ໃນວັນທີ 20 ຕຸລາ 2021 ໄດ້ມີການລາຍງານຂ່າວວ່າ: ກອງທັບຂອງເກົາຫຼີເໜືອເປີດເຜີຍເຖິງຄວາມສໍາເລັດໃນການທົດສອບການຍິງອາວຸດນິວເຄຍທີ່ພັດທະນາຂຶ້ນໃໝ່ ທີ່ອອກແບບໃຫ້ຍິງຂຶ້ນຈາກເຮືອດໍານໍ້າ. ໃນການລາຍງານຂ່າວຍັງໄດ້ລະບຸວ່າອາວຸດນິວເຄຍທີ່ອອກແບບໃໝ່ແມ່ນມີການຕິດຕັ້ງເທັກໂນໂລຊີທີ່ທັນສະໄໝທີ່ສາມາດຂ້າມຜ່ານສິ່ງກີດຂວາງໄດ້ຢ່າງງ່າຍດາຍ ໂດຍທາງເກົາຫຼີເໜືອໄດ້ລະບຸວ່າ ອາວຸດນິວເຄຍແບບໃໝ່ນີ້ຈະເປັນອາວຸດທີ່ຊ່ວຍເສີມສັກກະຍະພາບໃນການປະຕິບັດການທາງໃຕ້ນໍ້າຂອງກອງທັບໄດ້ຢ່າງມີປະສິດທິພາບ.
ການທົດສອບອາວຸດນິວເຄຍຂອງເກົາຫຼີເໜືອໃນຄັ້ງນີ້ເກີດຂຶ້ນໃນຂະນະທີ່ປະເທດເກົາຫຼີເໜືອຈະສ້າງແຮງກົດດັນໃຫ້ກັບລັດຖະບານສະຫະລັດອາເມລິກາ ແລະ ເກົາຫຼີໃຕ້ໃຫ້ຍົກເລີກນະໂຍບາຍຄວາມຮ່ວມມືລະຫວ່າງກັນ ລວມໄປເຖິງການຄວໍ່າບາດເກົາຫຼີເໜືອ ແລະ ການຊ້ອມສູ້ຮົບທີ່ເກົາຫຼີເໜືອເບິ່ງວ່າມັນເປັນໄພຄຸກຄາມ.
ໂດຍກ່ອນໜ້ານີ້ທາງການຂອງປະເທດຍີ່ປຸ່ນ ແລະ ເກົາຫຼີໃຕ້ໄດ້ເປີດເຜີຍວ່າ ສາມາດກວດຈັບການຍິງອາວຸດນິວເຄຍຂອງເກົາຫຼີເໜືອໄດ້ ໂດຍຄາດວ່າຈະເປັນການຍິງຂຶ້ນຈາກບໍລິເວນທ່າເຮືອຊິນໂປ ທາງພາກຕາເວັນອອກຂອງເກົາຫຼີເໜືອ ເຊິ່ງເປັນເຂດຖານທີ່ໃຊ້ຈອດເຮືອດໍານໍ້າ ແລະ ລະບຸວ່າອາວຸດນິວເຄຍໄດ້ຖືກຍິງໄປໃນໄລຍະທາງ 450 ກິໂລແມັດ ລະດັບຄວາມສູງ 60 ກິໂລແມັດ ແລະ ຕົກໃນທະເລຕາເວັນອອກລະຫວ່າງປະເທດເກົາຫຼີ ແລະ ຍີ່ປຸ່ນ ແຕ່ບໍ່ໄດ້ບອກວ່າເປັນການຍິງຂຶ້ນຈາກໜ້ານໍ້າ.
ເຖິງຢ່າງໃດກໍຕາມຈາກການລາຍງານຂ່າວຂອງເກົາຫຼີເໜືອບໍ່ໄດ້ບອກວ່າ ທ່ານ ຄິມ ຈອງ ອຶນ ຜູ້ນໍາສູງສຸດຂອງເກົາຫຼີເໜືອໄດ້ໄປເຂົ້າຮ່ວມຊົມການທົດສອບອາວຸດນິວເຄຍໃນຄັ້ງນີ້ຫຼືບໍ່.
ແຫຼ່ງຂ່າວ: Thairath