ເກີດເຫດລົດບັນທຸກສິນຄ້າ 22 ລໍ້ ເສຍລັກຕົກເຫວ ຢູ່ດອຍນໍ້ານາງ ເມືອງຫ້ວຍຊາຍ ແຂວງບໍ່ແກ້ວ ໃນວັນທີ 6 ມັງກອນ ທີ່ຜ່ານມາ ເຮັດໃຫ້ມີຜູ້ເສຍຊີວິດຄາທີ່ 2 ຄົນ.

ເຈົ້າໜ້າທີ່ພະແນກຕໍາຫຼວດຈະລາຈອນ ປກສ ແຂວງບໍ່ແກ້ວ ໃຫ້ຮູ້ວ່າ: ກ່ອນເກີດເຫດ ລົດບັນທຸກຄັນດັ່ງກ່າວ ໄດ້ບັນທຸກສິນຄ້າເຕັມຄັນລົດ; ພໍມາຮອດຈຸດເກີດເຫດ ລົດໄດ້ເສຍຫຼັກຕົກລົງເຫວເຮັດໃຫ້ ທ້າວ ຄຳ ອາຍຸ 20 ປີ ຢູ່ບ້ານນໍ້າຄານ ແລະ ທ້າວ ລັດ ອາຍຸ 24 ປີ ຢູ່ບ້ານທາລີ່ໃຕ້ ທັງສອງຢູ່ເມືອງນໍ້າບາກ ແຂວງຫຼວງພະບາງ ຜູ້ຂັບຂີ່ລົດຄັນດັ່ງກ່າວ ເສຍຊີວິດຄາທີ່.

ຂ່າວໃຫ້ຮູ້ຕື່ມວ່າ: ໃນວັນທີ 8 ມັງກອນ 2023 ໄດ້ເກີດເຫດລົດໃຫຍ່ຕໍາກັບລົດຈັກ ຢູ່ບ້ານປ່າອ້ອຍ ເມືອງຫ້ວຍຊາຍ ແຂວງບໍ່ແກ້ວ, ເຮັດໃຫ້ ທ້າວ ກ້ອງ ອາຍຸ 19 ປີ ຢູ່ບ້ານປ່າອ້ອຍ ຜູ້ຂັບຂີ່ລົດຈັກ ເສຍຊີວິດຄາທີ່; ຕໍ່ມາໃນວັນທີ 9 ມັງກອນ 2023, ກໍມີລົດບັນທຸກຕົກເຫວອີກຄັນ ຢູ່ດອຍນໍ້າເລັ່ງ ເມືອງຫ້ວຍຊາຍ ແຂວງບໍ່ແກ້ວ ເຮັດໃຫ້ຜູ້ຂັບຂີ່ສອງຄົນໄດ້ຮັບບາດເຈັບສົມຄວນ.

ແຫຼ່ງຂ່າວ ຄວາມສະຫງົບ