ປີ 2014 ນັບວ່າເປັນປີໜຶ່ງທີ່່ຫຼາຍເຫດການ ທີ່ຈະກາຍເປັນປະຫວັດຂອງມວນມະນຸດໂລກ ໃຫໄດ້ຈົດຈຳຕໍ່ໄປ ໂດຍສະເພາະແມ່ນໂສກນາຕະກຳ ຫຼາຍຄັ້ງທີ່ໃຫຍ່ໆ ແລະຊັອກໂລກເລີຍກໍວ່າໄດ້. ມື້ນີ້ www.laopost.com ໄດ້ຮິບໂຮມເອົາເຫດການສຳຄັນ ແລະເປັນຂ່າວດັງໄປທົ່ວໂລກມານຳສະເໜີຕໍ່ທ່ານຜູ້ອ່ານດັ່ງນີ້:
1. ໂສກນາຕະກຳທາງເຮືອບິນຂອງຫຼາຍໆ ຊາດໃນອາຊີ
ປີນີ້ເປັນປີໂສກນາຕະກຳທາງດ້ານເຮືອບິນແທ້ໆ ເພາະພາຍໃນປີດຽວກັນນີ້ມີເຮືອບິນຈຳນວນຫຼວງຫຼາຍປະສົບອຸບັດເຫດ ແຕ່ໃນນີ້ພວກເຮົາຈະສະເໜີສະເພາະ ໂສກນາຕະກຳທາງເຮືອບິນຄັ້ງໃຫຍ່ໆ ລະດັບຊັອກໂລກເທົ່ານັ້ນ.
ເລິ່ມຕົ້ນທີ່ ວັນທີ 8 ມີນາ 2014 ໄລຍະທີ່ແມ່ຍິງທົ່ວໂລກກຳລັງສະເຫຼີມສະຫຼອງວັນແມ່ຍິງສາກົນຢ່າງຄຶກຄື້ນນັ້ນ ກໍໄດ້ເກີດເຫດການອັນສະເທືອນຂວັນ, ເລິກລັບ ທີ່ສຸດເມື່ອເຮືອບິນໂດຍສານ Boeing 777-200 ທ່ຽວບິນ MH370 ພ້ອມດ້ວຍຜູ້ໂດຍສານແລະຈຸບິນ 239 ຄົນ ທີ່ບິນຈາກກົວລາລຳເປີປະເທດມາເລເຊຍ ມຸ່ງໜ້າໄປຍັງປັກກິ່ງ ປະເທດຈີນ ພໍຂຶ້ນບິນໄດ້ບໍ່ທໍ່ໃດນາທີ ແລ້ວໄດ້ຫາຍໄປໃນທ້ອງຟ້າຢ່າງມະຫັດສະຈັນ ແລະຍັງຫາບໍ່ພົບຈົນຮອດມື້ນີ້.
ວັນທີ 17 ພຶດສະພາ 2014 ເຮືອບິນໂດຍສານAntonov AN 74-300 ຂອງກອງທັບປະຊາຊົນລາວ ທີ່ໂດຍສານພະນັກງານການນຳຂອງລາວແລະຈຸບິນລວມທັງໝົດ 17 ຄົນ ເດິນທາງໄປຍັງແຂວງຊຽງຂວາງ ເພື່ອຮ່ວມພິທີສະຫຼອງລະນຶກວັນໄຊຊະນະຜ່າວົງປິດລ້ອມສັດຕູຂອງກອງພັນທີ 2 ໄດ້ເກີດອຸບັດເຫດຕົກລົງໃນເຂດບ້ານນາດີ, ເມືອງແປກ, ແຂວງຊຽງຂວາງ ກ່ອນເຮືອບິນໂດຍສານລຳດັ່ງກ່າວຈະລົງເດິ່ນພຽງບໍ່ທໍ່ໃດກິໂລແມັດ. ເຫດການດັ່ງກ່າວໄດ້ສ້າງຄວາມເສົ້າສະຫຼົດໃຈແກ່ພັກ-ລັດ ແລະປະຊາຊົນລາວຫຼາຍທີ່ສຸດ ເຊິ່ງມີຜູ້ເສຍຊີວິດຄາທີ່ 14 ຄົນ, ບາດເຈັບສາຫັດ 3 ຄົນ ແລະຕໍ່ມາຜູ້ບາດເຈັບອີກຜູ້ໜຶ່ງໄດ້ເສຍຊີວິດ ລວມເປັນເສຍຊີວິດ 15 ຄົນ ແລະລອດຊີວິດ 2 ຄົນ.
ວັນທີ 17 ກໍລະກົດ 2014 ເຮືອບິນໂດຍສານຂອງສາຍການບິນມາເລເຊຍ ທີ່ນຳພາຜູ້ໂດຍສານພ້ອມດ້ວຍຈຸບິນລວມ 298 ຄົນບິນຂຶ້ນຈາກນະຄອນຫຼວງອຳສະເຕີດຳ ຂອງປະເທດເນເທີແລນ ມຸ່ງໜ້າໄປຍັງນະຄອນຫຼວງກົວລາລຳເປີ ປະເທດມາເລເຊຍ ແລະໃນຂະນະທີ່ບິນຜ່ານນ່ານຟ້າຂອງປະເທດຢູເຄຣນ ເຊິ່ງເປັນເຂດທີ່ມີສົງຄາມ ຈຶ່ງເຮັດໃຫ້ເຮືອບິນໂດຍສານລຳດັ່ງກ່າວນັ້ນ ຖືກຈະຫຼວດປ້ອງກັນອາກາດທີ່ບໍ່ຮູ້ວ່າເປັນຂອງຝ່າຍໃດ ຍິງຍົນລຳດັ່ງກ່າວໃຫ້ຕົກລົງໃນປະເທດຢູເຄຣນ ໃກ້ກັບຊາຍແດນລະຫວ່າງປະເທດ ຢູເຄຣນແລະລັດເຊຍ ສົ່ງຜົນໃຫ້ຜູ້ໂດຍສານແລະຈຸບິນທັງໝົດຈົບຊີວິດລົງຢ່າງໜ້າສະເທືອນໃຈແກ່ຄົນທົ່ວໂລກ.
ວັນທີ 23 ກໍລະກົດ 2014 ເຮືອບິນ ATR-72-500 ຂອງສາຍການບິນທຣານເອເຊຍ ທ່ຽວບິນ ລົງຈອດຟາດໃສ່ພື້ນໃກ້ກັບສະໜາມບິນໝ່າກົງ ເທິງເກາະເຜິງຫູ່ ຂອງໄຕ້ຫວັນ ເຮັດໃຫ້ເຮືອບິນມີໄຟລຸກໄໝ້ ມີຜູ້ເສຍຊີວິດ 51 ຄົນ ລອດຊີວິດ 7 ຄົນ. ທ່ຽວບິນດັ່ງກ່າວມີກຳນົດຂຶ້ນບິນຈາກສະໜາມບິນສ່ຽວກັງ ໃນເມືອງເກົາສົງ ທາງພາກຕາເວັນຕົກສຽງໃຕ້ຂອງເກາະໄຕ້ຫວັນ ເມື່ອເວລາ 16 ໂມງ 00 ນາທີ, ແຕ່ວ່າບໍ່ສາມາດຂຶ້ນບິນໄດ້ ເນື່ອງຈາກພາຍຸໄຕ້ຝຸ່ນມັດໂມ ເຮັດໃຫ້ກວ່າຈະບິນຂຶ້ນໄດ້ ກໍເລື່ອນໄປເປັນເວລາ 17 ໂມງ 43 ນາທີ.
ຫຼ້າສຸດ ວັນທີ 28 ທັນວາ 2014 (ກ່ອນປີໃໝ່ພຽງ 3 ວັນ) ຍົນໂດຍສານແອເອເຊຍ ທ່ຽວບິນ QZ8501 ບັນທຸກຜູ້ໂດຍສານແລະຈຸບິນລວມ 162 ຄົນ ບິນອອກເດິນທາງຈາກເມືອງສຸຣາບາຢາ ປະເທດອິນໂດເນເຊຍ ມຸ່ງໜ້າໄປຍັງປະເທດສິງກະໂປ ໄດ້ຫາຍໄປຈາກຈໍເຣດ້າ ເຈົ້າໜ້າທີ່ອາກາດຂອງອິນໂດຍເນເຊຍ, ສິງກະໂປ ແລະນານາຊາດໄດ້ຮ່ວມກັນຂຸ້ນຂ້ຽວຄົ້ນຫາ ແຕ່ຫຍັງບໍ່ພົບຮ່ອງຮອຍ (30 ທັນວາ 2014).
2. ໂສກນາຕະກຳເຮືອເຊວອນລົ່ມ
ເຫດການນີ້ ເກີດຂຶ້ນເມື່ອວັນທີ 16 ເມສາ 2014 ເຮືອເຟີ້ຣີ່ເຊວອນ ທີ່ເດິນທາງອອກຈາກທ່າເຮືອ ອິນຊອນໄປຍັງເກາະເຊຈູ ໄດ້ເກີດອັບປາງກາງທະເລ ສົ່ງຜົນໃຫ້ມີຜູ້ເສຍຊີວິດ 304 ຄົນ ແລະລອດຊີວິດ 174 ຄົນ ແລະໂສກນາຕະກຳຄັ້ງນີ້ໄດ້ກາຍເປັນ ທີ່ວິພາກວິຈານໄປທົ່ວໂລກ ເພາະເກີດຈາກຄວາມປະມາດເລິນເລີ່ ຂອງພະນັກງານແລະກັບຕັນເຮືອ ທີ່ບໍ່ຍອມອົບພະຍົມຜູ້ໂດຍສານ ລວມທັງເຈົ້າໜ້າທີ່ທາງການເອງກໍບໍ່ໄດ້ ຮີບຮ້ອນໃຫ້ຄວາມຊ່ວຍເຫຼືອຢ່າງເຕັມທີ່. ຜູ້ເສຍຊີວິດໃນເຫດການນີ້ເກືອບທັງໝົດ ແມ່ນນັກຮຽນ-ນັກສຶກສາ.
3. ໄວຣັສອີໂບລາ ລະບາດ
ອີໂບລາ ເປັນເຊື້ອໄວຣັສທີ່ສ້າງຫາຍະນະ ທີ່ສຸດຕໍ່ມະນຸດໂລກໃນເວລານີ້ ເພາະແມ່ນແຕ່ທ່ານໝໍຜູ້ຊ່ຽວຊານ ກໍຍັງຕາຍຍ້ອນໄວຣັສນີ້ຈົນໄດ້. ການລະບາດຂອງເຊື້ອອີໂບລາຄັ້ງນີ້ ເກີດຂຶ້ນໃນພື້ນທີ່ຫ່າງໄກສອກຫຼີກ ໃນຂົງເຂດປະເທດອາຟຣິກາຕາເວັນຕົກ ເລິ່່ມແຕ່ປະເທດກິນີເມື່ອເດືອນມີນາ ກ່ອນທີ່ເຊື້ອຈະແພ່ກະຈາຍຢ່າງວ່ອງໄວ ຈົນເຖິງຊາຍແດນຂອງໄລບີເຣຍ ຕາມມາດ້ວຍເຊຍຣາລີໂອນ ແລະເຂົ້າສູ່ພາວະການລະບາດຢ່າງໜັກໃນໄລຍະເດືອນກັນຍາທີ່ຜ່ານມາ ແລະຫຼັງສຸດຈາກສະຖິຕິຜູ້ຕິດໄວຣັດນີ້ ຈາກອົງການອະນາໄມໂລກ ເປີດເຜີຍວ່າ ໂຕເລກຜູ້ຕິດເຊື້ອຫຼາຍກວ່າ 18,000 ຄົນ ແລະເສຍຊີວິດໄປແລ້ວບໍ່ຕ່ຳກວ່າ 6,500 ຄົນ. ແລະຄາດວ່າຍັງຈະສືບຕໍ່ລະບາດໄປເຖິງປີໜ້າ ແລະອາດຈະເຮັດໃຫ້ຍອດຜູ້ເສຍຊີວິດ ສູງຂຶ້ນເຖິງ 10,000 ຄົນ.
4. ສົງຄາມອິສຣາແອນ – ປາເລສຕິນ
ເປັນອີກຂ່າວໜຶ່ງທີ່ໃຫຍ່ແລະສ້າງຄວາມ ສະເທືອນໃຈໄປທົ່ວໂລກ ເມື່ອອິສຣາແອນແລະປາເລສຕີນ ເປີດສາກໂຈມຕີກັນອີກ ບໍລິເວນເຂດກາຊາ ດິນແດນປາເລສຕີນ ຈາກບັນຫາຄວາມຂັ້ດແຍ້ງທີ່ດຳເນີນ ມາເປັນເວລາຍາວນານ ແລະການໂຈມຕີທີ່ກິນເວລາຍາວນານ ເປັນເດືອນ ກໍຮຸນແຮງຈົນເຮັດໃຫ້ເຮືອນຊານບ້ານຊ່ອງ ຂອງປະຊາຊົນປາເລສຕີນ ໃນເຂດກາຊາ ກາຍເປັນຊາກປະຫຼັກຫັກພັງ ມີຜູ້ເສຍຊີວິດລວມທັງໝົດບໍ່ຕ່ຳກວ່າ 2,000 ຄົນ.
5. ລັດຖະປະຫານໃນປະເທດໄທ
ເກີດຂຶ້ນໃນວັນທີ 22 ພຶດສະພາ 2014 ເວລາ 16:30 ນາທີ ໂດຍຄະນະຮັກສາຄວາມສະຫງົບແຫ່ງຊາດ ອັນມີ ພົນເອກ ປະຍຸດ ຈັນໂອຊາ ເປັນຫົວໜ້າຄະນະ ໂຄ່ນລົ້ມລັດຖະບານ ຮັກສາການ ນິວັດທຳລົງ ບຸນຊົງໄພສານ ນັບເປັນລັດຖະປະຫານຄັ້ງທີ 13 ໃນປະຫວັດສາດໄທ. ລັດຖະປະຫານດັ່ງກ່າວເກີດຂຶ້ນ ຫຼັງວິກິດການທາງການເມືອງ ເຊິ່ງເລິ່ມຕົ້ນແຕ່ເດືອນຕຸລາ 2013 ເພື່ອຄັດຄ້ານຮ່າງກົດໝາຍ ອະໄພຍະໂທດ ແລະອິດທິພົນຂອງ ທ່ານ ພັນໂທ ດຣ ທັກສິນ ຊິນະວັດ ໃນການເມືອງໄທ.
ຫຼັງລັດຖະປະຫານ ມີປະກາດໃຫ້ລັດຖະທຳມະນູນ ແຫ່ງລາຊະອານາຈັກໄທ ປີ 2007 ສິ້ນສຸດລົງ ຍົກເວັ້ນໝວດ 2 ຄະນະລັດຖະມົຕີຮັກສາການໝົດອຳນາດ ຕະຫຼອດຈົນໃຫ້ຍຸບສະພາ ຈົນເມື່ອວັນທີ 22 ກໍລະກົດ 2014 ມີການປະກາດໃຊ້ລັດຖະທຳມະນູນ ແຫ່ງລາຊະອານາຈັກໄທ (ສະບັບຊົ່ວຄາວ) ປີ 2014 ເຊິ່ງໃຫ້ມີສະພານິຕິບັນຍັດແຫ່ງຊາດ ເຮັດໜ້າທີ່ແທນສະພາຜູ້ແທນ ລາສະດອນ ວຸດທິສະພາ ແລະລັດຖະສະພາ. ວັນທີ 21 ສິງຫາ 2014 ສະພາ ມີມະຕິເລືອກພົນເອກ ປະຍຸດ ຈັນໂອຊາ ເປັນນາຍົກລັດຖະມົນຕີ.
6. ISIS ເຮັດສົງຄາມສັກສິດ ສະຫະລັດປາບ
ນັບວ່າເປັນກຸ່ມການຕໍ່ສູ້ທີ່ໂຫດຮ້າຍ ແລະເປັນທີ່ກ່າວຂວັນເຖິງຫຼາຍທີ່ສຸດ ໃນປີນີ້ ສຳລັບກອງກຳລັງອິສລາມ ແຫ່ງອິຣັກແລະອັດຊາມ (ISIS) ທີ່ຖືກກ່າວຫາວ່າກໍ່ການຮ້າຍທົ່ວໂລກ ແລະມີການເຜີຍແຜ່ຄລິບຂ້າຕັດຄໍ ນັກຂ່າວອາເມລິກາແລະອັງກິດມາຫຼາຍຄັ້ງ ເພື່ອຂົ່ມຂູ່ບໍ່ໃຫ້ອາເມລິກາຫຼືຊາດພັນທະມິດ ມາຫຍຸ້ງກ່ຽວກັບການປະຕິບັດການໃດໆ ຂອງຕົນ ຈົນສ້າງຄວາມສະຫຼົດໃຈ ແກ່ຜູ້ຄົນທົ່ວໂລກ. ຈົນອາເມລິກາຕັດສິນໃຈເຂົ້າໄປໄລ່ລ່າ ໂຈມຕີຕໍ່ກຸ່ມດັ່ງກ່າວເຮັດໃຫ້ເສຍຊີວິດຫຼາຍຄົນ ແຕ່ປານນັ້ນກຸ່ມນີ້ກໍຍັງບໍ່ໄດ້ຫວັ່ນກົວຫຍັງ ຕໍ່ອຳນາດອາເມລິກາເລີຍ.
7. ການຂັດແຍ້ງໃນໄຄຣເມຍ
ໄຄຣເມຍ ເຖິງແມ່ນຈະເປັນດິນແດນໃນປະເທດ ຢູເຄຣນ ແຕ່ມີປະຊາຊົນທີ່ເວົ້າພາສາລັດເຊຍ ຫຼາຍເຖິງ 58.5% ໃນຂະນະທີ່ຄົນພື້ນຖານຢູເຄຣນມີພຽງ 24.4% ເທົ່ານັ້ນ ດັ່ງນັ້ນ ຄວາມປາຖະໜາສູງສຸດ ຂອງຊາວໄຄຣເມຍສ່ວນຫຼາຍ ຈຶ່ງຕ້ອງການລວມເປັນສ່ວນໜຶ່ງຂອງລັດເຊຍ ເທົ່ານັ້ນ.
ເມື່ອເປັນດັ່ງນັ້ນແລ້ວ ລັດຖະສະພາໄຄຣເມຍຈຶ່ງເດິນໜ້າ ຈັດການລົງປະຊາມະຕິແຍກຕົວຈາກຢູເຄຣນ ໄປເປັນໜຶ້່ງດຽວກັບລັດເຊຍ ເຊິ່ງເຖິງແມ່ນວ່າທາງການຢູເຄຣນ ຈະບໍ່ເຫັນດີນຳ ແລະທາງສະມັດຊາໃຫຍ່ ສະຫະປະຊາຊາດກໍຄັດຄ້ານ ແຕ່ກໍບໍ່ອາດຈະຕ້ານທານພວກເຂົາໄດ້ ໄຄຣເມຍຈັດລົງປະຊາມະຕິ ແລະແຍກໂຕເປັນໜຶ້່ງດຽວກັບລັດເຊຍ ໂດຍມີປະທານາທິບໍດີ ວະລາດີເມຍ ປູຕີນ ແຫ່ງລັດເຊຍ ລົງນາມຮັບຮອງເປັນເອກະລາດ ຂອງຢູເຄນ.
8. ສະກັອດແລນລົງປະຊາມະຕິ ແຍກໂຕຈາກສະຫະຣາຊະອານາຈັກ
ຫຼັງຈາກທຳທ່າວ່າຈະແຍກປະເທດ ເປັນເອກະລາດຈາກສະຫະ ຣາຊະອານາຈັກ(ອັງກິດ) ມາດົນແລ້ວ ໃນທີ່ສຸດສະກັອດແລນ ກໍຈັດປະຊາມະຕິຂຶ້ນເມື່ອວັນທີ 19 ກັນຍາ 2014 ທ່າມກາງການຈັບຕາຕິດຕາມຢ່າງໃກ້ຊິດ ຈາກທຸກປະເທດທົ່ວໂລກວ່າ ສະກັອດແລນຈະແຍກໂຕຈາກ ສະຫະຣາຊະອານາຈັກໄດ້ສຳເລັດຫຼືບໍ່ ເພາະຈາກການສຳຫຼວດຄວາມເຫັນ ຂອງປະຊາຊົນກ່ອນລົງປະຊາມະຕິ ພົບວ່າສັດສ່ວນຂອງຜູ້ສະໜັບສະໜຸນ ການແຍກໂຕແລະຜູ້ຄັດຄ້ານນັ້ນ ສູສີກັນຢູ່ ຄື ມີຜູ້ຄັດຄ້ານການແຍກໂຕເປັນເອກະລາດ 55% ສ່ວນຜູ້ສະໜັບສະໜຸນມີ 45% ເປັນອັນວ່າ ສະກັອດແລນບໍ່ໄດ້ແຍກ ເປັນເອກະລາດ.
9. ລະເບີດແມນຮັດຕັນ ສະຫະລັດອາເມລິກາ
ເຫດການນີ້ເກີດຂຶ້ນເມື່ອວັນທີ 12 ມີນາ 2014 ບໍລິເວນອິສຮາເລັມ ຍ່ານແມນຮັດຕັນ ນະຄອນນິວຢອກ ປະເທດສະຫະລັດອາເມລິກາ ເມື່ອຈູ່ໆ ກໍເກີດລະເບີດບື້ມຂຶ້ນ ແລະເຮັດໃຫ້ອາຄານ 2 ແຫ່ງພັງລົງມາ ຈົນເປັນເຫດໃຫ້ມີຜູ້ບາດເຈັບ ຈາກເຫດການລະເບີດຄັ້້ງນີ້ ຈຳນວນ 22 ຄົນ ເສຍຊີວິດ 2 ຄົນ ສ້າງຄວາມຢ້ານກົວໃຫ້ກັບ ຊາວອາເມລິກາເປັນຢ່າງສູງ ຢ້ານວ່າການລະເບີດຄັ້ງນີ້ຈະເກີດຈາກ ການກໍ່ວິນາດສະກຳອີກຄັ້ງ. ແຕ່ສຸດທ້າຍຮູ້ວ່າ ສິ່ງທີ່ເກີດຂຶ້ນນັ້ນເປັນພຽງທໍ່ແກັດຮົ່ວ. ນັບວ່າເປັນອີກໜຶ່ງເຫດການສະຫຼົດ ທີ່ເກີດຂຶ້ນໃນສະຫະລັດອາເມລິກາໃນປີນີ້ ແນວໃດກໍດີຫຼັງຈາກທີ່ມີການອອກມາ ສະເຫຼີຍວ່າເກີດຈາກແກັດຮົ່ວ ຂ່າວນີ້ກໍງຽບໄປທັນທີ.
10. ຄົນຮ້າຍບຸກຄາເຟ່ ຈັບຄົນເປັນໂຕປະກັນ ທີ່ເມືອງຊີດນີ່
ເຫດການນີ້ເກີດຂຶ້ນໃນວັນທີ 15 ທັນວາ 2014 ມີມືປືນ 2 ຄົ ໄດ້ຍ່າງເຂົ້າໄປພາຍໃຈຮ້ານ ລິນ ຊັອກໂກແລັດ ຄາເຟ່ ກ່ອນທີ່ຈະຈີ້ທຸກຄົນໃນຮ້ານ ເປັນໂຕປະກັນ ທັງພະນັກງານແລະລູກຄ້າ ພ້ອມບັງຄັບໃຫ້ໂຕປະກັນຖືທຸງສີດຳ ຂຽນດ້ວຍພາສາອາຫຼັບ ຈົນເຮັດໃຫ້ຊາວໂລກຢ້ານກົວ ວ່າຈະເປັນສີມືກໍ່ການຮ້າຍຂອງເຄືອຂ່າຍ ISIS
ຫຼັງຈາກເກີດເຫດຕຳຫຼວດໄດ້ປິດລ້ອມພື້ນທີ່ ດັ່ງກ່າວ ພ້ອມຂໍໃຫ້ປະຊາຊົນຫ້າມສັນຈອນ ບໍລິເວນນັ້ນ ຈາກນັ້ນກໍດຳເນີນການຈັບຕາຄົນຮ້າຍ ທີ່ຈີ້ໂຕປະກັນພາຍໃນຮ້ານ ການຈັບໂຕປະກັນດັ່ງກ່າວເພື່ອຊ່ວຍເຫຼືອ ໂຕປະກັນ ແຕ່ໂຊກຮ້າຍທີ່ມີໂຕປະກັນເສຍຊີວິດ 2 ຄົນ ແລະຄົນຮ້າຍເສຍຊີວິດ 1 ຄົນ ກ່ອນຈະຈັບໂຕທ້າວ ມານ ຮາຣອນ ໂມນິສ ຊາຍຊາວອິຣານທີ່ລີ້ໄພມາຍັງອອສເຕເຣຍ ແລະຕຳຫຼວດຄາດວ່າ ການກໍ່ການຮ້າຍຄັ້ງນີ້ ເປັນການກະທຳໂດຍບໍ່ກ່ຽວຂ້ອງກັບກຸ່ມ ກໍ່ການຮ້າຍໃດໆ ເລີຍ ເຖິງແມ່ນວ່າຈະມີການນຳເອົາທຸງດຳ ຂຽນດ້ວຍອັກສອນອາຫຼັບມາ ໃຫ້ໂຕປະກັນຖືກາງໄວ້ກໍຕາມ.
ໂດຍ: ທີມຂ່າວ laopost.com