ໃນວັນທີ 25 ກັນຍາ 2021 ທີ່ຜ່ານມາ ບໍລິສັດ ໄບໂອກູບາ ຟາມາຊີ ທີ່ເປັນບໍລິສັດກ່ຽວກັບການຢາຂອງລັດຖະບານກູບາ ໄດ້ອອກບົດຖະແຫຼງຜ່ານທາງສື່ອອນລາຍທະວິດເຕີວ່າ ທາງບໍລິສັດສາມາດສົ່ງອອກວັກຊີນ ອັບດາລາ ສໍາລັບປ້ອງກັນພະຍາດໂຄວິດ-19 ໄດ້ເປັນຮອບທໍາອິດ ໂດຍໄດ້ເຮັດສັນຍາຊື້ຂາຍກັບປະເທດຫວຽດນາມຈໍານວນ 5 ລ້ານໂດສ ແລະ ໄດ້ຈັດສົ່ງວັກຊີນອັບດາລາ ເຊິ່ງເປັນວັກຊີນທີ່ຕ້ອງສັກ 3 ເຂັມຮອບທໍາອິດໃຫ້ກັບຫວຽດນາມເປັນທີ່ຮຽບຮ້ອຍແລ້ວ.

ທັງນີ້, ວັກຊີນອັບດາລາເປັນໜຶ່ງໃນ 3 ວັກຊີນປ້ອງກັນໂຄວິດ-19 ທີ່ປະເທດກູບາໄດ້ພັດທະນາ ແລະ ຜະລິດຂຶ້ນເພື່ອສັກໃຫ້ກັບປະຊາຊົນໃນປະເທດ ສ່ວນອີກ 2 ວັກຊີນທີ່ເຫຼືອກໍແມ່ນ: ວັກຊີນ ໂຊເບີຣານາ 2 ແລະ ໂຊເບີຣານາ ພລັສ ເຊິ່ງໃນເວລານີ້ ວັກຊີນທີ່ສາມາດຜະລິດໄດ້ສາມາດສັກໃຫ້ກັບປະຊາຊົນໄດ້ແລ້ວເປັນຈໍານວນກວມເອົາ 90% ຂອງປະຊາກອນ ແລະ ເຮັດໃຫ້ສາມາດສົ່ງອອກວັກຊີນໃຫ້ກັບປະເທດອື່ນໄດ້.

ແລະ ທາງດ້ານບໍລິສັດໄບໂອກູບາຟາມາ ໄດ້ອອກມາອ້າງອີງວ່າວັກຊີນທັງ 3 ຍີ່ຫໍ້ທີ່ຕົນເອງຜະລິດນັ້ນແມ່ນສາມາດປ້ອງກັນບໍ່ໃຫ້ຜູ້ຕິດເຊື້ອມີອາການຮຸນແຮງ ຫຼື ເສຍຊີວິດໄດ້ສູງກວ່າ 90% ແລະ ໄດ້ຈັດສົ່ງຂໍ້ມູນເພື່ອຂໍອະນຸມັດໃຊ້ງານເປັນກໍລະນີສຸກເສີນກັບອົງການອະນາໄມໂລກແລ້ວ. ຮອງປະທານບໍລິສັດໄບໂອກູບາຟາມາ ໄດ້ບອກວ່າ ຫຼັງຈາກທີ່ສາມາດຜະລິດວັກຊີນໄດ້ຄົບຕາມຄວາມຕ້ອງການຂອງປະເທດແລ້ວ ກໍຈະຜະລິດເພື່ອສົ່ງອອກຢ່າງເປັນທາງການຕໍ່ໄປ.

ແຫຼ່ງຂ່າວ: Matichon