ວັນທີ 15 ພະຈິກ 2021 ສໍານັກຂ່າວ Khaosod ໄດ້ລາຍງານວ່າ ເຈົ້າໜ້າທີ່ຕຳຫຼວດໄທ ໄດ້ຈັບຜູ້ຍິງອາຍຸ 30 ປີ ສັນຊາດລາວ ຫຼັງກໍ່ເຫດ ເອົາເດັກນ້ອຍທີ່ຫາກໍເກີດ ໄປຖິ້ມຢູ່ຖັງຂີ້ເຫຍື້ອ ຢູ່ທີ່ ຮ່ອມຣາມຄໍາແຫງ ເມືອງຫົວໝາກ ເຂດບາງກະປິ ເມື່ອວັນທີ 6 ພະຈິກ. ພາຍຫຼັງເກີດເຫດ, ຕຳຫຼວດໄດ້ໄລ່ຕິດຕາມປິດລ້ອມ ຈົນເຮັດໃຫ້ສາມາດຈັບຕົວຜູ້ຍິງຄົນນີ້ໄດ້.
ພົນໂທ ວິໄຊ ນະຄອນ ເຈົ້າໜ້າທີ່ຕຳຫຼວດຫົວມາກ ກ່າວວ່າ ພາຍຫຼັງເກີດເຫດ, ຕຳຫຼວດໄດ້ພົບເຫັນພາບຈາກກ້ອງວົງຈອນປິດ. ໃນຂະນະທີ່ຜູ້ຖືກກ່າວຫາໄດ້ເອົາຖົງຂີ້ເຫຍື້ອອອກຈາກຫ້ອງ ແລ້ວຢ່າງລົງເອົາໄປຖິ້ມ ກ່ອນຈະກັບເຂົ້າໄປໃນຫ້ອງ ບໍ່ໄດ້ອອກມາອີກ ຜູ້ກ່ຽວຮັບສາລະພາບວ່າ ໄດ້ກໍ່ເຫດດັ່ງກ່າວແທ້
ຜູ້ຕ້ອງຫາກ່າວວ່າ ລາວເປັນຄົນງານທີ່ໜີເຂົ້າເມືອງຢ່າງຜິດກົດໝາຍ ໂດຍເມື່ອວັນທີ 5 ພະຈິກຜ່ານມາ ໄດ້ໃຫ້ກໍາເນີດລູກຜູ້ຊາຍຢູ່ໃນຫ້ອງ, ແຕ່ 3-4 ນາທີຕໍ່ມາເດັກນ້ອຍໄດ້ເສຍຊີວິດ. ດ້ວຍຄວາມອິດເມື່ອຍຫຼັງຈາກເກີດລູກ ຈຶ່ງນອນຫຼັບໄປ. ມາຮອດຕອນແລງແມ່ນໄດ້ນໍາເອົາສົບເດັກນ້ອຍໃສ່ຖົງຂີ້ເຫຍື້ອເອົາໄປຖິ້ມ ຈົນມີຄົນພົບເຫັນສົບ ແລະ ຖືກຈັບໃນທີ່ສຸດ.
ໃນເບື້ອງຕົ້ນ, ຕໍາຫຼວດໄດ້ຮັບຄວາມຄິດເຫັນຈາກທ່ານໝໍວ່າ ສົບຂອງເດັກນ້ອຍຜູ້ນີ້ໄດ້ມີການຫາຍໃຈກ່ອນຕາຍ, ສາເຫດຂອງການເສຍຊີວິດແມ່ນຖືກປິດກັ້ນການຫາຍໃຈ. ດັ່ງນັ້ນ, ຈຶ່ງຕ້ອງມີການສືບສວນຢ່າງລະອຽດອີກຄັ້ງ. ແມ່ຂອງເດັກຖືກຕັ້ງຂໍ້ຫາຄາດຕະກຳຜູ້ອື່ນ, ປິດບັງການທຳລາຍສົບ ແລະ ຫຼົບໜີເຂົ້າໄປໄທໂດຍບໍ່ໄດ້ຮັບອະນຸຍາດ ໂດຍຈະຖືກດຳເນີນຄະດີຕາມກົດໝາຍ.