ໃນລະຫວ່າງວັນທີ 25 ທັນວາ 2014 ຫາ 1 ມັງກອນ 2015 ທີ່ຜ່ານມາ ເພື່ອກວດກາຄວາມເປັນລະບຽບຮຽບຮ້ອຍ ໃນການຈຳໜ່າຍສິນຄ້າພາຍໃນເມືອງ ໃຫ້ຖືກຕ້ອງສອດຄ່ອງຕາມລະບຽບຫຼັກການທີ່ວາງອອກ ເຈົ້າໜ້າທີ່ກວດກາຫ້ອງການອຸດສະຫະກຳ-ການຄ້າ ເມືອງສີສັດຕະນາກ ນະຄອນຫຼວງວຽງຈັນ ໄດ້ລົງກວດກາການຕິດລາຄາສິນຄ້າເປັນເງິນກີບ ພາຍໃນເມືອງຂອງຕົນ.
ຜ່ານການກວດກາ ໄດ້ພົບເຫັນສິນຄ້າທີ່ໝົດອາຍຸໃນກະຕ່າຂອງຂວັນ ຢູ່ບັນດາຮ້ານຄ້າ ຮ້ານມິນິມາກ ແລະ ຕາມຕະຫຼາດພາຍໃນເມືອງຂອງຕົນ ເຊິ່ງສິນຄ້າດັ່ງກ່າວ ສ່ວນໃຫຍ່ເປັນສິນຄ້າອຸປະໂພກ ແລະ ບໍລິໂພກທີ່ໝົດອາຍຸ ຈຳນວນ 15 ລາຍການ ພ້ອມນັ້ນຍັງກວດເຫັນສິນຄ້າ ຕ້ອງຫ້າມປະເພດໝາກກະໂພກ ຈຳນວນ 3 ກິໂລກຼາມ ລວມມູນຄ່າທັງໝົດ 2 ລ້ານກວ່າກີບ ຈາກນັ້ນ ກໍ່ໄດ້ເຮັດບົດບັນທຶກ ກ່າວເຕືອນສຶກສາອົບຮົມຕາມລະບຽບການ ແລະ ຢຶດສິນຄ້າຈຳນວນດັ່ງກ່າວ ເພື່ອທຳລາຍຖິ້ມ.
ແຫລ່ງຂ່າວ: ວຽງຈັນໃໝ່