ອາຕີເປັນຊາວມາເລເຊຍ ໄດ້ກໍາລັງຊົມໃຊ້ອິນເຕີເນັດ ແລະ ຮູ້ສຶກທໍ້ແທ້ໃຈ ເນື່ອງຈາກການລະບາດຂອງພະຍາດ ແກ່ຍາວມາເປັນເວລາຫຼາຍກວ່າຫນຶ່ງປີນັບຕັ້ງແຕ່ລາວບໍ່ມີວຽກເຮັດງານທໍາ, ພະນັກງານເກັບເງິນຄ່າບິນຕ່າງໆກໍ່ໄດ້ໂທຫາ, ແລະລາວຮູ້ສຶກຫມົດຫວັງ. ແລ້ວລາວກໍເຫັນມັນ. ການໂຄສະນາສໍາລັບວຽກເຕັກໂນໂລຊີທີ່ມີລາຍຮັບສູງໃນປະເທດກໍາປູເຈຍ ທີ່ມີຄ່າຈ້າງປະຈໍາເດືອນເຖິງ 3,300 ໂດລາສະຫະລັດຕໍ່ເດືອນ. ລາວມີຄຸນສົມບັດຕາມຂໍ້ກໍານົດທັງຫມົດທີ່ລະບຸໄວ້ແລະໂທລະສັບຫາທັນທີ.
ຫຼັງຈາກທີ່ໄດ້ໂອ້ລົມກະກຽມກັນແບບສັ້ນໆ ທາງໂທລະສັບ, ລາວກໍ່ໄດ້ຮັບຄໍາແນະນໍາກ່ຽວກັບວິທີການຍ້າຍໄປຢູ່ປະເທດກຳປູເຈຍ. ເຖິງຢ່າງໃດກໍ່ຕາມ, ຄໍາແນະນໍາທີ່ຈະເຂົ້າໄປໃນກໍາປູເຈຍແມ່ນແປກຫນ້ອຍຫນຶ່ງ. ແທນທີ່ຈະເປັນຖ້ຽວບິນໂດຍກົງ, ອາຕີ ຕ້ອງໄດ້ເຂົ້າປະເທດໄທຢ່າງຜິດກົດຫມາຍໂດຍ ທາງເຮືອ ແລະຂ້າມຊາຍແດນເຂົ້າໄປໃນກໍາປູເຈຍຢ່າງ ຜິດກົດຫມາຍໂດຍຍານພາຫະນະ. ແຕ່ ອາຕີ ຮູ້ສຶກວ່າລາວບໍ່ມີທາງເລືອກອື່ນ. ລາວຈຳເປັນຕ້ອງໄປ!
ເມື່ອໄປຮອດສະຖານທີ່ບ່ອນເຮັດວຽກ, ລາວກໍ່ໄດ້ພົບເຫັນສິ່ງອຳນວຍຄວາມສະດວກ ທີ່ຄ້າຍຄືກັບຄາຊີໂນໃຫຍ່ແຫ່ງໜຶ່ງ ທີ່ມີຫ້ອງການຢູ່ຊັ້ນສູງໆຂຶ້ນໄປ, ມີຜູ້ສະມັກວຽກໃຫມ່ຈາກປະເທດ ຫວຽດນາມ, ຟິລິປິນ, ໄທ ແລະ ລາວ. ບໍ່ດົນພວກເຂົາເຈົ້າກໍ່ໄດ້ຮັບການທັກທາຍຈາກພວກຜູ້ຊາຍຮ່າງໃຫຍ່ ທີ່ໃສ່ຊຸດສູດ ຮຽກຮ້ອງຫນັງສືຜ່ານແດນຂອງພວກເຂົາເຈົ້າສໍາລັບເພື່ອກວດຄົນເຂົ້າເມືອງ.
ພວກເຂົາເຈົ້າໄດ້ຖືກພາຂຶ້ນໄປຫາຫ້ອງທີ່ກວ້າງໃຫຍ່ ທີ່ຈັດວາງໄວ້ຄືກັນກັບສູນໂທລະສັບ. ຜູ້ຊາຍທີ່ສວມຫນ້າກາກສາມຄົນພ້ອມດ້ວຍປືນຊອດໄຟຟ້າ ປະກົດຕົວພ້ອມກັບກຸນແຈມືຮ້ອງຂຶ້ນວ່າ “ພວກເຈົ້າແຕ່ລະຄົນໃຫ້ເອົາກັບກຸນແຈມືຫນຶ່ງຊຸດແລະ ລ໊ອກຂາຂອງທ່ານໃສ່ໂຕະໄວ້. ພວກເຈົ້າເລີ່ມເຮັດວຽກໃຫ້ພວກເຮົາເລີຍ!”
ທັງເວັນທັງຄືນພວກເຂົາເຈົ້າໄດ້ເຮັດວຽກໃຊ້ຄອມພິວເຕີເພື່ອສໍ້ໂກງຜູ້ຄົນທີ່ບໍ່ມີຄວາມຜິດ ຖ້າຫາກວ່າພວກເຂົາເຈົ້າເຊົາເຮັດວຽກຫຼືບໍ່ບັນລຸເປົ້າຫມາຍໃດຫນຶ່ງ ພວກເຂົາຈະຖືກຕີ. ອາຕີ ໄດ້ຖືກປືນໄຟຟ້າປະມານສາມເທື່ອຕໍ່ອາທິດຊອດໃນຂະນະທີ່ເຮັດວຽກຢ່າງບໍ່ອິດເມື່ອຍເພື່ອຫລອກລວງຜູ້ຄົນ.
ອາຕີ ໄດ້ຮັບຄວາມທຸກທໍລະມານເກືອບຫນຶ່ງເດືອນ ຈົນກະທັ້ງໄດ້ຫາວິທີທາງຕິດຕໍ່ກັບຝ່າຍບໍລິການແລະຂໍຮ້ອງຮຽນຂອງສະມາຄົມຈີນ ມາເລເຊຍ (MCA) ທີ່ໄດ້ມາຊ່ວຍເຫຼືອຮ່ວມກັບເຈົ້າຫນ້າທີ່ການທູດ ແລະເຈົ້າຫນ້າທີ່ກໍາປູເຈຍ.
ປະຊາຊົນຫຼາຍພັນຄົນໃນພາກພື້ນອາຊີຕາເວັນອອກສຽງໃຕ້ ຫຼາຍຄົນທີ່ມີຄວາມຊໍານານດ້ານເຕັກໂນໂລຊີ ໄດ້ຖືກຫຼອກລວງ ດ້ວຍຫນ້າວຽກທີ່ຄ້າຍຄືກັນໃນພາກພື້ນນີ້ ທີ່ກ່ຽວຂ້ອງກັບ ການສູນເສຍເງິນ, ຂໍ້ມູນສ່ວນຕົວ, ແລະໃນກໍລະນີທີ່ຮ້າຍແຮງທີ່ສຸດຄືການຄ້າມະນຸດ.ໃຜໆກໍ່ສາມາດຕົກເປັນຜູ້ເຄາະຮ້າຍໄດ້! ເຖິງຢ່າງໃດກໍ່ຕາມ, ດ້ວຍການຮັກສາຫລັກການປະຕິບັດ ແລະ ມີສະຕິເຝົ້າລະວັງສັນຍານອັນຕະລາຍ, ທ່ານສາມາດປ້ອງກັນການໂຈມຕີຕົວະຍົວະຫລອກລວງທາງອອນລາຍໄດ້. ທຸກຄົນສາມາດເຮັດໃນສ່ວນຂອງຕົນເອງທີ່ເຮັດໄດ້! ສຶກສາຮຽນຮູ້ເພີ່ມເຕີມກ່ຽວກັບ ການຕົວະຍົວະຫຼອກລວງຕ່າງໆ, ການຫຼອກລໍ້ອ່ອຍເຍື່ອໃຫ້ຕິດກັບທາງອອນລາຍ, ແລະການລັກຂໍ້ມູນບັດລະບຸຕົວຕົນ ໃນເຂດອາຊີຕາເວັນອອກສຽງໃຕ້ ກະລຸນາຢ້ຽມຢາມທີ່ UNODC website.
#UNODC #KnowScam #BeAwareOfScams
ຂໍ້ມູນຈາກ unodc