ພິທີຖະແຫຼງການການກະກຽມເຂົ້າຮ່ວມ ເອຊຽນ ເກມ ຄັ້ງທີ 19 ຂອງ ທັບນັກກິລາລາວ ຈັດຂຶ້ນໃນວັນທີ 19 ກັນຍາ 2023 ທີ່ ສະໂມສອນ ຄະນະກໍາມະການໂອແລມປິກແຫ່ງຊາດລາວ ( ຄອລ ) ໃຫ້ກຽດເຂົ້າຮ່ວມໂດຍ ທ່ານ ກິແກ້ວ ໄຂຄໍາພິທູນ ຮອງນາຍົກ ລັດຖະມົນຕີ, ຜູ້ຊີ້ນໍາຂົງເຂດວຽກງານການປົກຄອງ ແລະ ວັດທະນະທໍາ-ສັງຄົມ, ທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກີລາ ພ້ອມດ້ວຍຄະນະນໍາ, ຄູຝຶກ ແລະ ນັກກີລາ 100 ກວ່າຕະຫຼອດຮອດສື່ມວນຊົນ ເຂົ້າຮ່ວມຢ່າງ ພ້ອມພຽງ.

ງານມະຫາກໍາກິລາເອຊຽນເກມ ຄັ້ງທີ 19 ຈະໄດ້ຈັດຂື້ນທີ່ ນະຄອນຫາງໂຈ ສປ. ຈີນ ລະຫວ່າງວັນທີ 23/09 ຫາ 8/10/2023, ປະເທດເຈົ້າພາບໄດ້ບັນຈຸ 40 ປະເພດກິລາ ເຂົ້າຮ່ວມແຂ່ງຂັນຫນ້ອຍກວ່າກິລາເອຊຽນເກມຄັ້ງທີ່ຜ່ານມາ ຄະນະກໍາມະການ ໂອແລມປິກແຫ່ງຊາດລາວ ແລະ ສະຫະພັນ ກິລາແຫ່ງຊາດ ໄດ້ຕົກລົງເປັນເອກະພາບສົ່ງ 16 ປະເພດກິລາ ເຂົ້າຮ່ວມ, ມີຈໍານວນພົນທັງຫມົດ 152 ຄົນ ດັ່ງນີ້ :
-ປະເພດກິລາທີ່ສະເຫນີຂໍໃຊ້ງົບປະມານຂອງລັດ ມີ 11 ປະເພດຄື: 1. ວູຊູ, 2. ກະຕໍ້, 3. ລົດຖີບ, 4. ເທຄວັນໂດ (ຕໍ່ສູ້), 5. ມວຍສາກົນ, 6. ຢູໂດ (ຕໍ່ສູ້), 7. ແລ່ນ-ລານ, 8. ລອຍນໍ້າ, 9. ກາຣາເຕ (ຕໍ່ສູ້), 10. ມວຍປ້ໍາ ແລະ 11. ຈຸວິດຊູ;
-ປະເພດກິລາທີ່ມອບໃຫ້ກຸ້ມຕົນເອງດ້ານງົບປະມານຮັບໃຊ້ ມີ 5 ປະເພດຄື: 1. ກອ໊ຟ, 2. ອີສະປອດ, 3. ຢິມນາສະຕິກ, 4. ເບສບອນ ແລະ 5. ຍິງປືນ.
ສ່ວນ ຈໍານວນນັກກິລາເຊື່ອຊາດລາວ :
ສໍາລັບນັກກິລາເຊື້ອຊາດລາວ ມີຈໍານວນ 06 ຄົນ, ໃນ 05 ປະເພດກິລາ ຄືດັ່ງນີ້ :
1) ນັກກິລາ ຈາກ ສະຫະລັດ ອາເມລິກາ ຈໍານວນ : 04 ຄົນ
– ມວຍປ້ໍາ 1 ຄົນ (ເປັນຊາຍ);
– ວູວິດຊູ 2 ຄົນ (ເປັນຊາຍ);
– ມວຍສາກົນ 1 ຄົນ (ເປັນຊາຍ).
2) ນັກກິລາ ຈາກ ປະເທດຝັ່ງ ຈໍານວນ : 02 ຄົນ
– ຢູໂດ 1 ຄົນ (ເປັນຍິງ);
– ລົດຖີບໃນຮົ່ມ 1 ຄົນ (ເປັນຍິງ).

ທີ່ມາ: ເສດຖະກິດ-ການຄ້າ