ໃນວັນທີ 17 ກັນຍາ 2024 ທາງເຈົ້າໜ້າທີ່ວິຊາສະເພາະພະແນກສືບສວນ-ສອບສວນຫ້ອງຕຳຫຼວດ ກອງບັນຊາການ ປກສ ແຂວງບໍ່ແກ້ວ ໄດ້ຮັບແຈ້ງເຫດຈາກພົນລະເມືອງດີວ່າ: ມີເຫດການຄາດຕະກຳຢູ່ ເຂດບ້ານນໍ້າເກິ່ງເກົ່າ, ເມືອງຕົ້ນເຜິ້ງ ແຂວງບໍ່ແກ້ວ. ຈາກນັ້ນ, ເຈົ້າໜ້າທີ່ຈຶ່ງໄດ້ ລົງກວດກາ ສັນນະສູດສະຖານທີ່ເກີດເຫດເຫັນວ່າ: ມີມູນຄວາມຈິງແທ້, ຈຶ່ງໄດ້ເກັບກຳຂໍ້ມູນ, ຫຼັກຖານ, ສັນນະສູດຊາກສົບຜູ້ເສຍຊີວິດ ແລະ ຄັດຈອນເປົ້າໝາຍກໍ່ເຫດ. ຕົກມາຮອດວັນທີ 2 ຕຸລາ 2024 ຈຶ່ງສາມາດກັກຕົວເປົ້າໝາຍໄດ້ ຊື່ທ້າວ ຄົມກິດ ເບເຊກູ່, ອາຍຸ 20 ປີ ສັນຊາດມຽນມາ, ອາຊີບກຳມະກອນ, ຢູ່ບ້ານເມືອງການ, ເມືອງເມືອງການ ແຂວງເລີຍສາ, ປະເທດມຽນມາ, ປະຈຸບັນພັກເຊົ່າຢູ່ເຂດເສດຖະກິດພິເສດສາມຫຼ່ຽມຄຳ ແຂວງບໍ່ແກ້ວ.
ຜ່ານການສືບສວນ-ສອບສວນທ້າວ ຄົມກິດ ເບເຊກູ່ ໄດ້ໃຫ້ການຕໍ່ເຈົ້າໜ້າທີ່ວ່າ: ໃນຄັ້ງວັນທີ 17 ກັນຍາ 2024 ເວລາປະມານ 18 ໂມງ ຜູ້ກ່ຽວໄດ້ໂທລະສັບຫາ ທ້າວ ຈານ ໄຊມີໂຊກ (ຜູ້ເສຍຊີວິດ) ອາຊີບຂັບລົດຮັບ-ສົ່ງໂດຍສານ ໃຫ້ມາຮັບຢູ່ໜ້າປະຕູໂຂງ ເມືອງຕົ້ນເຜິ້ງ ແຂວງບໍ່ແກ້ວ ຈຸດປະສົງເພື່ອຈະມາຫຼິ້ນຢູ່ເມືອງຫ້ວຍຊາຍ, ຮອດເວລາປະມານ 21 ໂມງ ຜູ້ເສຍຊີວິດຈຶ່ງຂັບຂີ່ລົດປະເພດລົດເກັ່ງບໍ່ຈື່ປ້າຍທະບຽນມາຮັບຜູ້ກ່ຽວຢູ່ໜ້າປະຕູໂຂງແລ້ວຂັບຂີ່ມຸ້ງໜ້າມາເມືອງຫ້ວຍຊາຍ, ພໍມາຮອດເຂດບ້ານນໍ້າເກິ່ງ ເມືອງຕົ້ນເຜິ້ງ ແຂວງບໍ່ແກ້ວ ຜູ້ກ່ຽວຈຶ່ງໄດ້ຖາມຄົນຂັບລົດວ່າ: ມຶງຈື່ກູໄດ້ບໍ່? ແຕ່ຜູ້ເສຍຊີວິດບໍ່ຕອບຫຍັງ.
ຈາກນັ້ນ, ຜູ້ເສຍຊີວິດ ໄດ້ເອົາມິດມາແຕ່ທາງໃດແມ່ນບໍ່ຮູ້ແກ່ວງມາໃສ່ຜູ້ກ່ຽວ ທີ່ນັ່ງຢູ່ເບາະຫຼັງ ແລະ ໄດ້ເກີດການຕໍ່ສູ້ກັນແລ້ວຜູ້ກ່ຽວຈຶ່ງຍາດມີດນໍາຜູ້ເສຍຊີວິດໄດ້ ແລ້ວໃຊ້ມີດແທງຜູ້ເສຍຊີວິດຈໍານວນຫຼາຍຄັ້ງ ຈົນເຮັດໃຫ້ເສຍຊີວິດຄາທີ່. ຈາກນັ້ນ, ຜູ້ກ່ຽວຈຶ່ງຍ້າຍຜູ້ເສຍຊີວິດ ໄປນັ່ງເບາະໜ້າເບື້ອງຂວາ ແລ້ວຜູ້ກ່ຽວກໍໄດ້ຂັບລົດຕ່າວກັບຄືນໄປທາງເມືອງຕົ້ນເຜິ້ງ ແຕ່ຜູ້ກ່ຽວຂັບລົດບໍ່ເປັນຈຶ່ງເຮັດໃຫ້ລົດເສຍຫຼັກຕີນລົດຕົກລົງຮ່ອງອອກບໍ່ໄດ້, ຈາກນັ້ນ, ຜູ້ກ່ຽວກໍໄດ້ຈັບເອົາໂທລະສັບຜູ້ເສຍຊີວິດແກວ່ງຖິ້ມເຂົ້າປ່າຂ້າງທາງ ແລ້ວເອົາຕົວລົບໜີ. ຕົກມາຮອດວັນທີ 18 ກັນຍາ 2024 ເວລາປະມານ 07 ໂມງເຊົ້າ ຜູ້ກ່ຽວກໍໄດ້ໂທລະສັບຫາຄົນລາວບໍ່ຮູ້ຊື່ ຂັບລົດຈັກມາຮັບຜູ້ກ່ຽວໄປສົ່ງຍິບບາດແຜ່ທີ່ໂຮງໝໍເມືອງຕົ້ນເຜິ້ງ ແລ້ວກໍກັບເຂົ້າໄປເຮັດວຽກຢູ່ບໍລິສັດເປັນປົກກະຕິ.
ຜ່ານການ ສັນນະສູດຊາກສົບທ້າວ ຈານ ໄຊມີໂຊກຜູ້ເສຍຊີວິດ ແມ່ນຖືກແທງດ້ວຍຂອງມີຄົມຕາມຕົນໂຕຫຼາຍຈຸດ ສ່ວນ ຄົມກິດ ເບເຊກູ່ ແມ່ນໄດ້ຮັບບາດເຈັບຖືກມີດປາດຢູ່ມືເບື້ອງຂວາ. ສ່ວນສາເຫດ ແລະ ແຮງຈູງໃນການກໍ່ເຫດຄາດຕະກໍາໃນຄັ້ງນີ້ ຍ້ອນວ່າໄລຍະຜ່ານມາຜູ້ເສຍຊີວິດກັບໝູ່ ເຄີຍມີເລື່ອງຜິດຖຽງກັນກັບ (ຜູ້ກໍ່ເຫດ) ມາກ່ອນ.
ຜ່ານການສືບສວນ-ສອບສວນ ແລະ ເກັບກຳຂໍ້ມູນຫຼັກຖານຂອງເຈົ້າໜ້າທີ່ວິຊາສະເພາະແລ້ວ: ເຫັນວ່າ: ທ້າວ ຄົມກິດ ເບເຊກູ່ ແມ່ນເຈດຕະນາລົງມືຄາດຕະກຳທ້າວ ຈານ ໄຊມີໂຊກ ເຊິ່ງເປັນການກໍທຳຜິດຕໍ່ ປະມວນກົດໝາຍອາຍາ ມາດຕາ 188 ສະບັບປັບປຸງ ປີ2017 ແທ້. ດັ່ງນັ້ນ, ທາງເຈົ້າໜ້າທີ່ຈຶ່ງໄດ້ກັກຕົວຜູ້ກ່ຽວໄວ້ເພື່ອນໍາໄປດໍາເນີນຄະດີຕາມລະບຽບກົດໝາຍຕໍ່ໄປ.
ຂ່າວ: ໜັງສືພິມບໍ່ແກ້ວ