ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ຕ້ອນຮັບ ທ່ານນາງ ອິນລາວັນ ແກ້ວບຸນພັນ ປະທານຄະນະບໍລິຫານງານ ສູນກາງສະຫະພັນແມ່ຍິງລາວ ພ້ອມຄະນະ ໃນໂອກາດທີ່ມາຕິດຕາມຊຸກຍູ້ວຽກງານຂອງສະຫະພັນແມ່ຍິງລາວ ທີ່ແຂວງຈຳປາສັກ ໃນວັນທີ 8 ກໍລະກົດ ນີ້ ທີ່ຫ້ອງວ່າການແຂວງ ຈຳປາສັກ.
ໃນໂອກາດນີ້, ທ່ານເຈົ້າແຂວງຈຳປາສັກ ໄດ້ສະແດງການຕ້ອນຮັບ ແລະ ຊົມເຊີຍມາຍັງສູນກາງສະຫະພັນແມ່ຍິງລາວ ທີ່ໄດ້ສຸມໃສ່ຊີ້ນຳແຂວງຈຳປາສັກ ແລະ ຖືເອົາວຽກງານ ພັດທະນາ ຍົກລະດັບຄວາມຮູ້ຄວາມສາມາດຂອງແມ່ຍິງ ເພື່ອຍົກສູງບົດບາດຂອງແມ່ຍິງລາວ ແນໃສ່ຮັບປະກັນເຮັດໃຫ້ການປະຕິບັດໜ້າທີ່ວຽກງານການເມືອງຂອງຄະນະບໍລິຫານງານສະຫະພັນແມ່ຍິງແຂວງມີຜົນສໍາເລັດໃໝ່ທີ່ດີກວ່າເກົ່າ.
ໃນໂອກາດດຽວກັນ, ທ່ານນາງ ອິນລາວັນ ແກ້ວບຸນພັນ ໄດ້ສະແດງຄວາມຂອບໃຈຕໍ່ການຕ້ອນຮັບ ແລະ ແຈ້ງຈຸດປະສົງ ໃນການຕິດຕາມຊຸກຍູ້ວຽກງານຂອງ ສະຫະພັນແມ່ຍິງລາວ ໂດຍສະເພາະພື້ນທີ່ຈະສ້າງສູນຝຶກອົບຮົມວິຊາຊີບ ໃຫ້ແກ່ຜູ້ທີ່ຖືກເຄາະຮ້າຍຈາກຄວາມຮຸນແຮງ, ພ້ອມນັ້ນ ທ່ານປະທານຄະນະບໍລິຫານງານສູນກາງສະຫະພັນແມ່ຍິງລາວ ຍັງແຈ້ງໃຫ້ຊາບກ່ຽວກັບຜົນສຳເລັດຂອງການເຄື່ອນໄຫວຢ້ຽມຢາມ ສສ ຫວຽດນາມ ຂອງຄະນະສູນກາງສະຫະພັນແມ່ຍິງລາວ ໃນການຍົກສູງບົດບາດຂອງແມ່ຍິງລາວ ໃນວຽກງານການຮ່ວມມື ລາວ-ຫວຽດນາມຕື່ມອີກ.
ພ້ອມນັ້ນທ່ານເຈົ້າແຂວງຈຳປາສັກ ຍັງໄດ້ສະເໜີຕໍ່ທ່ານປະທານຄະນະບໍລິຫານງານ ສູນກາງສະຫະພັນແມ່ຍິງລາວ ສືບຕໍ່ພັດທະນາຜະລິດຕະພັນ ທີ່ເປັນຜົນງານຂອງແມ່ຍິງລາວ ແຂວງຈຳປາສັກ ເພື່ອກ້າວສູ່ການຂໍຂຶ້ນທະບຽນ ຖິ່ນກຳເນີດສິນຄ້າຂອງແມ່ຍິງ ເພື່ອສ້າງມູນຄ່າເພີ່ມ ນຳອີກ.
ທີ່ມາ: ປະຊາຊົນ