ອີງຕາມການລາຍງານເວັບໄຊ້ຂ່າວ RT ໄດ້ລາຍງານວ່າ: ທ່ານປະທານາທິບໍດີ ຣັດເຊຍ ວາລາດິເມຍ ປູຕິນ (Vladimir Putin) ໄດ້ປະກາດເລີ່ມດຳເນີນການເຄື່ອນໄຫວທາງການທະຫານຢູ່ເຂດ ດອນບາສ (Donbas) ທາງພາກຕາເວັນອອກສຽງໃຕ້ຂອງຢູເຄຣນ.
ຫຼັງຈາກລັດໃໝ່ ທີ່ໄດ້ຮັບການຍອມຮັບໂດຍລັດເຊຍນີ້ແມ່ນສາທາລະນະລັດປະຊາຊົນ ລູຣານ ແລະ ສາທາລະນະລັດປະຊາຊົນ ໂດເນັດ ທີ່ຕັ້ງຢູ່ໃນພາກພື້ນດັ່ງກ່າວຮຽກຮ້ອງໃຫ້ຣັດເຊຍຊ່ວຍຂັບໄລ່ກອງກຳລັງຂອງຢູເຄຣນ ທີ່ມີພຶດຕິກຳໃຊ້ຄວາມຮຸນແຮງຢູ່ໃນດິນແດງຂອງຕົນ.
ໃນຖະແຫຼງການຂອງຜູ້ນຳຣັດເຊຍຮຽກຮ້ອງໃຫ້ທະຫານຢູເຄຣນທີ່ຢູ່ເຂດສູ້ຮົບພາກຕາເວັນອອກ ວາງອາວຸດຍຸດໂທປະກອນ ແລະ ກັບຄືນສູ່ບ້ານເກີດເມືອງນອນ, ຖ້າບໍ່ດັ່ງນັ້ນ ຢູເຄຣນຈະຖືກຕຳນິວ່າເປັນຝ່າຍກໍ່ເຫດການນອງເລືອດໃນຄັ້ງນີ້. ຜູ້ນຳຣັດເຊຍ ຍັງກ່າວອີກວ່າ:
“ການປະທະກັນລະຫວ່າງກອງກຳລັງຣັດເຊຍ ແລະ ຢູເຄຣນແມ່ນເປັນສິ່ງທີ່ຫຼີກລ່ຽງບໍ່ໄດ້ ພຽງແຕ່ພວກເຂົາຍັງບໍ່ຮູ້ວ່າການສູ້ຮົບຈະເກີດຂື້ນໃນເວລາໃດ ຄວາມຈິງ ແລະ ຄວາມຍຸດຕິທຳຢູ່ຝ່າຍພວກເຮົາ ແລະ ຜູ້ໃດທີ່ພະຍາຍາມເອົາປຽບຣັດເຊຍຈະປະເຊີນກັບການຕອບໂຕ້ໃນທັນທີ”.
ຢ່າງໃດກໍຕາມ ທ່ານປູຕິນ ກ່າວຢ້ຳຄືນວ່າ: ທ່ານບໍ່ໄດ້ຕັ້ງໃຈຈະຍຶດຄອງຢູເຄຣນ ເຊິ່ງການເຄື່ອນໄຫວທາງທະຫານນີ້ເປັນພຽງການປະຕິບັດງານຊົ່ວຄາວ ທີ່ມີເປົ້າໝາຍສະເພາະ, ຢູເຄຣນຍັງມີອິດສະລະທີ່ຈະເລືອກເອົາໃຜຈະເປັນຜູ້ປົກຄອງປະເທດຕໍ່ໄປ.
ນອກນຈາກນີ້, ຍັງມີລາຍງານໂດຍຜູ້ໃຊ້ສື່ສັງຄົມອອນລາຍກ່ຽວກັບເຫດລະເບີດທີ່ເມືອງຄາຄີບ (Kharkiv) ທາງພາກຕາເວັນອອກສຽງເໜືອຂອງຢູເຄຣນ, ລວມທັງຢູ່ໃນເມືອງໂອເດຊາ (Odessa) ທາງພາກໃຕ້ ແລະ ໃນເຂດໂດເນັດ (Donask) ໃນພາກຕາເວັນອອກ.
ສ່ວນທ່ານ ໂຈ ໄບເດັນ ປະທານາທິບໍດີ ສະຫະລັດອາເມລິກາ ໄດ້ກ່າວຫຼັງຈາກຄຳສັ່ງຄັ້ງຫຼ້າສຸດຂອງຜູ້ນຳຣັດເຊຍວ່າ: ປະທານາທິບໍດີ ປູຕິນ ໄດ້ເລືອກທີ່ຈະເຮັດສົງຄາມດ້ວຍການວາງແຜນ ແລະ ກຽມການບາງຢ່າງເຊິ່ງສົງຄາມນີ້ຈະນໍາເອົາໄພພິບັດອັນໃຫຍ່ຫຼວງ, ທັງການສູນເສຍຊີວິດ ແລະ ຄວາມທຸກທໍລະມານມາໃຫ້, ມີແຕ່ຣັດເຊຍຕ້ອງຮັບຜິດຊອບຕໍ່ການເສຍຊີວິດ ແລະ ການທໍາລາຍໃນຄັ້ງນີ້ພຽງຝ່າຍດຽວ ເຊິ່ງການໂຈມຕີຄັ້ງນີ້ຈະເຮັດໃຫ້ອາເມລິກາ ແລະ ບັນດາປະເທດພັນທະມິດຈະຮ່ວມກັນເປັນໜຶ່ງໃນການຕອບໂຕ້ຂັ້ນເດັດຂາດ.