ການແຂ່ງຂັນກິລາບານສົ່ງໃນຮົ່ມ ເບຍລາວ ແຊ໋ມປ້ຽນຊິບ 2023 (Beerlao Volleyball Championship 2023) ໄດ້ສໍາເລັດໃນວັນທີ 10 ທັນວາ 2023 ນີ້ ຊຶ່ງແຂ່ງຂັນກັນຢູ່ສະໂມສອນກິລາບານສົ່ງໃນຮົ່ມ ກອງທັບ (ຫຼັກ 5) ເມືອງໄຊເຊດຖາ, ນະຄອນຫຼວງ ວຽງຈັນ ເລີ່ມແຕ່ວັນທີ 4 ພະຈິກ 2023 ເປັນຕົ້ນມາ.

ການແຂ່ງຂັນຄັ້ງນີ້ ປະເພດຊາຍ ມີ 8 ສະໂມສອນ ແລະ ປະເພດຍິງ ມີ 6 ສະໂມສອນ ເຂົ້າຮ່ວມການແຂ່ງ ຂັນ ໂດຍໄດ້ຮັບການອຸປະຖໍາຈາກ ບໍລິສັດ ເບຍລາວ ຈໍາກັດ ມູນຄ່າ 350 ລ້ານກີບ. ການແຂ່ງຂັນທັງປະເພດຊາຍ ແລະ ຍິງ ແມ່ນແຂ່ງຂັນແບບພົບກັນໝົດ ແລະ ແຂ່ງສະເພາະວັນເສົາ ແລະ ວັນອາທິດ. ທີມໃດໄດ້ຄະແນນຫລາຍກວ່າໄດ້ແຊ້ມໄປຄອງ.

ຜົນການແຂ່ງຂັນປະເພດຊາຍ: ຊະນະເລີດ ສະໂມສອນ ອິນທະສອນ ວີຊີ ໄດ້ຮັບຂັນ 1 ໜ່ວຍ, ພ້ອມຫລຽນຄໍາແລະເງິນສົດ 25 ລ້ານກີບ, ຮອງຊະນະເລີດ ສະໂມສອນກອງທັບ ໄດ້ຮັບຂັນ 1 ໜ່ວຍ, ພ້ອມຫລຽນເງິນ ແລະເງິນສົດ 15 ລ້ານກີບ, ອັນດັບ 3 ສະໂມສອນ ລາວສະກາຍເວ ໄດ້ຮັບຫລຽນທອງ ພ້ອມເງິນສົດ 10 ລ້ານກີບ, ອັນດັບທີ 4 ສະໂມສອນ Grow-up ວີຊີ ໄດ້ຮັບເງິນສົດ 7 ລ້ານກີບ, ອັນດັບທີ 5 ວິທະຍາຄານ ສັນຕິບານ ປະຊາຊົນ ກະຊວງ ປກສ ໄດ້ຮັບເງິນສົດ 6 ລ້ານກີບ, ອັນດັບທີ 6 ສະໂມສອນ ວຽງຈັນ ວີຊີ ໄດ້ຮັບເງິນສົດ 5 ລ້ານກີບ, ອັນດັບທີ 7 ສະໂມສອນ ມາສເຕີ 7 ວີຊີ ໄດ້ຮັບເງິນສົດ 4 ລ້ານກີບ, ອັນດັບທີ 8 ສະໂມສອນ ອິນເທັນເຊີນ ໄດ້ຮັບເງິນສົດ 3 ລ້ານກີບ.

ຜົນການແຂ່ງຂັນປະເພດຍິງ: ຊະນະເລີດ ສະໂມສອນ ກົມໃຫຍ່ການເມືອງກອງທັບ ໄດ້ຮັບຂັນ 1 ໜ່ວຍ, ພ້ອມຫລຽນຄໍາ ແລະ ເງິນສົດ 15 ລ້ານກີບ, ຮອງຊະນເລີດ ສະໂມສອນ ກອງທັບ ໄດ້ຮັບຂັນ 1 ໜ່ວຍ, ພ້ອມຫລຽນເງິນ ແລະ ເງິນສົດ 10 ລ້ານກີບ, ອັນດັບທີ 3 ສະໂມສອນ ວຽງຈັນ ວີຊີ ໄດ້ຮັບຫລຽນທອງ ພ້ອມເງິນສົດ 7 ລ້ານກີບ, ອັນດັບທີ 4 ສະໂມສອນ ອິນທະສອນ ວີຊີ ໄດ້ຮັບເງິນສົດ 5 ລ້ານກີບ, ອັນດັບທີ 5 ສະໂມສອນ ມາສເຕີ 7 ເອັບຊີ ໄດ້ຮັບເງິນສົດ 4 ລ້ານກີບ, ອັນດັບທີ 6 ສະມໂສອນ ເອັດອີຊີ ວິຊີ ໄດ້ຮັບເງິນສົດ 3 ລ້ານກີບ.

ນອກຈາກນີ້ ຍັງມີລາງວັນເສີບບານດີເດັ່ນຍິງ-ຊາຍ, ບ໋ອກດີເດັ່ນຍິງ-ຊາຍ, ບານໄວດີເດັ່ນຍິງ-ຊາຍ, ບານ 3 ຫຼັງດີເດັ່ນ ຍິງ-ຊາຍ ແລະ ລາງວັນອື່ນໆ. ໃຫ້ກຽດເຂົ້າຮ່ວມ ແລະ ມອບລາງວັນໂດຍທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ, ເລຂາທິການຄະນະກຳມະການໂອແລມປິກແຫ່ງຊາດລາວ ແລະ ທ່ານ ຈັນສະໝອນ ຜອງຈັນທາ ປະທານສະຫະພັນບານສົ່ງແຫ່ງຊາດລາວ.