ອາກາດຮ້ອນແບບນີ້ ແນ່ນອນວ່າມີຜົນກະທົບຕໍ່ຜິວໜັງຂອງເຮົາໂດຍກົງ ບໍ່ວ່າຈະບັນຫາຜິວແຫ້ງຄໍ້າ ຜິວແດງ ຫລື ໄໝ້ ໄປຈົນເຖິງບັນຫາມະເຮັງຜິວໜັງ ຫລາຍຄົນຈຶ່ງມັກເລືອກໃຊ້ຄີມກັນແດດທີ່ຊ່ວຍບຳລຸງຜິວ ແລະ ປ້ອງກັນແດດໄດ້ ແຕ່ນອກຈາກຄີມກັນແດດແລ້ວ ໃຜຈະຮູ້ວ່າອາຫານກໍຊ່ວຍຕ້ານແດດໄດ້ເຊັ່ນກັນ
ມີງານວິໄຈທາງວິທະຍາສາດທີ່ສາມາດຢືນຢັນໄດ້ວ່າ ການກິນອາຫານທີ່ມີສານຕ້ານອານຸມູນອິດສະຫລະໃນປະລິມານທີ່ເໝາະສົມ ຈະຊ່ວຍຕໍ່ຕ້ານແສງແດດໄດ້ດີ ແລະ ປ້ອງກັນຜິວໄໝ້ໄດ້ນໍາ ໂດຍສະເພາະອາຫານທີ່ມີເບຕ້າແຄໂລທີນທີ່ພົບໃນຜັກໃບຂຽວ ກາລົດ ໝາກເພັດ ແລະ ຫມາກໄມ້ສີເຫລືອງ ເຊັ່ນໝາກມ່ວງ ໝາກໂມ ແຕ່ຕ້ອງກິນຢ່າງໜ້ອຍ 10 ອາທິດຂຶ້ນໄປ
ນອກຈາກນີ້ ອາຫານທີ່ມີສານໄລໂຄປີນ ສານອີກໂຕໜຶ່ງໃນກຸ່ມແຄໂລທີນອຍ ກໍມີສ່ວນຊ່ວຍປ້ອງກັນຜິວໄໝ້ຈາກແສງແດດເຊັ່ນກັນ ແຕ່ຕ້ອງກິນຕໍ່ເນື່ອງ 3 ເດືອນຂຶ້ນໄປ ພົບໃນໝາກເລັ່ນ ແລະ ໝາກເຂົ້າ ແຖມຍັງຊ່ວຍປ້ອງກັນມະເຮັງໄດ້ນໍາອີກ ໂດຍສະເພາະໃນໝາກເຂົ້າຍັງມີ ໄລໂຄປີນ ຊະນິດພິເສດ ທີ່ເອີ້ນວ່າ ໄລໂປແຄໂລທີນ (Lipocarotene) ຊຶ່ງເປັນກົດໄຂມັນສາຍຍາວທີ່ຊ່ວຍດັກຈັບ ແລະ ດູດຊຶມແຄໂລທີນ ໝາກເຂົ້າຈຶ່ງຈັດເປັນແຫລ່ງຂອງໄລໂຄປີນທີ່ດີທີ່ສຸດ
ບໍ່ພຽງແຕ່ໝາກເລັ່ນ ແລະ ໝາກເຂົ້າເທົ່ານັ້ນ ໃນຜັກຫມາກໄມ້ຊະນິດອື່ນກໍຍັງອຸດົມໄປດ້ວຍ ໄລໂຄປີນ ນໍາອີກ ເຊັ່ນ ໝາກໂມ 1 ປ່ຽງ (286 ກຣາມ) ມີໄລໂຄປີນ 12, 962 ໄມໂຄກຣາມ, ໝາກຮຸ່ງ 1 ໜ່ວຍ (304 ກຣາມ) ມີໄລໂຄປີນ 5, 557 ໄມໂຄກຣາມ, ໝາກມ່ວງ 1 ໜ່ວຍ (207 ກຣາມ) ມີໄລໂຄປີນ 6 ໄມໂຄກຣາມ ແລະ ໃນກາລົດ 1 ໜ່ວຍ (72 ກຣາມ) ມີປະລິມານໄລໂຄປີນ 1 ໄມໂຄກຣາມ ຂະນະທີ່ໃນຊາຂຽວ ຈະມີສານຕ້ານອານຸມູນອິດສະຫລະຊື່ ໂພລີຟີນອນ (Pholyphenols) ກໍສາມາດຊ່ວຍປົກປ້ອງຜິວໜັງບໍ່ໃຫ້ຖືກທຳລາຍຈາກລັງສີຢູວີໄດ້ ໂດຍຮ່າງກາຍສາມາດຮັບໄດ້ທັງຈາກການດື່ມ ແລະ ການທາຄີມທີ່ມີສ່ວນປະສົມຂອງຊາຂຽວ ແລະ ຍັງມີງານວິໄຈພົບວ່າສາມາດປ້ອງກັນມະເຮັງຜິວໜັງໄດ້ນໍາອີກ
ແຕ່ການກິນອາຫານກໍເປັນພຽງວິທີໜຶ່ງທີ່ຈະຊ່ວຍຫລຸດຄວາມສ່ຽງຈາກການຖືກທຳລາຍຂອງຜິວຈາກແສງແດດການທາຄີມກັນແດດກໍຍັງຄົງມີຄວາມຈຳເປັນທີ່ຕ້ອງໃຊ້ເພື່ອເສີມປະສິດທິພາບໃນການປ້ອງກັນແສງແດດ ແລະ ຄວນຄວບຄູ່ກັບການຫລີກລ້ຽງແສງແດດ ໂດຍສະເພາະໄລຍະ 10.00-16.00 ໂມງ.
ຊຶ່ງເປັນໄລຍະທີ່ແດດແຮງ ຫລື ໃສ່ອຸປະກອນປ້ອງກັນແສງແດດ ຖ້າຫາກມີຄວາມຈຳເປັນຕ້ອງອອກແດດ