ສຳນັກຂ່າວຕ່າງປະເທດລາຍງານໃນວັນທີ 19 ມັງກອນ 2025 ຜ່ານມາ, ເກີດເຫດລົດບັນທຸກນ້ຳມັນລະເບີດຫຼັງຈາກພິກຄວ້ຳ ໃນພຶ້ນທີ່ພາກເໜືອຂອງປະເທດໄນຈີເຣຍ ເຮັດໃຫ້ປະຊາຊົນເສຍຊີວິດເປັນຈຳນວນຫຼາຍ ຂະນະເອົາຖັງມາໂຕງເອົານ້ຳມັນທີ່ຮົ່ວໄຫຼອອກຈາກລົດບັນທຸກ.

ຕາມການລາຍງານລົດບັນທຸກນ້ຳມັນຄັນດັ່ງກ່າວໄດ້ເກີດພິກຄວ້ຳຢູ່ຫົນທາງໃນ ເມືອງຊູເລຈາ ທາງພາກເໜືອຂອງໄນຈີເຣຍ ເຮັດໃຫ້ນ້ຳມັນຮົ່ວໄຫຼຈາກລົດບັນທຸກເປັນຈຳນວນຫຼາຍ ຊາວບ້ານໃນແຖວນັ້ນກໍຫິ້ວຖັງ ຫຼື ແນວບັນຈຸທີ່ຫາໄດ້ພາກັນໄປໂຕ່ງເອົານ້ຳມັນໂດຍບໍເກງໃຈວ່າຈະເກີດອັນຕະລາຍຕາມມາ ເຊິ່ງມັນກໍເກີດຂຶ້ນແທ້ ໃນຂະນະທີ່ຊາວບ້ານກຳລັງໂຕ່ງເອົານ້ຳມັນຢູ່ນັ້ນກໍໄດ້ເກີດໄຟລຸກຈົນເຮັດໃຫ້ລະເບີດຮຸນແຮງ ແລະ ໄຟລຸກຢ່າງໄວວາ ຈົນເປັນເຫດເຮັດໃຫ້ຊາວບ້ານຖືກໄຟໄໝ້ເສຍຊີວິດຢ່າງນ້ອຍ 77 ຄົນ ແລະ ບາດເຈັບ 25 ຄົນ ທາງດ້ານເຈົ້າໜ້າທີ່ກູ້ໄພໄດ້ນຳສົບມາວາງໄວ້ຂ້າງທາງແລະນຳໃບໄມ້ມາປົກໄວ້ລະຫວ່າງລໍຖ້າການເຄື່ອນຍ້າຍໄປພິດສູດ.

ທັງນີ້ອຸບັດຕິເຫດໃນລັກສະນະແບບນີ້ເກີດຂຶ້ນເປັນປະຈຳໃນປະເທດໄນຈີເຣຍ ແລະ ເປັນເຫດໃຫ້ຄົນເສຍຊີວິດເປັນຈຳນວນຫຼາຍ ໂດຍເຫດການກ່ອນໜ້າເກີດຂຶ້ນເມື່ອ ເດືອນຕຸລາ ປີທີ່ແລ້ວ ເຮັດໃຫ້ຊາວບ້ານເສຍຊີວິດ 153 ຄົນ.