ທ່ານ ນາງ ວຽງພອນ ແກ້ວຄູນສີ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ໄດ້ໃຫຮູ້ໃນກອງປະຊຸມສະໄໝສາມັນເທື່ອທີ 7 ຂອງ ສະພາປະຊາຊົນ ນວ ຊຸດທີ II ໃນວັນທີ 9 ກໍລະກົດ 2024 ນີ້ວ່າ:
ໃນ 5 ເດືອນຕົ້ນປີ 2024 ນີ້, ນະຄອນຫຼວງວຽງຈັນ ມີນັກທ່ອງທ່ຽວເຂົ້າມາທ່ອງທ່ຽວ ທັງໝົດ 674.196 ເທື່ອຄົນ ເພີ່ມຂຶ້ນ 26,31%, ຖ້າທຽບໃສ່ໄລຍະດຽວກັນຂອງປີຜ່ານມາ. ໃນນັ້ນ, ລາຍຮັບທົ່ວສັງຄົມ ເພີ່ມຂຶ້ນ 44,02%, ສົມທຽບໃສ່ໄລຍະດຽວກັນຂອງປີຜ່ານມາ, ທຽບໃສ່ແຜນການປີ ປະຕິບັດໄດ້ 67,42%.
ພ້ອມກັນນີ້, ມີນັກລົງທຶນທັງພາຍໃນ ແລະ ຕ່າງປະເທດ ເຂົ້າມາລົງທຶນໃນທຸລະກິດການທ່ອງທ່ຽວ ທັງໝົດ 58 ຫົວໜ່ວຍ. ໃນນັ້ນ, ທຸລະກິດດ້ານທີ່ພັກແຮມ 16 ຫົວໜ່ວຍ, ທຸລະກິດອາຫານ-ເຄື່ອງດື່ມ 20 ຫົວໜ່ວຍ, ບໍລິສັດທ່ອງທ່ຽວ 16 ຫົວໜ່ວຍ, ສະຖານທີ່ທ່ອງທ່ຽວ 2 ຫົວໜ່ວຍ, ທຸລະກິດນວດ ແລະ ສະປາ 4 ຫົວໜ່ວຍ.
ຂ່າວ: ວສລ