ເວັບໄຊ CNN ລາຍງານ: ທ່ານ ຟູມິໂອະ ຄິຊິດະ (Fumio Kishida) ເຂົ້າຮັບຕຳແໜ່ງນາຍົກລັດຖະມົນຕີຄົນໃໝ່ຂອງຍີ່ປຸ່ນ ໃນວັນທີ 4 ຕຸລາ ໂດຍໄດ້ຮັບການມອບໝາຍໜ້າທີ່ຮັບຜິດຊອບໃນການເປັນຜູ້ນຳດ້ານເສດຖະກິດທີ່ໃຫຍ່ສຸດເປັນອັນດັບສາມຂອງໂລກໃນຍຸກການລະບາດຂອງໄວຣັສໂຄໂຣນ່າ.

ນາຍົກລັດຖະມົນຕີຍີ່ປຸ່ນຄົນໃໝ່ ທ່ານ ຄິຊິດະ, ໄວ 64 ປີ ໄດ້ຮັບການເລືອກຕັ້ງເປັນຫົວໜ້າພັກເສລີປະຊາທິປະໄຕ (LDP) ໃນອາທິດຜ່ານມາ ກ່ອນຈະໄດ້ຮັບການເລືອກຕັ້ງເປັນນາຍົກລັດຖະມົນຕີຄົນທີ 100 ຂອງຍີ່ປຸ່ນຢ່າງເປັນທາງການ. ການດຳລົງຕຳແໜ່ງດັ່ງກ່າວຖືເປັນຄວາມທ້າທາຍອັນໃຫຍ່ຫຼວງທີ່ ທ່ານ ຄິຊິດະ ຈະໄດ້ຮັບມື ໂດຍສະເພາະກໍແມ່ນຜົນກະທົບຈາກການລະບາດຂອງພະຍາດໂຄວິດ-19 ທີ່ເພີ່ມຂຶ້ນ, ປັນຫາເສດຖະກິດຖົດຖອຍ, ການເພີ່ມຂຶ້ນຂອງຈຳນວນຜູ້ສູງອາຍຸ, ລວມທັງຄວາມຕຶງຄຽດທີ່ເພີ່ມຂຶ້ນກັບຈີນ.

ທ່ານ ຟູມິໂອະ ຄິຊິດ ເຄີຍດຳລົງຕຳແໜ່ງລັດຖະມົນຕີກະຊວງການຕ່າງປະເທດຂອງຍີ່ປຸ່ນລະຫວ່າງປີ 2012 ຫາ 2017 ພາຍໃຕ້ການນຳຂອງທ່ານອາເບະ, ນາຍົກລັດຖະມົນຕີທີ່ດຳລົງຕຳແໜ່ງຍາວນານທີ່ສຸດຂອງຍີ່ປຸ່ນ.