ທ้າວ ວາດິມ ຊີຊີມາລິນ ທະຫານຣັດເຊຍ ອາຍຸ 21 ປີ ໄດ້ສາລະພາບຕໍ່ສານວ່າ ໄດ້ກະທຳຜິດແທ້, ໃນການພິຈາລະນາຄະດີອາຊະຍະກຳທີ່ເກີດຂຶ້ນຍ້ອມຄວາມຂັດແຍ່ງລະຫວ່າງຣັດເຊຍ-ຢູເຄຣນ ໂດຍກ່ອນໜ້ານີ້ລາວໄດ້ຍິງຂ້າຜູ້ຊາຍສູງອາຍຸ 62ປີ ທັ້ງທີ່ລາວເປັນປະຊາຊົນທີ່ບັງເອີນຂີ່ລົດຖີບຜ່ານ.
ທາ້ວ ຊີຊີມາລິນ ເປັນຫົວໜ້າກອງທະຫານລົດຖັງໜ່ວຍໜຶ່ງ ໄດ້ຍິງສັງຫານທ້າວ ໂອເລັກຊານເດີ ເຊລິປອຟ ທີ່ບ້ານຊູປາຄິຟກາ ປະເທດຢູເຄຣນ ໃນຊ່ວງທຳອິດຂອງການເລີ່ມເຮັດສົງຄາມ, ໂດຍໃນຂະນະນັ້ນລາວ ແລະ ໝູ່ອີກ 4 ຄົນ ກຳລັງຂັບລົດທີ່ລັກມາ ເພື່ອໜີຈາກການໂຈມຕີຂອງຂະບວນລົດຖັງຂອງພວກລາວ.
ແລ້ວລາວໄດ້ສາລະພາບວ່າ: “ເຂົາໄດ້ຮັບຄຳສັ່ງໃຫ້ສັງຫານປະຊາຊົນ ຈຶ່ງໄດ້ໃຊ້ປືນຍິງເຂົ້າທີ່ຫົວທ້າວ ເຊລິປອຟ ຈົນເສຍຊີວິດທັນທີ”.
ຂະນະທີ່ລາວເດີນທາງມາຫ້ອງພິຈາລະນາຄະດີໃນສານ ລາວໄດ້ຖືກໃສ່ກະແຈມື ແລະ ລ້ອມດ້ວຍເຈົ້າໜ້າທີ່ຮັກສາຄວາມປອດໄພຢ່າງແໜ້ນໜາ, ໃນຂະນະທີ່ ພັນລະຍາຂອງຜູ້ເສຍຊີວິດ ກໍໄດ້ເຂົ້າຮ່ວມຮັບຟັງການພິຈາລະນາຄະດີເຊັ່ນກັນ. ການພິຈາລະນາຄະດີໄດ້ຈົບຢ່າງໄວເນື່ອງຈາກຜູ້ກ່ຽວໄດ້ສາລະພາບ ແຕ່ກໍຍັງມີການ ສວບສວນອີກຕໍ່ໄປ.
ລັດຖະບານຣັດເຊຍໄດ້ຖະແຫຼງວ່າ ບໍ່ຮັບຮູ້ເຖິງການກະທຳຜິດຂອງທ້າວ ຊີຊີມາລິນ, ສ່ວນທາງຢູເຄຣນ ໄດ້ແຈ້ງວ່າ ໄດ້ກວດພົບການກໍ່ອາຊະຍະກຳສົງຄາມໂດຍທະຫານຣັດເຊຍຫຼາຍກວ່າ 10,000 ຄະດີແລ້ວ.
ແຫຼ່ງຂ່າວຈາກສຳນັກຂ່າວເອພີ