ວັນທີ 24 ກຸມພາ 2026 ຂະແໜງປະຕິບັດຄຳຕັດສິນຂອງສານ ພະແນກຍຸຕິທໍາແຂວງອັດຕະປື ໄດ້ມອບຊັບສິນທີ່ສານຕັດສິນຮິບເປັນຂອງລັດ ຕາມຄຳຕັດສິນຂອງສານ ປະຈຳ 9 ເດືອນ (ແຕ່ເດືອນ 1-9 ປີ 2025) ໃຫ້ຂະແໜງຄຸ້ມຄອງຊັບສິນແຫ່ງລັດ ພະແນກການເງິນແຂວງ, ໂດຍເຂົ້າຮ່ວມຂອງທ່ານ ສີໂຫ ຕານວົງພັບ ຮອງຫົວໜ້າພະແນກຍຸຕິທຳແຂວງ, ທ່ານ ສົມສະຫວັນ ອ້ວນວິໄລ ຮອງຫົວໜ້າພະແນກການເງິນແຂວງ, ມີຫົວໜ້າຂະແໜງປະຕິບັດຄຳຕັດສິນຂອງສານ, ຮອງຫົວໜ້າຂະແໜງຄຸ້ມຄອງຊັບສິນລັດ ພະແນກການເງິນແຂວງເຂົ້າຮ່ວມ.
ຊັບສິນທີ່ສານຕັດສິນຮິບເປັນຂອງລັດ ທີ່ນຳມາມອບໃນຄັ້ງນີ້ມີ: ໂທລະສັບ ຈຳນວນ 115 ເຄື່ອງ, ເງິນສົດ 65,763,000 ກີບ, ສາຍແຂນຄຳ ນ້ຳໜັກ 2 ບາດ, ລົດໃຫຍ່ 3 ຄັນ, ລົດຈັກ 23 ຄັນ, ປືນຍາວ 1 ກະບອກ, ປືນສັ້ນ K54 ໜຶ່ງກະບອກ, ປືນສັ້ນ K59 ໜຶ່ງກະບອກ, ລູກປືນ 10 ລູກ, ເຄື່ອງຊ໋ອດປາ 1 ເຄື່ອງ, ຈັກແຮງ 30 ຈໍານວນ 1 ເຄື່ອງ, ຈັກແຮງ 24 ຈຳນວນ 6 ເຄື່ອງ, ໂປມນ້ຳ 2 ເຄື່ອງ, ທໍ່ຢາງ 2 ໂຄ້ງ ແລະ ທໍ່ຢາງ p11 2 ກໍ້.
ຕາງໜ້າມອບໂດຍ ທ່ານ ໂພທະສິນ ສະເຫລີມສັກ ຫົວໜ້າຂະແໜງປະຕິບັດຄຳຕັດສິນຂອງສານ ພະແນກຍຸຕິທຳແຂວງ ຮັບໂດຍທ່ານ ຄຳຕູ້ ຈັກປະເສີດ ຮອງຫົວໜ້າຂະແໜງຄຸ້ມຄອງຊັບສິນແຫ່ງລັດ ພະແນກການເງິນແຂວງ.
ທີ່ມາ: ຂ່າວສານແຂວງອັດຕະປື