ຈາກເຫດການລົດທະຫານປີ້ນ ຢູ່ພູສາມສູມ ບ້ານນ້ຳເກັງ ເມືອງໝອກ ແຂວງຊຽງຂວາງ ໃນວັນທີ 24 ສິງຫາ 2023 ໜຶ່ງໃນຜູ້ເສຍຊີວິດນັ້ນກໍຄື ພັທ ກອງໃຈ ເຊັດຄຳຈັນ ເຮັດໃຫ້ຜູ້ເປັນຄອບຄົວຕ່າງເສຍໃຈ ໂດຍສະເພາະຜູ້ເປັນລູກສາວທີ່ຍັງຢູ່ແຂວງບໍ່ແກ້ວ ເພື່ອຢາກໄປພົບໜ້າພໍ່ເປັນຄັ້ງສຸດທ້າຍ ລູກສາວຈຶ່ງໄດ້ຊື້ປີ້ຍົນເພື່ອເດີນທາງກັບ ແຕ່ປາກົດວ່າຖ້ຽວບິນດັ່ງກ່າວເຕັມແລ້ວ.
ຕໍ່ມາຜູ້ເປັນລູກສາວ ຈຶ່ງໄດ້ປະກາດຫາຄົນທີ່ສາມາດເອົາປີ້ຍົນໃຫ້ໄດ້ ເພື່ອທີ່ຈະເດີນທາງກັບ, ໂຊກຍັງດີ ທາງສາຍການບິນລາວແອລາຍ ໄດ້ພົບເຫັນໂພສດັ່ງກ່າວ ແລ້ວໄດ້ເຂົ້າມາຊ່ວຍ ເຊິ່ງສາຍການບິນກໍໄດ້ຕິດຕໍ່ຫາຜູ້ໂດຍສານຄົນອື່ນ ພົບວ່າມີຄົນຍົກເລີກຖ້ຽວບິນ ແລະ ເອົາບ່ອນນັ່ງຂອງຖ້ຽວບິນ ນະຄອນຫຼວງ-ຊຽງຂວາງໃຫ້.
ປັດຈຸບັນ ຜູ້ກ່ຽວໄດ້ເດີນທາງໄປນະຄອນຫຼວງວຽງຈັນ ເພື່ອທີ່ຈະເດີນທາງກັບຊຽງຂວາງແລ້ວ.
ທັ້ງນີ້ ອຸບັດຕິເຫດລົດຮັບສົ່ງນັກສຶກສາທະຫານ ທີ່ຈະໄປຮຽນຕໍ່ຢູ່ນະຄອນຫຼວງວຽງຈັນ ປີ້ນຢູ່ພູສາມສູມ ເມືອງໝອກ ແຂວງຊຽງຂວາງ ເຮັດໃຫ້ມີຄົນເສຍຊີວິດ 2 ຄົນ ບາດເຈັບ 30 ກວ່າຄົນ ສາເຫດມາຈາກລົດມື່ນທາງ ຈຶ່ງເສຍຫຼັກປີ້ນຂວ້ຳ.