ວັນທີ 15 ກໍລະກົດ 2024 ຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ ເມືອງງອຍ ແຂວງຫຼວງພະບາງ ໄດ້ອອກປະກາດແຈ້ງການມາຍັງອົງການປົກຄອງ 5 ບ້ານ ຄື: ບ້ານຫ້ວຍປຸງ, ຫ້ວຍເຫຼັກ, ໜອງອ່ຽນ, ສົບຮຸນ ແລະ ບ້ານໜອງຂຽວ ຊາບວ່າ: ປັດຈຸນີ້ມີກຸ່ມຄົນບໍ່ຫວັງດີຈົງໃຈນຳເອົາສານເຄມີ ໄປຖີ້ມລົງຫ້ວຍຮຸນຢູ່ເຂດຂົວຫ້ວຍຊ່ອງ, ບ້ານຫ້ວຍປຸງ ເປັນຈຳນວນຫຼາຍ ເຮັດໃຫ້ມີຜົນກະທົບຕໍ່ສິ່ງແວດລ້ອມເປັນຕົ້ນແມ່ນ ກະທົບຕໍ່ສັດນໍ້າ ແລະ ອື່ນໆ ຕາຍເປັນຈໍານວນຫຼາຍ.
ສະນັ້ນຂໍໃຫ້ພໍ່ແມ່ປະຊາຊົນຫ້າມຕັກນໍ້າມາບໍລິໂພກ, ຫ້າມລົງອາບນໍ້າ ແລະ ຈັບເອົາປາ ຫຼື ສັດຕາຍທຸກຊະນິດ ຕັ້ງແຕ່ບ້ານຫ້ວຍປຸງລົງມາຮອດບບ້ານສົບຮຸນ, ໜອງຂຽວ ມາປຸງແຕ່ງອາຫານເພື່ອບໍລິໂພກໂດຍເດັດຂາດ ເພາະສານເຄມີດັ່ງກ່າວເປັນອັນຕະລາຍຮ້າຍແຮງຕໍ່ສຸຂະພາບ, ຂໍໃຫ້ພ້ອມກັນຈັດຕັ້ງປະຕິບັດຢ່າງເຂັ້ມງວດ.ພ້ອມດຽວກັນນີ້ ທາງຫ້ອງການກະສິກຳ ແລະ ປ່າໄມ້ ເມືອງງອຍ ກໍໄດ້ອອກແຈ້ງການມາຍັງພະນັກງານ ທະຫານ, ຕຳຫຼວດ ພໍ່ແມ່ປະຊາຊົນ ພາຍໃນກຸ່ມເທດສະບານ ເມືອງງອຍ ເຊັນກັນ.
ທາງຫ້ອງການທີ່ກ່ຽວຂ້ອງ ຈຶ່ງແຈ້ງມາຍັງທ່ານ, ອົງການຈັດຕັ້ງ ພ້ອມດ້ວຍພໍ່ແມ່ປະຊາຊົນບ້ານພາຍໃນກຸ່ມເທດສະບານ ເມືອງງອຍ ຊາບຢ່າງທົ່ວເຖິງກັນ ແລະ ຊ່ວຍກັນແນະນໍາ ໃຫ້ລູກຫຼານ ບໍ່ໃຫ້ຫາປາ ຫຼື ເອົາປາທີ່ຕາຍຢູ່ສາຍນໍ້າຮຸນມາກິນຢ່າງເດັດຂາດ.
ສ່ວນຂໍ້ມູນຜູ້ທີ່ນຳເອົາສາເຄມີໄປຖິ້ມລົງແມ່ນ້ຳໃນຄັ້ງນີ້ ທາງເຈົ້າໜ້າທີ່ຍັງຢູ່ໃນຂັ້ນຕອນການສືບສວນ ແລ້ວຈະແຈ້ງໃຫ້ຊາບຕາມພາຍຫຼັງ.
ຂໍ້ມູນ: ຖວທ ເມືອງງອຍ Luang prabang news