ດ້ວຍຄວາມເປັນຫ່ວງເປັນໄຍ ແລະ ສະແດງຄວາມເຫັນອົກເຫັນໃຈ ຕໍ່ປະຊາຊົນຜູ້ທີ່ຖືກຜົນກະທົບຈາກພະຍຸລະດູຮ້ອນ ໃນວັນທີ 18 ກຸມພາ 2015 ທີ່ຜ່ານມາ ເຊິ່ງເຫດການດັ່ງກ່າວນີ້ແມ່ນເກີດຈາກໄພທຳມະຊາດ ບໍ່ມີຜູ້ໃດປາຖະໜາທີ່ຈະໃຫ້ເກີດຂຶ້ນຄືແນວນັ້ນ ຜົນເສຍຫາຍປະກອບມີ 24 ບ້ານ ໃນນັ້ນ ຍັງ 2 ບ້ານ ບໍ່ໄດ້ເກັບຂໍ້ມູນລະອຽດເທື່ອ ມີພົນລະເມືອງ 2.988 ຄົນ ຍິງ 1.524 ຄົນ ມີ 2.348 ຫຼັງຄາເຮືອນນີ້ ແມ່ນລາຍງານຂອງວັນທີ 20 ກຸມພາ 2015 ແລະ ຈະລາຍງານໃຫ້ຊາບໃນຕໍ່ໜ້າທີ່ສຳຄັນ ເຮັດໃຫ້ພື້ນຖານໂຄງລ່າງບ້ານ ໄດ້ຮັບຄວາມເສຍຫາຍ ເປັນຕົ້ນແມ່ນ ໄຟຟ້າ ໂຮງຮຽນ ສຸກສາລາ ເຮືອນຊານບ້ານຊ່ອງ ໂຮງຈັກ ໂຮງງານ ບໍລິສັດ ຟາມສັດລ້ຽງ ຜົນລະປູກການຜະລິດອື່ນໆ.
ວັນທີ 19 ກຸມພາ 2015 ທີ່ຜ່ານມາ ມີບັນດາພາກສ່ວນຕ່າງໆ ໄດ້ນຳເອົາເງິນໄປມອບໃຫ້ຄະນະກຳມະການຟື້ນຟູ ລະດົມທຶນຊ່ວຍເຫຼືອຜົນກະທົບ ຈາກພະຍຸລະດູຮ້ອນຢູ່ທີ່ປົກຄອງເມືອງຫາດຊາຍຟອງ ປະກອບມີທ່ານ ດຣ. ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ (ນວ) ໄດ້ຕາງໜ້າໃຫ້ລັດຖະບານສະພາແຫ່ງຊາດ ເຂດເລືອກຕັ້ງທີ I ນວ ອົງການປົກຄອງ ນວ ຈຳນວນ 40 ລ້ານກີບ ກະຊວງແຮງງານ ແລະ ສະຫວັດດີການ-ສັງຄົມ 50 ລ້ານກີບ ພະແນກແຮງງານ ແລະ ສະຫວັດດີການ-ສັງຄົມ ນວ ສັງກະສີ 500 ແຜ່ນ ມູນຄ່າ 16 ລ້ານກວ່າກີບ ພະແນກສາທາລະນະສຸກ ນວ ມອບມຸ້ງ ແລະ ຜ້າຫົ່ມ ມູນຄ່າ 1 ລ້ານກວ່າກີບ ໂດຍກ່າວຮັບຂອງທ່ານ ບຸນທາມ ພຸດທະວົງສາ ເຈົ້າເມືອງຫາດຊາຍຟອງ ທັງນີ້ກໍ່ເພື່ອພ້ອມກັນຟື້ນຟູຜົນກະທົບນີ້ ໃຫ້ກັບຄືນມາສູ່ສະພາບປົກກະຕິໂດຍໄວ ເຊັ່ນ: ໄຟຟ້າ ໂຮງຮຽນ ສຸກສາລາ ເຮືອນຊານຂອງປະຊາຊົນ ແລະ ໃຫ້ສືບຕໍ່ກັນຈັດຕັ້ງການສົງເຄາະ ຊ່ວຍເຫຼືອຜູ້ທີ່ປະສົບເຄາະຮ້າຍ ຜູ້ທີ່ບໍ່ມີເຮືອນຢູ່ກ່ອນ ພ້ອມກັນນັ້ນ ຍັງໄດ້ຈັດຕັ້ງລະດົມທຶນຊ່ວຍເຫຼືອ ເປັນຕົ້ນເອົາການຊ່ວຍເຫຼືອພາຍໃນເມືອງເປັນຫຼັກ ໃຫ້ປະຊາຊົນເມືອງຫາດຊາຍຟອງນີ້ຊ່ວຍເຫຼືອເຊິ່ງກັນ ແລະ ກັນ ຈາກນັ້ນ ທ່ານເຈົ້າຄອງນະຄອນຫຼວງວຽງຈັນ ພ້ອມດ້ວຍຄະນະ ກໍ່ໄດ້ລົງໄປຢ້ຽມຢາມພົບປະອຳນວຍການ ຄູ-ອາຈານຢູ່ທີ່ໂຮງຮຽນມັດທະຍົມຕອນຕົ້ນບໍ່ໂອ ທີ່ຖືກຜົນກະທົບຈາກພະຍຸລະດູຮ້ອນນີ້ຕື່ມອີກ.
ແຫລ່ງຂ່າວ: ວຽງຈັນໃໝ່