວ່າ: ຈຸດປະສົງຂອງໂຄງການແມ່ນເພື່ອພັດທະນາໂຄງລ່າງພື້ນຖານ ແລະ ສິ່ງທີ່ອຳນວຍຄວາມສະດວກຕິດພັນກັບການທ່ອງທ່ຽວໃນບັນດາແຂວງເປົ້າ ໝາຍ ເພື່ອໃຫ້ກາຍເປັນຈຸດໝາຍປາຍ ທາງການທ່ອງທ່ຽວທີ່ໂດດເດັ່ນເພື່ອເພີ່ມລາຍຮັບຈາກການທ່ອງທ່ຽວ ແລະ ສ້າງວຽກເຮັດງານທຳໃຫ້ແກ່ປະຊາຊົນເຂດທ້ອງຖິ່ນ.
ໂດຍກິດຈະກຳຫຼັກຂອງໂຄງການນີ້ ປະກອບມີ 4 ພາກໃຫຍ່ຄື: ພາກທີ I ປັບປຸງສິ່ງອຳນວຍຄວາມສະດວກເພື່ອສົ່ງເສີມການທ່ອງທ່ຽວ, ພາກທີ II ແມ່ນການປັບປຸງສິ່ງອຳນວຍຄວາມສະດວກ ແລະ ສະພາບການບໍລິການລູກຄ້າທີ່ດີໃນຈຸດເຊື່ອມຕໍ່ການທ່ອງທ່ຽວພາກ ພື້ນ, ພາກທີ III ແມ່ນການສ້າງຄວາມເຂັ້ມແຂງໃຫ້ແກ່ເຄື່ອຂ່າຍພັດທະນາສົ່ງເສີມ ແລະ ຄຸ້ມຄອງຈຸດໝາຍປາຍທາງຂອງການທ່ອງທ່ຽວ ແລະ ພາກສຸດທ້າຍແມ່ນການສະໜັບສະໜູນການຈັດຕັ້ງປະຕິບັດໂຄງການໃຫ້ ມີປະສິດທິພາບ ແລະ ມີຄວາມຍືນຍົງ.
ໂດຍສະເພາະແຜນການຈັດຕັ້ງປະຕິບັດຂອງໂຄງການພັດທະນາໂຄງ ລ່າງພື້ນຖານເພື່ອສົ່ງເສີມການທ່ອງທ່ຽວຢູ່ ແຂວງຄຳມ່ວນ ປະກອບມີກິດຈະກຳການປັບປຸງເສັ້ນທາງເຂົ້າບ້ານຖ້ຳໄປຫາຖ້ຳຊ້າງໃນ ໄລຍະ 4 ກິໂລແມັດ, ປັບປຸງ ຂົວເກົ່າທີ່ຢູ່ຕາມເສັ້ນທາງ, ສ້າງຂົວຂ້າມແມ່ນ້ຳໄປຫາຖ້ຳເພື່ອສາມາດທຽວໄປມາໄດ້ໃນລະດູຝົນ, ປັບປຸງເສັ້ນທາງຈາກບ້ານຖ້ຳໄປຫາບ້ານຊຽງແຫວນ ແລະ ເສັ້ນທາງສຳຮອງໄປຍັງຂົວຍ່າງ, ສ້າງບ່ອນຈອດລົດຢູ່ໃກ້ບ່ອນເຂົ້າຖ້ຳ, ສ້າງສູນຂໍ້ມູນຂ່າວສານການທ່ອງທ່ຽວ, ບ່ອນຂາຍປີ້ ແລະ ສະຖານທີ່ຂາຍຜະລິດຕະພັນທ້ອງຖິ່ນ.
ສ້າງຫ້ອງນ້ຳສາທາລະນະຢູ່ບໍລິເວນໃກ້ຖ້ຳຊ້າງ, ສ້າງຂັ້ນໄດຍ່າງຂຶ້ນຖ້ຳຊ້າງ, ທາງຍ່າງຢູ່ບໍລິເວນຖ້ຳເພື່ອຮັບປະກັນຄວາມປອດໄພໃຫ້ແກ່ນັກທ່ອງ ທ່ຽວ, ການພັດທະນາສິ່ງອຳນວຍຄວາມສະດວກ ແລະ ສະພາບການບໍລິການໃນເຂດຈຸດເຊື່ອມຕໍ່ການທ່ອງທ່ຽວພາກພື້ນ, ການປັບປຸງສິ່ງອຳນວຍຄວາມສະດວກ ແລະ ສະພາບການບໍລິການຢູ່ບໍລິເວນເດີ່ນພະທາດສີໂຄດຕະບອງ, ສ້າງສະຖານທີ່ຈອດລົດບໍລິເວນພະທາດສີໂຄດຕະບອງ, ສ້າງຈຸດກວດລົດເພື່ອຄວບຄຸມການຈະລາຈອນຢູ່ເສັ້ນທາງຫຼວງເລກທີ 11, ປັບປຸງເສັ້ນທາງນ້ອຍຢູ່ພາຍໃນເດີ່ນພະທາດ, ປັບປຸງພື້ນທີ່ເປັນສວນສາທາລະນະ, ຕິດ ຕັ້ງລະບົບການຄຸ້ມຄອງຂີ້ເຫຍື້ອ, ຄອງລະບາຍນ້ຳເປື້ອນ, ຕິດຕັ້ງປ້າຍຊີ້ບອກ, ກະ ດານຂໍ້ມູນຂ່າວສານຢູ່ຈຸດສຳຄັນຕ່າງໆ.
ໂຄງການຍ່ອຍນີ້ຈະຊ່ວຍປັບປຸງສະພາບການບໍລິການຢູ່ເຂດຈຸດໝາຍ ປາຍທາງການທ່ອງທ່ຽວຢູ່ທີ່ເມືອງທ່າແຂກ ຊຶ່ງປະຈຸບັນໄດ້ມີຂົວມິດຕະພາບແຫ່ງທີ 3 ເຊື່ອມຕໍ່ລະຫວ່າງເມືອງທ່າແຂກ ແຂວງຄຳມ່ວນ-ນະຄອນພະນົມ (ປະເທດໄທ) ຊຶ່ງຈະຊ່ວຍສະໜັບສະໜູນ, ສົ່ງເສີມໃຫ້ນັກທ່ອງທ່ຽວ ແລະ ປະຊາຊົນເຂດທ້ອງຖິ່ນມີວິຖີການດຳລົງຊີວິດທີ່ດີຂຶ້ນ.
ກອງປະຊຸມໄດ້ຈັດຂຶ້ນໃນວັນທີ 23 ກຸມພາ 2015 ທີ່ແຂວງຄຳມ່ວນ ໂດຍການເປັນກຽດເຂົ້າຮ່ວມຂອງ ທ່ານ ແສງ ທອງ ພະຄຸນທອງ ປະທານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 12, ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງຄຳມ່ວນ, ຄະນະຮັບຜິດຊອບຈັດຕັ້ງປະຕິບັດໂຄງການຂັ້ນແຂວງ, ທ່ານ ສູນມະນີວົງ ຫົວໜ້າກົມພັດທະນາການທ່ອງທ່ຽວ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ມີບັນດາຕາງໜ້າຈາກອຳນາດການປົກຄອງເມືອງ 4 ຕົວເມືອງຄື: ເມືອງຄູນຄຳ, ເມືອງນາກາຍ, ເມືອງຫີນ ບູນ, ເມືອງທ່າແຂກ, ພະນັກງານວິຊາການທີ່ກ່ຽວຂ້ອງຊ່ຽວຊານທັງພາຍໃນ ແລະ ຕ່າງປະເທດປະຈຳໂຄງການ, ເຂົ້າຮ່ວມ.
ແຫລ່ງຂ່າວ: ເສດຖະກິດ – ສັງຄົມ