ເວັບໄຊ Global Times ລາຍງານ: ຊຽງໄຮ້ດິສນີຣີສອດ ຖືກພາດຫົວຂໍ້ຂ່າວໃຫຍ່ໃນໜ້າໜັງສືພິມທົ່ວປະເທດຈີນຫຼາຍສະບັບ ໃນຕອນເຊົ້າວັນຈັນຜ່ານມາ ເນື່ອງຈາກມີການຮັບມືກັບສະຖານະການສຸກເສີນຢ່າງໜ້າເຫຼືອເຊື່ອ ເມື່ອປະເຊີນກັບຄຳສັ່ງໃຫ້ກວດໂຄວິດ-19 ກະທັນຫັນ ເຊິ່ງການດຳເນີນການຂອງເມືອງຊຽງໄຮ້ຄັ້ງນີ້ ໄດ້ສະທ້ອນໃຫ້ເຫັນເຖິງວິທີການປ້ອງກັນ ແລະສະກັດກັ້ນພະຍາດໂຄວິດ-19 ຂອງລັດຖະບານຈີນ.
ການເລັ່ງກວດຫາເຊື້ອໂຄວິດກະທັນຫັນເກີດຂຶ້ນເມື່ອມີລາຍງານວ່າ ມີຜູ້ຕິດເຊື້ອໂຄວິດລາຍໜຶ່ງເຂົ້າໄປທ່ຽວຊົມອຸທະຍານຊື່ດັງ “ຊຽງໄຮ້ດິສນີຣີສອດ” ເປັນເຫດເຮັດໃຫ້ສະຖານທີ່ທ່ອງທ່ຽວດັ່ງກ່າວຖືກປິດຊົ່ວຄາວໃນມື້ວັນທິດ ຂະນະທີ່ນັກທ່ອງທ່ຽວພ້ອມດ້ວຍພະນັກງານໃນອຸທິຍານແຫ່ງນີ້ຈຳນວນ 33 ພັນກວ່າຄົນ ຖືກສັ່ງໃຫ້ເຂົ້າກວດຫາເຊື້ອໂຄວິດທັງໝົດໂດຍດ່ວນເຊິ່ງໃຊ້ເວລາພຽງສອງສາມຊົ່ວໂມງ ແລະອີກ 66 ພັນກວ່າຄົນທີ່ມີສ່ວນກ່ຽວຂ້ອງກັບສະຖານທີ່ດັ່ງກ່າວກໍໄດ້ຮັບການກວດຫາເຊື້ອແບບເລັ່ງດ່ວນ, ຫຼັງຈາກຜ່ານໄປພຽງໜຶ່ງຄືນປາກົດວ່າຜົນກວດທັງໝົດອອກມາເປັນລົບ.
ບັນດາຜູ້ຊ່ຽວຊານຫຼາຍຝ່າຍຕ່າງກໍຕັ້ງຂໍ້ສັງເກດວ່າ ວິທີການນີ້ສາມາດນຳມາປະກອບໃຊ້ກັບວິທີການຕ້ານການແຜ່ລະບາດຂອງພະຍາດໂຄວິດ-19 ໄດ້ຢ່າງແມ່ນຢຳ ແລະຄົບຖ້ວນໃນປະເທດຈີນ ເຊິ່ງຊ່ວຍໃຫ້ລັດຖະບານສາມາດຕິດຕາມ ແລະຄວບຄຸມພະຍາດໄດ້ຢ່າງທັນເວລາ.