ຟີຟ່າ ແລະ ສະຫະພັນບານເຕະອາຊີ (ເອເອັຟຊີ) ໄດ້ຕົກລົງເຫັນດີກັນຈັດເກມຕັດສິນລະຫວ່າງ ເກົາຫຼີເໜືອ ພົບກັບ ຊີເຣຍ ໃນການແຂ່ງຂັນບານໂລກ 2026 ຮອບຄັດເລືອກໂຊນອາຊີ ເຊິ່ງຈະຈັດເກມການແຂ່ງຂັນດັ່ງກ່າວຂຶ້ນທີ່ສະໜາມກິລາແຫ່ງຊາດຫຼັກ 16 ໃນວັນທີ 6 ມິຖຸນາ 2024 ນີ້.

ເຊິ່ງເກມການແຂ່ງຂັນດັ່ງກ່າວເກົາຫຼີເໜືອເປັນເຈົ້າພາບ, ​ແຕ່ທາງ FIFA ​ເປັນ​ຫ່ວງ​ວ່າ​ການ​ແຂ່ງຂັນ​ບໍ່​ສາມາດ​ຈັດ​ຂຶ້ນ​ປຽງຍາງ ເມືອງຫຼວງຂອງເກົາຫຼີເໜືອ, ​ຈຶ່ງ​ຮຽກຮ້ອງ​ໃຫ້​ຈັດ​ຂຶ້ນ​ຢູ່​ສະໜາມ​ກິລາກາງເຊິ່ງຈະໃຊ້ສະໜາມກິລາແຫ່ງຊາດຫຼັກ 16 ໃນການແຂ່ງຂັນ.

ການແຂ່ງຂັນບານໂລກ 2026 ຈະຈັດຂຶ້ນຢູ່ທີ່ທະວີບອາເມລິກາເໜືອ ເຊິ່ງຈະມີເຈົ້າພາບທັງໝົດ 3 ປະເທດໄດ້ແກ່: ສະຫະລັດອາເມລິກາ, ແຄນນາດາ ແລະ ແມັກຊິໂກ ເຊິ່ງເປັນຄັ້ງທຳອິດຂອງບານໂລກທີ່ມີເຈົ້າພາບເຖິງ 3 ປະເທດ ອີກທັງບານໂລກ 2026 ທີມທີ່ໄດ້ເຂົ້າມາແຂ່ງຂັນໃນຮອບສຸດທ້າຍຈະຖືກເພີ່ມເປັນ 48 ທີມອີກດ້ວຍ, ທັງນີ້ການແຂ່ງຂັນບານໂລກ 2022 ທີ່ຜ່ານມາເປັນທາງດ້ານປະເທດອາເຈນຕິນ່າເຂົ້າຊິງກັບປະເທດຝຣັ່ງ ແຕ່ເປັນທາງທັບຟ້າຂາວທີ່ຄົມກວ່າສາມາດເອົາຊະນະໄດ້ດ້ວຍສະກໍ (3-3) ຈຸດໂທດ (4-2) ຄວ້າແຊ້ມໂລກສະໄໝທີ 3 ມາຄອງໄດ້ສຳເລັດ.