ວັນທີ 16 ກຸມພາ ທີ່ຜ່ານມາ, ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ພ້ອມດ້ວຍບັນດາພະແນກການ, ພາກສ່ວນທີ່ກ່ຽວຂ້ອງໄດ້ລົງຕິດຕາມ ເສັ້ນທາງຊອຍບ້ານໂພນສະໜາມ, ເມືອງທ່າແຂກ ເພື່ອປັບປຸງກໍ່ສ້າງເປັນທາງປູຢາງ 2 ຊັ້ນ.
ໃນປີ 2022 ທາງການນໍາແຂວງຄໍາມ່ວນ ໄດ້ອະນຸມັດໃຫ້ພະແນກໂຍທາທິການ ແລະ ຂົນສົ່ງແຂວງ ສໍາຫຼວດເສັ້ນທາງຫຼັກ ແລະ ເສັ້ນທາງຊອຍພາຍໃນເທສະບານເມືອງທ່າແຂກ ເຊິ່ງມີທັງໝົດຈຳນວນ 10 ເສັ້ນ.
ໃນນັ້ນ ປີ 2023 ແມ່ນໄດ້ອະນຸມັດໃຫ້ກໍ່ສ້າງແລ້ວຈຳນວນ 02 ເສັ້ນ, ໂດຍສືບຕໍ່ແຜນງານດັ່ງກ່າວໃນປີ 2024 ນີ້ ການນຳຂອງແຂວງກໍ່ໄດ້ອະນຸມັດການປັບປຸງກໍ່ສ້າງເສັ້ນທາງຊອຍ ບ້ານໂພນສະໜາມ, ເມືອງທ່າແຂກ, ເຊິ່ງເປັນທາງປູຢາງ 2 ຊັ້ນ, ມີຄວາມຍາວ 1.200 ແມັດ, ໜ້າທາງກວ້າງ 5 ແມັດ, ເຊິ່ງຈະໄດ້ເລີ່ມລົງມືຈັດຕັ້ງປະຕິບັດໃນໄວໆນີ້ ແລະ ຄາດວ່າຈະໃຫ້ສໍາເລັດການກໍ່ສ້າງກ່ອນບຸນປີໃໝ່ລາວ ພສ 2567 ທີ່ຈະມາເຖິງນີ້.
ຂ່າວ: Khammouane News