ວັນທີ 3 ພະຈິກ 2021 ສໍານັກຂ່າວ vietnamplus ລາຍງານວ່າ ທ່ານຮອງນາຍົກລັດຖະມົນຕີ ເລວັນແທ່ງ (Lê Văn Thành) ໄດ້ລົງນາມໃນການອະນຸມັດແຜນຮ່າງລະບົບທາງລົດໄຟ 2021-2030, ມຸ່ງໄປເຖິງການກໍ່ສ້າງທາງລົດໄຟໃໝ່ທັງໝົດ 9 ສາຍ ດ້ວຍຄວາມຍາວທັງໝົດ 2.362 ກິໂລແມັດ ຮອດປີ 2030.
ພາຍໃຕ້ການວາງແຜນດັ່ງກ່າວ ອຸດສາຫະກໍາລົດໄຟຈະປັບປຸງລະບົບລົດໄຟທີ່ມີຢູ່ແລ້ວ ເຊື່ອມຕໍ່ກັບເສັ້ນທາງການຂົນສົ່ງລະຫວ່າງປະເທດ, ກະກຽມທຶນຮອນ ແລະ ແຫຼ່ງທຶນເພື່ອເລີ່ມກໍ່ສ້າງເສັ້ນທາງໃໝ່ ໂດຍໃຫ້ຄວາມສໍາຄັນກັບເສັ້ນທາງຄວາມໄວສູງເໜືອ-ໃຕ້ ແລະເສັ້ນທາງທີ່ເຊື່ອມຕໍ່ກັບທ່າເຮືອປະຕູ ສະໜາມບິນສາກົນ ແລະ ທາງລົດໄຟຕົ້ນຕໍໃນຕົວເມືອງໃຫຍ່ ໂດຍສະເພາະ ຂະແໜງການຈະປັບປຸງ 7 ເສັ້ນທາງທີ່ມີຢູ່ແລ້ວ, ມີຄວາມຍາວທັງໝົດ 2.440 ກິໂລແມັດ. ໃນບັນດາເສັ້ນທາງລົດໄຟໃໝ່ 9 ເສັ້ນ, ຈະມີຄວາມໄວສູງ 1.545 ກມ.
ຍອດຈຳນວນທຶນທັງດ້ານການຍົກລະດັບ ແລະ ການກໍ່ສ້າງທາງລົດໄຟຈະແມ່ນປະມານ 240 ຕື້ດົ່ງ (10,5 ຕື້ USD).
ຮອດປີ 2030, ປະລິມານສິນຄ້າຈະບັນລຸ 11,8 ລ້ານໂຕນ, ກວມປະມານ 0,27% ຂອງສ່ວນແບ່ງຕະຫຼາດ ແລະ ຈຳນວນຜູ້ໂດຍສານໃນການຂົນສົ່ງຈະບັນລຸ 460 ລ້ານຄົນ, ກວມເອົາສ່ວນແບ່ງຕະຫຼາດປະມານ 4,40%