ໃນວັນທີ 17 ມິຖຸນາ 2023 ກອງພັນປ້ອງກັນເຄື່ອນທີ່ ປກສ ແຂວງຄໍາມ່ວນ ເປີດການນໍາໃຊ້ສາງເກັບມ້ຽນເຄື່ອງຂອງກາງຄະດີ ໂດຍການເຂົ້າຮ່ວມຂອງທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ທ່ານ ບຸນມີ ພິມມະສອນ ປະທານສະພາປະຊາຊົນແຂວງ, ທ່ານ ພົຈວ ທອງສຸກ ຍາເອີລາວລີ ຫົວໜ້າກົມໃຫຍ່ພະລາທິການ ກະຊວງປ້ອງກັນຄວາມສະຫງົບ, ທ່ານ ພັອ ທິບພະຈັນ ໂພໄຊ ຫົວໜ້າກອງບັນຊາການ ປກສ ແຂວງ, ທ່ານ ພອນປະເສີດ ທໍາມະວົງສາ ປະທານບໍລິສັດ ພີພີເອສທີ ກໍ່ສ້າງເຄຫາສະຖານ ແລະ ຂົວທາງ ຈໍາກັດຜູ້ດຽວ ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.
ໂດຍໂຄງການກໍ່ສ້າງສາງເກັບມ້ຽນເຄື່ອງຂອງກາງຄະດີຂອງ ແຂວງຄໍາມ່ວນ ໄດ້ດໍາເນີນການກໍ່ສ້າງນັບແຕ່ວັນທີ 26 ຕຸລາ 2022 ປັດຈຸບັນສໍາເລັດ 100%, ເຊິ່ງມີຂະໜາດກວ້າງ 30 ແມັດ, ຍາວ 40 ແມັດ, ແບ່ງອອກເປັນ 2 ຫ້ອງ ໃນນີ້ມີຫ້ອງນິລະໄພຂະໜາດ ຈໍານວນ 2 ຫ້ອງ ແລະ ມີຫ້ອງເກັບເຄື່ອງສ້ອມແປງ ບົວລະບັດຮັກສາ 1 ຫ້ອງ, ໂຄງສ້າງຂອງອາຄານແມ່ນເບຕົ້ງເສີມເຫຼັກ, ຫຼັງຄາມຸງດ້ວຍອາລູ່ຊິ້ງ, ແອ້ມດ້ວຍຝາກໍ່ເບຕົ້ງສູງ 1,5 ແມັດ ແລະ ຕາໜ່າງຕາໝາກກອກສູງ 2,5 ແມັດ ໃນມູນຄ່າ 2,66 ຕື້ກີບ.
ແຫຼ່ງຂ່າວ ປະເທດລາວ Pathedlao