ໃນວັນທີ 12 ມັງກອນ 2026 ນີ້, ໄດ້ມີການແຕກຕື່ນກັນທັງບ້ານ ເມື່ອມີການລາຍງານວ່າ: ໄດ້ຄົ້ນພົບພະພຸດທະຮູບເກົ່າແກ່ຈຳນວນຫຼາຍກວ່າຮ້ອຍອົງ ຢູ່ບໍລິເວນບ້ານເວີນຂາວ, ເມືອງໂຂງ, ແຂວງຈຳປາສັກ ເຊິ່ງສ້າງຄວາມປິຕິຊົມຊື່ນໃຫ້ແກ່ຊາວພຸດທະສາສະນິກະຊົນ ແລະ ປະຊາຊົນໃນທ້ອງຖິ່ນເປັນຢ່າງຍິ່ງ.
ສະນັ້ນ, ອຳນາດການປົກຄອງເມືອງໂຂງ ທ່ານ ໜູແສງ ຜຸຍບັນດິດ ຮອງປະທານຄະນະກຳມະການປົກຄອງເມືອງ, ທ່ານ ນາງ ໄພວັນ ສີບຸນເຮືອງ ເລຂາຄະນະພັກຮາກຖານກຸ່ມຮາດຊາຍຄູນ ພ້ອມດ້ວຍຫ້ອງການກ່ຽວຂ້ອງໄດ້ລົງພື້ນທີ່ຕົວຈິງເພື່ອຕິດຕາມເຫດການດັ່ງກ່າວ; ຈາກການໃຫ້ຂໍ້ມູນຂອງການຈັດຕັ້ງບ້ານເວີນຂາວວ່າ: ເຫດການນີ້ເກີດຂຶ້ນໃນວັນທີ 11 ມັງກອນ 2026, ເວລາປະມານ 17:00 ໂມງ. ຜູ້ທີ່ຄົ້ນພົບຄົນທຳອິດແມ່ນ ນາງ ສຸກສະຫວັນ ແສງອາລຸນ, ອາຍຸ 13 ປີ (ເປັນລູກສາວຂອງ ທ້າວ ພັນ ແລະ ນາງ ບຸນຫຼາຍ), ໃນຂະນະທີ່ກຳລັງພາຫຼານໄປຫຼິ້ນຢູ່ບໍລິເວນໃກ້ຄຽງບ້ານຂອງຕົນ. ນາງ ສຸກສະຫວັນ ໄດ້ສັງເກດເຫັນສິ້ນສ່ວນຂອງໄຫດິນໂພ່ຂຶ້ນມາຈາກພື້ນດິນ, ຈຶ່ງໄດ້ຕັດສິນໃຈໃຊ້ສຽມສັບດິນອອກ ແລະ ໄດ້ພົບເຫັນສິ່ງລຳຄ່າທີ່ຢູ່ຂ້າງໃນເປັນພະພຸດທະຮູບ. ຈາກການກວດກາເບື້ອງຕົ້ນ, ພົບພະພຸດທະຮູບທັງໝົດມີຈຳນວນ 105 ອົງ, ເປັນພະທອງສຳລິດຈຳນວນ 4 ອົງ, ພະເງິນຈຳນວນ 101 ອົງ, ໃນຈຳນວນທັງໝົດນັ້ນ ມີພະພຸດທະຮູບທີ່ຍັງມີສະພາບສົມບູນດີ 53 ອົງ, ສ່ວນທີ່ເຫຼືອແມ່ນມີການເປ່ເພໄປຕາມກາລະເວລາ.
ທ່ານ ໜູແສງ ຜຸຍບັນດິດ ໃຫ້ຮູ້ວ່າ: ໃນຂະນະນີ້, ພະພຸດທະຮູບທັງໝົດໄດ້ຖືກເກັບຮັກສາໄວ້ໃນບ່ອນທີ່ປອດໄພ ກໍຄືທີ່ວັດບ້ານເວີນຂາວ ເພື່ອລໍຖ້າໃຫ້ເຈົ້າໜ້າທີ່ຂະແໜງການກ່ຽວຂ້ອງ, ລົງມາສົມທົບກວດກາ, ຂຶ້ນທະບຽນ ແລະ ສຶກສາຄົ້ນຄວ້າເຖິງອາຍຸການ ແລະ ປະຫວັດຄວາມເປັນມາຂອງພະພຸດທະຮູບເຫຼົ່ານີ້. ການຄົ້ນພົບຄັ້ງນີ້ ບໍ່ພຽງແຕ່ເປັນສິລິມຸງຄຸນໃຫ້ແກ່ຄອບຄົວຜູ້ຄົ້ນພົບ ແລະ ຊາວບ້ານເວີນຂາວເທົ່ານັ້ນ, ແຕ່ຍັງເປັນການຄົ້ນພົບທາງປະຫວັດສາດທີ່ສຳຄັນ ເຊິ່ງສະແດງໃຫ້ເຫັນເຖິງຮາກເຫງົ້າທາງວັດທະນະທຳ ແລະ ຄວາມຮຸ່ງເຮືອງຂອງພຸດທະສາສະໜາໃນເຂດເມືອງໂຂງ ແຂວງຈຳປາສັກ ໃນອະດີດ.
ແຫຼ່ງຂໍ້ມູນ: Media Laos