ປະທານາທິບໍດີ ອິນໂດເນເຊຍ ໂຈໂກ ວິໂດໂດ ໄດ້ວາງແຜນການຍ້າຍເມືອງຕັ້ງແຕ່ເດືອນເມສາ ປີ 2019 ໂດຍກ່າວວ່າ ຍ້ອນລະດັບນໍ້າທະເລທີ່ເພີ່ມຂຶ້ນສູງ ແລະ ຄວາມແອອັດຂອງປະຊາກອນທີ່ເພີ່ມຂຶ້ນຢ່າງຫຼວງຫຼາຍ. ທາງດ້ານຜູ້ຊຽວຊານຄາດວ່າ 1 ໃນ 3 ຂອງເມືອງນີ້ຈະຈົມຢູ່ກ້ອງທະເລພາຍໃນປີ 2050.
ນັກອະນຸຮັກສິ່ງແວດລ້ອມໄດ້ວິຈານແຜນການຍ້າຍເມືອງຫຼວງເຄີຍກ່າວວ່າ ການສ້າງເມືອງແຫ່ງໃໝ່ເທິງ ເກາະບໍ່ນຽວ ອາດກໍ່ຄວາມເສຍຫາຍຕໍ່ລະບົບນິເວດ ແລະ ເປັນການຄຸກຄາມປ່າໄມ້ຫຼາຍຊະນິດທີ່ໃກ້ຈະສູນພັນແລ້ວ.
ປະທານາທິບໍດີ ອິນໂດເນເຊຍ ກ່າວວ່າ “ເມືອງຫຼວງໃໝ່ນັ້ນ ຈະເປັນເມືອງທີ່ຜູ້ຄົນຢູ່ໃກ້ກັບຈຸດໝາຍປາຍທາງທີ່ພວກເຂົາສາມາດຂີ່ລົດຖີບ ແລະ ຍ່າງຜ່ານໄປໄດ້ທຸກບ່ອນ ເພາະການປ່ອຍມົນລະພິດຈະກາຍເປັນສູນ, ເຊິ່ງຈະບໍ່ແມ່ນເປັນພຽງບ່ອນເຮັດວຽກຂອງລັດຖະບານເທົ່ານັ້ນ ແຕ່ຕ້ອງການສ້າງມະຫານະຄອນອັດສະລິຍະແຫ່ງໃໝ່ ທີ່ສາມາດດຶງດູດຜູ້ທີ່ມີຄວາມສາມາດທົ່ວໂລກ ແລະ ເປັນສູນກາງຂອງນະວັດຕະກໍໍາ”
ອິນໂດເນເຊຍ ບໍ່ແມ່ນປະເທດທໍາອິດທີ່ຍ້າຍເມືອງຫຼວງໃໝ່, ມາເລເຊຍ ເຄີຍຍ້າຍເມືອງຫຼວງຈາກ ກົວລາລໍາເປີ ໄປ ປຸຕຣາຈາຍາ ໃນປີ 2004 ແລະ ມຽນມາເຄີຍຍ້າຍເມືອງຫຼວງຈາກຢ່າງກຸ້ງໄປຢູ່ເນບຍີດໍເມື່ອປີ 2006.
ອ້າງອີງຈາກ: reuters