ການເກັບລາຍຮັບພາສີ-ອາກອນ ຢູ່ດ່ານສາກົນຈຸດສ້າງລາຍຮັບທີ່ສຳຄັນກວມເອົາ 30% ຂອງລາຍຮັບພາຍໃນ,
ຜ່ານມາກົນໄກການຄຸ້ມຄອງຍັງສັບສົນ ແລະ ມີຊ່ອງວ່າງເຮັດໃຫ້ລາຍຮັບຕົກເຮ່ຍບໍ່ເຂົ້າງົບປະມານລວມສູນ,
ກະຊວງການເງິນ ຈິ່ງຮ່ວມມືກັບທະນາຄານການຄ້າຕ່າງປະເທດລາວ ມະຫາຊົນ ພັດທະນາລະບົບການເກັບພາ
ສີ-ອາກອນ ໂດຍນຳໃຊ້ບັດຈ່າຍທົດແທນເງິນສົດສ້າງຄວາມໂປ່ງໄສ ແລະ ຮັບປະກັນການລວມສູນຂອງລາຍຮັບ
ຊຶ່ງໄດ້ຈັດພິທີເປີດນຳໃຊ້ບັດຊຳລະພາສີ-ອາກອນຢ່າງເປັນທາງການໃນ ວັນທີ 11 ພະຈິກນີ້.
ເຂົ້າຮ່ວມໃນພິທີ ແລະ ເປີດການນຳໃຊ້ບັດໂດຍ ທ່ານ ດຣ. ບຸນປອນ ບຸດຕະນະວົງ ຮອງນາຍົກລັດຖະມົນຕີ, ຜູ້ຊີ້
ນຳວຽກ ງານເສດຖະກິດມະຫາພາກ ແລະ ບໍລິການ; ທ່ານ ດຣ. ລຽນ ທິແກ້ວ ລັດຖະມົນຕີວ່າການກະຊວງການ
ເງິນ; ທ່ານ ສົມພາວ ໄຟສິດ ຜູ້ວ່າການທະນາຄານແຫ່ງ ສປປ ລາວ, ພ້ອມດ້ວຍບັນດາທ່ານລັດຖະມົນຕີວ່າການ,
ຊ່ວຍວ່າການ ແລະ ພະນັກງານທີ່ກ່ຽວຂ້ອງເຂົ້າຮ່ວມ.
ທ່ານ ດຣ. ລຽນ ທິແກ້ວ ກ່າວລາຍງານວ່າ:ໄລຍະຜ່ານມາກົນໄກການຄຸ້ມຄອງການເກັບລາຍຮັບ ພາສີ-ອາກອນ
ຢູ່ດ່ານພາສີສາກົນແມ່ນຍັງມີຄວາມສັບສົນ, ຫຼາຍຂັ້ນ, ຫຼາຍຂອດຊັກຊ້າ, ການມອບພັນທະຂອງຜູ້ປະກອບການ
ແມ່ນຊຳລະດ້ວຍເງິນສົດເປັນ ຈຳນວນຫຼວງຫຼາຍ ຊຶ່ງສ້າງຄວາມບໍ່ສະດວກໃຫ້ແກ່ຜູ້ປະກອບການ, ເປັນຊ່ອງວ່າງ
ເຮັດໃຫ້ການຈັດເກັບລາຍຮັບພາສີຕົກເຮ່ຍເສຍຫາຍ ແລະ ບໍ່ເຂົ້າງົບປະມານລວມສູນ, ນອກນັ້ນ ລະບົບການຕິດ
ຕາມກວດກາ, ການລົງບັນຊີ, ການສົມທຽບ ແລະ ລາຍງານຕົວເລກລາຍຮັບງົບປະມານລະຫວ່າງຄັງເງິນແຫ່ງ
ຊາດ ແລະ ພາສີແມ່ນບໍ່ມີຄວາມເປັນເອກະພາບກັນ.
ເພື່ອແກ້ໄຂບັນຫາດັ່ງກ່າວ ຄະນະວິຊາການກະຊວງການເງິນ ແລະ ທະນາຄານການຄ້າຕ່າງປະເທດລາວ ໄດ້ປະ
ສານສົມທົບປຶກສາຫາລືກ່ຽວກັບການປັບປຸງກົນໄກການຄຸ້ມຄອງ ເກັບລາຍຮັບງົບປະມານຢູ່ດ່ານພາສີສາກົນ
ໃຫ້ມີຄວາມທັນສະໄໝ, ບໍລິການວ່ອງໄວ, ສ້າງຄວາມສະດວກໃຫ້ແກ່ຜູ້ປະກອບການ ແລະ ຫຼີກເວັ້ນການເຮັດ
ວຽກຊ້ຳຊ້ອນກັນລະຫວ່າງທະນາຄານ ແລະ ຄັງເງິນແຫ່ງຊາດ ໂດຍແມ່ນທະນາຄານການຄ້າຕ່າງປະເທດລາວ
ມະຫາຊົນ ມີຄວາມພ້ອມໃຫ້ບໍລິການ ແລະ ຄົ້ນຄວ້າກົນໄກການຄຸ້ມຄອງເກັບລາຍຮັບ ງົບປະມານຢູ່ດ່ານພາສີ
ສາກົນຜ່ານບັດ Smart Tax.
ການນຳໃຊ້ບັດດັ່ງກ່າວແມ່ນເພື່ອໃຊ້ແທນເງິນສົດ, ເງິນໂອນ ແລະ ແຊັກຜ່ານລະບົບທະນາຄານໃນການຊຳລະ
ພາສີອາກອນ ແລະ ພັນທະອື່ນໆ, ສຳລັບສິນຄ້າເຄື່ອງຂອງທີ່ສົ່ງອອກ-ນຳເຂົ້າຂອງບຸກຄົນ, ນິຕິບຸກຄົນ ຫຼື ການ
ຈັດຕັ້ງຢູ່ດ່ານພາສີສາກົນ; ການຊຳລະໃນຮູບແບບດັ່ງກ່າວ ຈະຊ່ວຍເຈົ້າໜ້າທີ່ພາສີປະຈຳຢູ່ດ່ານບໍລິການວ່ອງ
ໄວອຳນວຍຄວາມສະດວກ ໃຫ້ແກ່ຜູ້ປະກອບ ການໃນການມອບພັນທະ, ປະຢັດເວລາ, ຮັບປະກັນຄວາມຍຸດຕິ
ທຳ, ທັນສະໄຫມ, ໂປ່ງໃສ ແລະ ກວດສອບໄດ້.
ເຈົ້າໜ້າທີ່ຂອງທະນາຄານການຄ້າຕ່າງປະເທດລາວ ມະຫາຊົນ ເປີດເຜີຍວ່າ: ນີ້ເປັນການເລີ່ມຕົ້ນສຳລັບການ
ນຳໃຊ້ບັດຊຳລະພາສີ-ອາກອນ ແລະ ອື່ນໆຢູ່ດ່ານສາກົນນະຄອນຫຼວງວຽງຈັນ, ແລ້ວຈະຄ່ອຍພັດທະນາໄປແຂວງ
ອື່ນໆ ໃນຂອບເຂດທົ່ວປະເທດ, ປະຈຸບັນທາງທະນາຄານມີຄວາມພ້ອມສຳລັບເຄື່ອງດັ່ງກ່າວຕາມທີ່ກະຊວງການ
ເງິນຕ້ອງການ.
ແຫລ່ງຂ່າວ: ເສດຖະກິດ – ສັງຄົມ