ໃນວັນທີ 4 ມິຖຸນາ ໄດ້ເກີດເຫດໄຟໄໝ້ທີ່ສາງຕູ້ຄອນເທນເນີ ໃນປະເທດບັງກະລາເທດ, ຄາດການວ່າອາດຈະເກີດຈາກການທີ່ສານເຄມີໃນຕູ້ຄອນເທນເນີບາງຕູ້ໄປສຳຜັດກັບໄຟ ຈຶ່ງສົງຜົນໃຫ້ເກີດການລະເບີດຢ່າງຮຸນແຮງໃນວັນເສົານັ້ນ ເຫດໄຟໄໝ້ໄດ້ແກ່ຍາວມາຈົນເຖິງ ວັນທີ 5 ມິຖຸນາ ເຮັດໃຫ້ມີຜູ້ເສຍຊີວິດເພີ່ມຂຶ້ນເປັນ 49 ຄົນ ແລະ ມີຜູ້ບາດເຈັບອີກ 300 ຄົນ.

ໄຟ​ໄດ້​ເກີດ​ຂຶ້ນ​ໃນ​ຕອນ​ກາງ​ຄືນ​ຂອງ​ວັນ​ເສົາ​ ທີ 4 ມິຖຸນາ ທີ່ສາງຕູ້ຄອນເທນເນີ ເມືອງສິຕາຄຸນດາ, ເຊິ່ງມີຕູ້ຄອນເທນເນີປະມານ 4.000 ຕູ້. ​ໄຟ​ໄໝ້​ດັ່ງກ່າວ ​ໄດ້​ເຮັດ​ໃຫ້​ຕູ້​ບັນຈຸສານ​ເຄມີ​ແຕກ​ຂຶ້ນ​ໃນ​ຂະນະ​ທີ່​ນັກ​ດັບ​ເພີງ, ອາສາ​ສະໝັກ ​ແລະ​ ນັກ​ຂ່າວ​ພວມ​ປະຕິບັດ​ໜ້າ​ທີ່ຢູ່ ສົ່ງ​ຜົນ​ໃຫ້ມີຄົນ​ຮັບ​ບາດ​ເຈັບ​ ແລະ ຕາຍ ຈໍາ​ນວນ​ຫຼາຍ​.

ຜູ້​ອຳ​ນວຍ​ການ​ປະ​ຕິ​ບັດ​ງານ​ຂອງ​ພະ​ແນກ​ດັບ​ເພີງ​ທ້ອງ​ຖິ່ນ ​ໄດ້​ຢືນ​ຢັນ​ວ່າ ມີ​ນັກ​ດັບ​ເພີງ 7 ຄົນ​ເສຍ​ຊີ​ວິດ ແລະ ​ອີກ 4 ຄົນ​ຫາຍ​ສາບ​ສູນ, ແລະ ໄດ້ເວົ້າວ່າຍັງພົບສົບຈຳນວນໜຶ່ງປະມານ 8-10 ສົບໃນກອງໄຟນັ້ນ.

ຈາກການລາຍງານຂອງຫຼາຍສຳນັກຂ່າວທີ່ຢູ່ໃນເຫດການໄດ້ລາຍງານວ່າ: ການປະຕິບັດງານຍັງບໍ່ສິ້ນສຸດລົງ ເນື່ອງຈາກຄວບຄຸມໄຟບໍ່ໄດ້ເທື່ອ ແລະ ຄາດວ່າຍັງຈະພົບເຫັນຄົນເສຍຊີວິດເພີ່ມຂຶ້ນອີກ.