ສໍານັກຂ່າວ BBC ລາຍງານວ່າ Abdel Fattah Al-Berhan ຜູ້ນໍາກໍ່ລັດຖະປະຫານໃນປະເທດຊູດານ ໄດ້ຈັດຖະແຫຼງການໃນວັນທີ 26 ຕຸລາ 2021 ໂດຍລະບຸວ່າ ເຫດຜົນທີ່ເຂົາຕັດສິນໃຈເຂົ້າຍຶດອໍານາດ ເມື່ອວັນທີ 25 ຕຸລາ ທີ່ຜ່ານມາ ຍ້ອນບໍ່ຕ້ອງການໃຫ້ມີການເກີດສົງຄາມກາງເມືອງໃນປະເທດ.
ຂະນະທີ່ຕອນນີ້ ນາຍົກລັດຖະມົນຕີ Abdalla Hamdok ໄດ້ພັກຢູ່ທີ່ບ້ານຂອງເຂົາເອງເພື່ອຄວາມປອດໄພ ແລະ ຈະໄດ້ຮັບອະນຸຍາດກັບບ້ານຂອງຕົນເອງໃນໄວໆນີ້. ການລັດຖະປະຫານ ດັ່ງກ່າວເອີ້ນສຽງປະນາມຈາກທົ່ວໂລກ ທັງອາເມລິກາ, ສະຫະພາບເອີຣົບ, ສະຫະປະຊາຊາດ, ສະຫະພາບອັບຟຣິກາ ໂດຍທັງໝົດ ຮຽກຮ້ອງໃຫ້ກອງທັບ ຊູດານ ປ່ອຍຕົວຜູ້ນໍາທາງການເມືອງທີ່ຖືກຈັບກຸມໄປໃນທັນທີ.
ທ່ານ Antonio Guterres, ເລຂາທິການໃຫຍ່ອົງການສະຫະປະຊາຊາດ ຊູດານເປັນປະເທດໜຶ່ງທີ່ປະເຊີນກັບການລະບາດຂອງລັດຖະປະຫານ ທີ່ເກີດຂຶ້ນໃນອັບຟຣິກາ ແລະ ເອເຊຍ ຮຽກຮ້ອງໃຫ້ບັນດາປະເທດມະຫາອຳນາດໂລກສົມທົບກັນ ຊອກຫາມາດຕະການສະກັດກັ້ນຢ່າງມີປະສິດທິຜົນ ໂດຍຜ່ານສະພາຄວາມໝັ້ນຄົງສະຫະປະຊາຊາດ (UNSC).
ມື້ດຽວກັນ, ປະຊາຊົນຊາວຊູດານ ສືບຕໍ່ເດີນຂະບວນ ປະທ້ວງ ຕໍ່ຕ້ານລັດຖະປະຫານ ທີ່ນະຄອນ Khartoum ເປັນມື້ທີສອງ ຫຼັງຈາກມີການ ປາບປາມຢ່າງໜັກ ໃນວັນທີ 25 ຕຸລາ, ມີຖະໜົນ ແລະ ຂົວຫຼາຍແຫ່ງໄດ້ຖືກກີດຂວາງ ຮ້ານຄ້າບາງແຫ່ງຕ້ອງໄດ້ປິດລົງ, ການເຊື່ອມຕໍ່ອິນເຕີເນັດ ແລະ ໂທລະສັບໄດ້ຖືກຕັດ. ມາຮອດປັດຈຸບັນ ມີຜູ້ເສຍຊີວິດແລ້ວທັງໝົດ 10 ສົບ.