ອີງຕາມມະຕິ ກອງປະຊຸມສະພາແຫ່ງຊາດ ເລກທີ 63/ສພຊ, ລົງວັນທີ 9/12/22, ສະພາແຫ່ງຊາດໄດ້ຮັບຮອງເອົາທິດທາງແຜນງົບປະມານ ແຫ່ງລັດ ແລະ ແຜນເງິນຕາປະຈໍາປີ 2023 ຕາມການລາຍງານຂອງລັດຖະບານ ແລະ ການສະເຫນີຂອງກອງປະຊຸມສະໄຫມສາມັນ ເທື່ອທີ 4 ຂອງສະພາແຫ່ງຊາດຊຸດທີ IX ຊຶ່ງໄດ້ມີການວາງຄາດຫມາຍສູ້ຊົນ
ແຜນງົບປະມານແຫ່ງລັດ ປະຈໍາປີ 2023 ໄວ້ທີ່ 38.448 ຕື້ກີບ ເທົ່າກັບ 16,42% ຂອງ ລວມຍອດຜະລິດຕະພັນພາຍໃນ (GDP) ຊຶ່ງມູນຄ່າ GDP ເທົ່າກັບ 234.160 ຕື້ກີບ ໂດຍ ໃນນີ້ລາຍຮັບພາຍໃນ 34.898 ຕື້ກີບ (ລາຍຮັບພາສີ-ອາກອນ 29.460 ຕື້ກີບ, ລາຍຮັບບໍ່ແມ່ນ ພາສີ-ອາກອນ 5.438 ຕື້ກີບ ແລະ ລາຍຮັບການຊ່ວຍເຫຼືອ ເສີມ 3.550 ຕື້ກີບ)
ຂະນະທີ່ລາຍຈ່າຍທັງຫມົດທີ່ໄດ້ຮັບຮອງແມ່ນ 43.498 ຕື້ກີບເທົ່າກັບ 18,58% ຂອງGDP ຊຶ່ງໃນນີ້ ລາຍຈ່າຍບໍລິຫານປົກກະຕິ 29.030 ຕື້ກີບ (ເງິນເດືອນ ແລະ ເງິນອຸດຫນູນ 13.300 ຕື້ກີບ; ເງິນນະໂຍບາຍ ແລະ ເງິນຊ່ວຍຫນູນ 2.000 ຕື້ກີບ; ເງິນບໍລິຫານປົກກະຕິ 2.950 ຕື້ກີບ; ເງິນດັດສົມ, ສົ່ງຊ່ວຍຫນູນ, ບໍາລຸງ 2.350 ຕື້ກີບ; ລາຍຈ່າຍ ການເງິນ 7.630 ຕື້ກີບ; ລາຍຈ່າຍບັງເອີນອື່ນໆ 600 ຕື້ກີບ ແລະ ລາຍຈ່າຍຊື້ຊັບສົມບັດຄົງທີ່ 200 ຕື້ກີບ).
ສ່ວນ ລາຍ ຈ່າຍລົງທຶນ 14.468 ຕື້ກີບ ຊຶ່ງໃນນີ້ ລາຍຈ່າຍລົງທຶນພາຍໃນ 4.218 ຕື້ ກີບ (ລາຍຈ່າຍລົງທຶນປົກກະຕິ 2.500 ຕື້ກີບ ປະກອບມີ ໂຄງການຊໍາລະຫນີ້ສິນ 60%, ໂຄງການສືບຕໍ່ 30% ແລະ ໂຄງການໃຫມ່ 10%; ລາຍຈ່າຍບ້ວງອື່ນໆ 1.818 ຕື້ກີບ ປະກອບມີ ກອງທຶນທາງ 700 ຕື້ກີບ, ຫັນຊັບສິນເປັນທຶນ 2 ຕື້ກີບ; ບ້ວງປະກອບທຶນ 200 ຕື້ກີບ; ບ້ວງຈົດຮັບ-ຈົດຈ່າຍ ແລະ ລົງທຶນອື່ນໆ 916 ຕື້ກີບ). ລາຍຈ່າຍລົງທຶນຕ່າງປະເທດ ເປັນໂຄງການ 10.150 ຕື້ກີບ (ລາຍຈ່າຍຊ່ວຍເຫຼືອ ເປັນໂຄງການ 3.550 ຕື້ກີບ; ລາຍ ຈ່າຍກູ້ ຢືມເປັນໂຄງການ 6.600 ຕື້ ກີບ). ນອກນີ້, ຍັງສະເຫນີ ໃຫ້ ຈັດສັນບ້ວງເງິນເກີນແຜນ ປີ 2022 ຕາມການຄາດຄະເນ້ພີ່ມໃຫ້ຂົງເຂດ ວັດທະນະທຳ-ສັງຄົມ ແລະ ຂົງເຂດພັດທະນາຊົນນະບົດ ແລະ ແກ້ໄຂຄວາມທຸກຍາກ ທີ່ເປັນບຸລິມະສິດ ບໍ່ໃຫ້ຫຼຸດ 200 ຕື້ກີບ ແລະ ຈັດສັນຈຳນວນ 20 ຕື້ກີບສຳລັບວຽກງານອອກໃບຕາດິນ.
ທີ່ມາ: ໜັງສືພິມປະຊາຊົນ