ບໍລິສັດ Meta Platforms Inc ເຊິ່ງເມື່ອກ່ອນເປັນທີ່ຮູ້ຈັກກັນດີໃນນາມ Facebook ໄດ້ປະກາດໃນຖະແຫຼງຂ່າວ ເຊິ່ງຈັດຂຶ້ນໃນວັນທີ 8 ທັນວາ 2021 ຜ່ານມາວ່າ ຈະມີການຫ້າມບໍ່ໃຫ້ທຸລະກິດໃດກໍຕາມທີ່ຄວບຄຸມໂດຍກອງທັບມຽນມາ ສາມາດລົງໂຄສະນາໃນແພລດຟອມຂອງຕົນໄດ້.

ເວັບໄຊ Laotian Times ລາຍງານວ່າ: ຄວາມເຄື່ອນໄຫວດັ່ງກ່າວມີຂຶ້ນ ພາຍຫຼັງທີ່ບໍລິສັດປະກາດໃນຊ່ວງຕົ້ນປີນີ້ວ່າ ຈະຫ້າມທຸກອົງການຈັດຕັ້ງທີ່ກ່ຽວຂ້ອງກັບກອງທັບມຽນມາ ສາມາດນຳໃຊ້ແພລດຟອມ Meta ເພື່ອການໂຄສະນາໄດ້ອີກຕໍ່ໄປ ຂະນະທີ່ປັດຈຸບັນ Meta ໄດ້ລົບບັນຊີເພດຈ໌ ແລະກຸ່ມ ທີ່ເຊື່ອມໂຍງກັບທຸລະກິດທີ່ຄວບຄຸມໂດຍກອງທັບມຽນມາອອກຈາກແພລດຟອມຂອງຕົນກວ່າ 100 ບັນຊີແລ້ວ.

ຢ່າງໃດກໍຕາມ, Meta Platforms ໄດ້ຖືກວິພາກວິຈານຢ່າງກວ້າງຂວາງກ່ຽວກັບຄວາມຫຼົ້ມເຫຼວ ໃນການປາບປາມການໂຄສະນາທີ່ສະແດງເຖິງຄວາມກຽດຊັງທາງອອນລາຍໃນມຽນມາ ໂດຍສະເພາະການໂພສສະແດງຄວາມກຽດຊັງທີ່ຍຸແຍ່ໃຫ້ເກີດຄວາມຮຸນແຮງຕໍ່ຊຸມຊົນກຸ່ມນ້ອຍເຊັ່ນ ໂຮຣິງຢາ ທັງທີ່ແພລດຟອມດັ່ງກ່າວຈັດເປັນສື່ທີ່ໂດດເດັ່ນຂອງໂລກ.