spot_img
Homeຂ່າວພາຍ​ໃນສານປະຊາຊົນແຂວງຫຼວງນໍ້າທາ ຕັດສິນຄະດີພະນັກງານສໍ້ລາດບັງຫຼວງ ຈໍານວນ 13 ຄົນ

ສານປະຊາຊົນແຂວງຫຼວງນໍ້າທາ ຕັດສິນຄະດີພະນັກງານສໍ້ລາດບັງຫຼວງ ຈໍານວນ 13 ຄົນ

Published on

ໃນຕອນເຊົ້າຂອງວັນທີ 3 ກັນຍາ 2024 ທີ່ຜ່ານມານີ້, ສານປະຊາຊົນແຂວງຫຼວງນໍ້າທາ ໄດ້ເປີດກອງປະຊຸມສານຂຶ້ນ ທີ່ສະໂມສອນກອງບັນຊາການທະຫານແຂວງຫຼວງນໍ້າທາ ເພື່ອພິຈາລະນາຄະດີອາຍາ ຕໍ່ຈໍາເລີຍ ເຊິ່ງເປັນອະດີດພະນັກງານລັດ ຢູ່ແຂວງຫຼວງນໍ້າທາ ແລະ ສ່ວນຫຼາຍແມ່ນນອນໃນຄະນະສະເພາະກິດຄວບຄຸມ, ແກ້ໄຂພະຍາດໂຄວິດ 19 ຂອງແຂວງ ທີ່ມີການກະທໍາຜິດ ຕິດພັນກັບການຈັດສົ່ງຄົນຕ່າງປະເທດກັບຄືນປະເທດ. ໃນກອງປະຊຸມພິຈາລະນາຄະດີດັ່ງກ່າວ, ສານໄດ້ເຊີນຜູ້ຕາງໜ້າຈາກອົງການຈັດຕັ້ງກ່ຽວຂ້ອງຂອງພັກ-ລັດ, ທະຫານ, ຕໍາຫຼວດ, ອົງການຈັດຕັ້ງມະຫາຊົນ, ຄອບຄົວຍາດພີ່ນ້ອງຂອງຈໍາເລີຍ ເຂົ້າຮ່ວມເປັນສັກຂີພິຍານ.

ສານໄດ້ດໍາເນີນກອງປະຊຸມຕາມກົດໝາຍ ແລະ ຂັ້ນຕອນທີ່ກໍານົດໄວ້ ເພື່ອພິຈາລະນາຄະດີຕໍ່ຈໍາເລີຍທັງໝົດ 13 ຄົນ, ຍິງ 1 ຄົນ ຕາມຄໍາສັ່ງຟ້ອງຜູ້ຖືກຫາຂຶ້ນສານ ແລະ ຄໍາຖະແຫຼງ ສະບັບເລກທີ 90/ອຍກຂ. ຫຼທ, ລົງວັນທີ 5 ສິງຫາ 2024 ຂອງຫົວໜ້າອົງການໄອຍະການປະຊາຊົນແຂວງຫຼວງນໍ້າທາ. ຜ່ານການໄຕ່ສວນຄະດີ ແລະ ການຄົ້ນຄວ້າພິຈາລະນາຂອງສານ ເຫັນວ່າ ຈໍາເລີຍທັງ 13 ຄົນ ມີຄວາມຜິດຄົບ 4 ອົງປະກອບຂອງການກະທໍາຜິດທາງອາຍາ ໃນການສໍ້ລາດບັງຫຼວງ ຕາມຄໍາຖະແຫຼງຂອງອົງການໄອຍະການປະຊາຊົນແຂວງຫຼວງນໍ້າທາ ແລະ ໄດ້ຕັດສິນລົງໂທດຕໍ່ຈໍາເລີຍ 13 ຄົນດັ່ງກ່າວ. ໃນນັ້ນ ມີໂທດຕັດອິດສະລະພາບຕະຫຼອດຊີວິດ 3 ຄົນ, ໂທດຕັດອິດສະລະພາບ 20 ປີ 1 ຄົນ, ໂທດຕັດອິດສະລະພາບ 10 ປີ 6 ຄົນ, ໂທດຕັດອິດສະລະພາບ 9 ປີ 6 ເດືອນ 1 ຄົນ, ໂທດຕັດອິດສະລະພາບ 8 ປີ 6 ເດືອນ 1 ຄົນ, ໂທດຕັດອິດສະລະພາບ 4 ປີ 6 ເດືອນ 1 ຄົນ. ພ້ອມນັ້ນ, ສານຍັງໄດ້ຕັດສິນໂທດປັບໃໝ ແລະ ຮິບຊັບທີ່ໄດ້ຈາກການກະທໍາຜິດທັງໝົດ.

ລາຍລະອຽດມີດັ່ງນີ້:
1.ທ້າວ ພົມມະສຸກ ວິໄລກຸນ (ຈໍາເລີຍ 1) ອະດີດຄະນະປະຈໍາພັກແຂວງ, ຮອງເຈົ້າແຂວງໆຫຼວງນໍ້າທາ ມີຄວາມຜິດທາງອາຍາໃນການສໍ້ລາດບັງຫຼວງ ໃນຂໍ້ຫາຍັກຍອກຊັບຂອງລັດ ຫຼື ລວມໝູ່, ຮັບສິນບົນ, ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ ເອົາຊັບຂອງລັດ, ລວມໝູ່ ຫຼື ບຸກຄົນ ແລະ ຟອກເງິນ. ຖືກລົງໂທດຕັດອິດສະລະພາບ ຕະຫຼອດຊີວິດ ແລະ ປັບໃໝ 826.212.626 ກີບ, ພ້ອມທັງ ຮິບຊັບທີ່ໄດ້ມາຈາກການກະທໍາຜິດ.

2.ທ້າວ ຄໍາຈັນ ອິນທອງໄຊ (ຈໍາເລີຍ 2) ອະດີດກໍາມະການປະຈໍາພັກແຂວງ, ປະທານແນວລາວສ້າງຊາດແຂວງ ມີຄວາມຜິດທາງອາຍາ ໃນການສໍ້ລາດບັງຫຼວງ ໃນຂໍ້ຫາ ຍັກຍອກຊັບຂອງລັດ ຫຼື ລວມໝູ່, ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບຂອງລັດ, ລວມໝູ່ ຫຼື ບຸກຄົນ ແລະ ຟອກເງິນ. ຖືກລົງໂທດຕັດອິດສະລະພາບ 20 ປີ ແລະ ປັບໃໝ 311.363.170 ກີບ, ພ້ອມທັງຮິບຊັບທີ່ໄດ້ມາຈາກການກະທໍາຜິດ.

3.ທ້າວ ຄໍາພັດ ພົມພິທັກ (ຈໍາເລີຍ 3) ພະນັກງານບໍານານ, ອະດີດຮອງຫົວໜ້າກອງບັນຊາການ ປກສ ແຂວງ ມີຄວາມຜິດທາງອາຍາ ໃນການສໍ້ລາດບັງຫຼວງ ໃນຂໍ້ຫາ ຍັກຍອກຊັບຂອງລັດ ຫຼື ລວມໝູ່, ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບຂອງລັດ, ລວມໝູ່ ຫຼື ບຸກຄົນ. ຖືກລົງໂທດຕັດອິດສະລະພາບ 10 ປີ ແລະ ປັບໃໝ 5.220.280 ກີບ, ພ້ອມທັງຮິບຊັບທີ່ໄດ້ມາຈາກການກະທໍາຜິດ.

4.ທ້າວ ແກ້ວ ອິນທະວົງ (ຈໍາເລີຍ 4) ອະດີດຮອງຫົວໜ້າພະແນກສາທາລະນະສຸກແຂວງ ມີຄວາມຜິດທາງອາຍາໃນການສໍ້ລາດບັງຫຼວງ ໃນຂໍ້ຫາຍັກຍອກຊັບຂອງລັດ ຫຼື ລວມໝູ່, ຮັບສິນບົນ, ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ ເອົາຊັບຂອງລັດ, ລວມໝູ່ ຫຼື ບຸກຄົນ ແລະ ຟອກເງິນ. ຖືກລົງໂທດຕັດອິດສະລະພາບ ຕະຫຼອດຊີວິດ ແລະ ປັບໃໝ 765.489.002, 85 ກີບ, ພ້ອມທັງ ຮິບຊັບທີ່ໄດ້ມາຈາກການກະທໍາຜິດ.

5.ທ້າວ ພູຂົງ ແກ້ວກາງເພັງ (ຈໍາເລີຍ 5) ອະດີດຮອງຫົວໜ້າຫ້ອງວ່າການແຂວງ ມີຄວາມຜິດທາງອາຍາໃນການສໍ້ລາດບັງຫຼວງ ໃນຂໍ້ຫາຍັກຍອກຊັບຂອງລັດ ຫຼື ລວມໝູ່, ຮັບສິນບົນ, ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ ເອົາຊັບຂອງລັດ, ລວມໝູ່ ຫຼື ບຸກຄົນ ແລະ ຟອກເງິນ. ຖືກລົງໂທດຕັດອິດສະລະພາບ ຕະຫຼອດຊີວິດ ແລະ ປັບໃໝ 776.303.476 ກີບ, ພ້ອມທັງ ຮິບຊັບທີ່ໄດ້ມາຈາກການກະທໍາຜິດ.

6.ທ້າວ ເພັດມະໂນຈິດ ໄຊຍະທີ (ຈໍາເລີຍ 6) ອະດີດຫົວໜ້າຂະແໜງພົວພັນຮ່ວມມືສາກົນ ພະແນກການຕ່າງ ປະເທດແຂວງ ມີຄວາມຜິດທາງອາຍາໃນການສໍ້ລາດບັງຫຼວງ ໃນຂໍ້ຫາ ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ ເອົາຊັບຂອງລັດ, ລວມໝູ່ ຫຼື ບຸກຄົນ. ຖືກລົງໂທດຕັດອິດສະລະພາບ 8 ປີ 6 ເດືອນ ແລະ ປັບໃໝ 3.198.523 ກີບ, ພ້ອມທັງ ຮິບຊັບທີ່ໄດ້ມາຈາກການກະທໍາຜິດ.

7.ທ້າວ ມານະຈິດ ຫຼວງລືໄຊ (ຈໍາເລີຍ 7) ອະດີດພະນັກງານວິຊາການ ພະແນກສາທາລະນະສຸກແຂວງ ມີຄວາມຜິດທາງອາຍາ ໃນການສໍ້ລາດບັງຫຼວງ ໃນຂໍ້ຫາ ຍັກຍອກຊັບຂອງລັດ ຫຼື ລວມໝູ່, ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບຂອງລັດ, ລວມໝູ່ ຫຼື ບຸກຄົນ ແລະ ຟອກເງິນ. ຖືກລົງໂທດຕັດອິດສະລະພາບ 10 ປີ ແລະ ປັບໃໝ 306.538.878,5 ກີບ, ພ້ອມທັງຮິບຊັບທີ່ໄດ້ມາຈາກການກະທໍາຜິດ.

8.ທ້າວ ວົງເພັດ ຊັນຊາຍ (ຈໍາເລີຍ 8) ອະດີດພະນັກງານວິຊາການ ຫ້ອງວ່າການແຂວງ ມີຄວາມຜິດທາງອາຍາ ໃນການສໍ້ລາດບັງຫຼວງ ໃນຂໍ້ຫາ ຍັກຍອກຊັບຂອງລັດ ຫຼື ລວມໝູ່, ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບຂອງລັດ, ລວມໝູ່ ຫຼື ບຸກຄົນ. ຖືກລົງໂທດຕັດອິດສະລະພາບ 10 ປີ ແລະ ປັບໃໝ 7.313.895 ກີບ, ພ້ອມທັງຮິບຊັບທີ່ໄດ້ມາຈາກການກະທໍາຜິດ.

9.ທ້າວ ຄໍາມອນ ດວງພະຈັນ (ຈໍາເລີຍ 9) ອະດີດຮອງຫົວໜ້າຂະແໜງຄວບຄຸມພະຍາດຕິດຕໍ່ ພະແນກ ສາທາລະນະສຸກແຂວງ ມີຄວາມຜິດທາງອາຍາ ໃນການສໍ້ລາດບັງຫຼວງ ໃນຂໍ້ຫາ ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບຂອງລັດ, ລວມໝູ່ ຫຼື ບຸກຄົນ, ປອມແປງເອກະສານ ຫຼື ນໍາໃຊ້ເອກະສານປອມ ແລະ ຟອກເງິນ. ຖືກລົງໂທດຕັດອິດສະລະພາບ 10 ປີ ແລະ ປັບໃໝ 306.499.550 ກີບ, ພ້ອມທັງຮິບຊັບທີ່ໄດ້ມາຈາກການກະທໍາຜິດ.

10.ທ້າວ ຄອນທອງ ເລື່ອງຄໍາມາ (ຈໍາເລີຍ 10) ອະດີດຫົວໜ້າຄະນະຄຸ້ມຄອງເຂດເສດຖະກິດພິເສດບໍ່ເຕັນ ມີຄວາມຜິດທາງອາຍາ ໃນການສໍ້ລາດບັງຫຼວງ ໃນຂໍ້ຫາ ຍັກຍອກຊັບຂອງລັດ ຫຼື ລວມໝູ່, ໃຫ້ສິນບົນ ແລະ ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບຂອງລັດ, ລວມໝູ່ ຫຼື ບຸກຄົນ. ຖືກລົງໂທດຕັດອິດສະລະພາບ 10 ປີ ແລະ ປັບໃໝ 5.813.998,86 ກີບ, ພ້ອມທັງຮິບຊັບທີ່ໄດ້ມາຈາກການກະທໍາຜິດ.

11.ນາງ ປິ່ນແກ້ວ ວິວັນໄຊ (ຈໍາເລີຍ 11) ອະດີດຮອງຫົວໜ້າຄະນະຄຸ້ມຄອງເຂດເສດຖະກິດພິເສດບໍ່ເຕັນ ມີຄວາມຜິດທາງອາຍາ ໃນການສໍ້ລາດບັງຫຼວງ ໃນຂໍ້ຫາ ຍັກຍອກຊັບຂອງລັດ ຫຼື ລວມໝູ່, ໃຫ້ສິນບົນ ແລະ ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບຂອງລັດ, ລວມໝູ່ ຫຼື ບຸກຄົນ. ຖືກລົງໂທດຕັດອິດສະລະພາບ 10 ປີ ແລະ ປັບໃໝ 5.113.428,6 ກີບ, ພ້ອມທັງຮິບຊັບທີ່ໄດ້ມາຈາກການກະທໍາຜິດ.

12.ທ້າວ ແສງພາວັນ ແກ້ວມະນີວົງ (ຈໍາເລີຍ 12) ອະດີດຮອງຫົວໜ້າຄະນະຄຸ້ມຄອງເຂດເສດຖະກິດພິເສດບໍ່ເຕັນ ມີຄວາມຜິດທາງອາຍາ ໃນການສໍ້ລາດບັງຫຼວງ ໃນຂໍ້ຫາ ຍັກຍອກຊັບຂອງລັດ ຫຼື ລວມໝູ່, ສວຍໃຊ້ຖານະຕໍາ ແໜ່ງ, ສິດອໍານາດ, ໜ້າທີ່ເອົາຊັບຂອງລັດ, ລວມໝູ່ ຫຼື ບຸກຄົນ. ຖືກລົງໂທດຕັດອິດສະລະພາບ 9 ປີ 6 ເດືອນ ແລະ ປັບໃໝ 2.025.630 ກີບ, ພ້ອມທັງຮິບຊັບທີ່ໄດ້ມາຈາກການກະທໍາຜິດ.

13.ທ້າວ ພົງສັກ ວົງມະນີ (ຈໍາເລີຍ 13) ອະດີດຮອງຫົວໜ້າກອງບັນຊາການ ປກສ ເຂດບໍ່ເຕັນ ມີຄວາມຜິດທາງອາຍາ ໃນການສໍ້ລາດບັງຫຼວງ ໃນຂໍ້ຫາ ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບຂອງລັດ, ລວມໝູ່ ຫຼື ບຸກຄົນ. ຖືກລົງໂທດຕັດອິດສະລະພາບ 4 ປີ 6 ເດືອນ ແລະ ປັບໃໝ 920.540 ກີບ, ພ້ອມທັງຮິບຊັບທີ່ໄດ້ມາຈາກການກະທໍາຜິດ.

ແຫຼ່ງຂ່າວຈາກ: ປະຊາຊົນ

ບົດຄວາມຫຼ້າສຸດ

ພະຍາກອນອາກາດ ແຕ່ເວລາ 07 ໂມງ ຂອງວັນທີ 28/03/2025 ຫາ ເວລາ 07 ໂມງ ຂອງວັນທີ 29/03/2025

ກົມອຸຕຸແຈ້ງເຕືອນສະພາບອາກາດ 28/3/25 ພາກເໜືອຈະມີອາກາດຮ້ອນ-ຮ້ອນເອົ້າ ສ່ວນພາກກາງມີເນື້ອທີ່ຝົນປົກຫຸ້ມ 50%. ຄວາມກົດດັນຕໍ່າຂອງອາກາດຮ້ອນ ຍັງຈະສືບຕໍ່ປົກຄຸມຢູ່ທົ່ວທຸກພາກ ຂອງປະເທດລາວ ດ້ວຍກໍາລັງອ່ອນ ຫາປານກາງ, ສົມທົບກັບກະແສລົມ ຕາເວັນຕົກພັດປົກຄຸມ, ຊຶ່ງຈະເຮັດໃຫ້ອາກາດຍັງສືບຕໍ່ຮ້ອນ ພ້ອມມີ ໝອກແຫ້ງປົກຫຸ້ມຢູ່ທົ່ວໄປໃນຕອນກາງເວັນຢູ່ໃນແຕ່ລະພາກ...

ເຊັນສັນຍາຮ່ວມມືຍຸດທະສາດດ້ານການຂົນສົ່ງດິຈິຕອນ-ໂລຈິສຕິກພາຍໃນປະເທດຂອງດ່ານສາກົນສິນຄ້າທ່າບົກທ່ານາແລ້ງ

ເພື່ອຍົກລະດັບການຂົນສົ່ງ ຂອງ ສປປ ລາວ ເຊັນສັນຍາຮ່ວມມືຍຸດທະສາດດ້ານການຂົນສົ່ງດິຈິຕອນ-ໂລຈິສຕິກພາຍໃນປະເທດຂອງດ່ານສາກົນສິນຄ້າທ່າບົກທ່ານາແລ້ງ. ເຊັນສັນຍາຮ່ວມມືຍຸດທະສາດດ້ານການຂົນສົ່ງດິຈິຕອນ-ໂລຈິສຕິກພາຍໃນປະເທດຂອງດ່ານສາກົນສິນຄ້າທ່າບົກທ່ານາແລ້ງ ເພື່ອຍົກລະດັບການຂົນສົ່ງ ຂອງ ສປປ ລາວ ຮອງຮັບການນໍາເຂົ້າ - ສົ່ງອອກ, ສົ່ງອອກຕໍ່ ແລະ ຜ່ານແດນ...

ພະຍາກອນອາກາດ ປະຈໍາວັນທີ 27 ມີນາ 2025, ເວລາ 12 ໂມງ 00

ຮ້ອນຈັດອາກາດຕອນສວາຍ ພາກເໜືອມີອຸນຫະພູມສູງສຸດ 40 ອົງສາ ສ່ວນພາກໃຕ້ມີເນື້ອທີ່ຝົນປົກຫຸ້ມ 50% ຄວາມກົດດັນຕໍ່າຂອງອາກາດຮ້ອນ ຍັງຈະສືບຕໍ່ປົກຄຸມຢູ່ທົ່ວທຸກພາກຂອງປະເທດລາວດ້ວຍກໍາລັງປານກາງ, ສົມທົບກັບກະແສລົມຕາເວັນຕົກພັດປົກຄຸມ, ຊຶ່ງຈະເຮັດໃຫ້ ອາກາດຍັງສືບຕໍ່ຮ້ອນ ພ້ອມມີຫມອກແຫ້ງປົກຫຸ້ມຢູ່ທົ່ວໄປໃນຕອນກາງເວັນຢູ່ໃນແຕ່ ລະພາກ ແລະ ຈະມີຝົນຕົກຟ້າຮ້ອງຟ້າເຫຼື້ອມໃນລະດັບຄ່ອຍ...

ເກົາຫຼີໃຕ້ປະເຊີນກັບໄຟປ່າຄັ້ງທີ່ຮ້າຍແຮງທີ່ສຸດ ຫຼ້າສຸດເສຍຊີວິດແລ້ວ 24 ຄົນ

ສະຖານະການໄຟປ່າທາງພາກຕາເວັນອອກສຽງໃຕ້ ລຸກລາມຢ່າງໄວວາ ຫຼ້າສຸດເສຍຊີວິດທັງໝົດ 24 ຄົນ ແລະ ບາດເຈັບອີກຫຼາຍຄົນ. ສຳນັກຂ່າວຕ່າງປະເທດລາຍງານໃນວັນທີ 27 ມີນາ 2025 ກ່ຽວກັບສະຖານະການໄຟປ່າຄັ້ງຮ້າຍແຮງທີ່ສຸດໃນພາກຕາເວັນອອກສຽງໃຕ້ຂອງເກົາຫຼີໃຕ້ ທີ່ຍັງຄົງລຸກລາມເຜົາວັດເກົ່າແກ່ ແລະ ໄໝ້ອາຄານມໍລະດົກໂລກ...